YoShLAR BILAN MULOQOT

Bugungi kunda Oʻzbekiston yoshlari hayotning barcha jabhalarida olamshumul yutuqlarni qoʻlga kiritib, xalqimiz qalbidan munosib joy olgan buyuk siymo – Oʻzbekistonning Birinchi Prezidenti I.A.Karimov orzu qilganlaridek, hech kimdan kam emasligini, dunyo tamadduniga munosib hissa qoʻshgan ulugʻ ajdodlariga munosib voris ekanliklarini amalda namoyon etmoqdalar. Dunyoning eng nufuzli davlatlari bilimdonlari bahs olib borgan fanlar olimpiadalarida jahonning eng koʻzga koʻringan fan arboblari qalbida havas va hayrat uygʻotayotgan, olamshumul sport musobaqalarida mustaqil yurtimiz bayrogʻini tobora baland koʻtarib, dunyo xalqlari eʼtirofi va eʼtiboriga sazovor boʻlayotgan yoshlarimiz safi kun sayin oshib bormoqda. Qalblarida oʻzlari tugʻilib-oʻsgan zaminga, ona Vataniga mehr-muhabbati ulugʻ, adabiyot va sanʼatda, sportda va hatto siyosatda, zamonaviy axborot texnologiyalari sohasida oʻz iqtidorlarini namoyon etayotgan bugungi yoshlarning deyarli barchasi Istiqlol tengdoshlari ekanligi yanada quvonarli.

Chunki mustaqillik – barkamol avlod taʼlim-tarbiyasi, ularning oʻz qobiliyat va iqtidorlarini namoyon etishlari uchun mislsiz imkoniyatlar yaratib berdi. Bugungi yoshlar ana shu imkoniyatlar ogʻushida yashamoqda, taʼlim va tahsil olib, ijod qilmoqda, biznes gʻoyalarini muvaffaqiyatli himoya qilib, tadbirkorlik sohasining uddaburonlariga aylanishmoqda.

Yaqinda tumanimizdagi "Choykoʻl” madaniyat va aholi dam olish markazida boʻlib oʻtgan "Kecha kim edigu bugun kim boʻldik, ertaga qanday yuksak marralarni egallashimiz kerak?” mavzusidagi tumanimiz yoshlari bilan  muloqot tadbirida mustaqillik yillarida yoshlarimiz erishgan va erishayotgan yutuqlar mamnuniyat bilan eʼtirof etildi. Unda "Kamolot” YoIH Markaziy Kengashi masʼul mutaxassislari rahbarligidagi targʻibot guruhi aʼzolari, tuman hokimining oʻrinbosarlari, hokimlik mutaxassislari, idora va tashkilotlarning rahbarlari, akademik litsey va kollejlarning oʻqituvchi va oʻquvchilari hamda OAV vakillari ishtirok etdilar.

Tadbirda ishtirok etgan Oʻzbekiston "Kamolot” YoIH Markaziy Kengashi boʻlim mudiri Axtam Roʻzimurodov, Oʻzbek milliy akademik drama teatri aktyori Tolibjon Moʻʼminov, Rio-de-Janeyroda oʻtkazilgan yozgi olimpiada chempioni Shahobiddin Zoirovlar tumanimiz yoshlarini qiziqtirayotgan mavzular doirasida samimiy muloqotlar oʻtkazdilar.

- Mustaqillik yillarida yoshlar hayoti bilan bogʻliq barcha masalalar davlat siyosatining eng ustuvor yoʻnalishlaridan biriga aylandi, - dedi tadbirda soʻzga chiqqan Oʻzbekiston "Kamolot” YoIH Markaziy Kengashi boʻlim mudiri Axtam Roʻzimurodov. – Agar eslaringizda boʻlsa, bugungi mustaqillik tengdoshlari boʻlgan yoshlar endi dunyoga kelgan paytda, 1991-yilning 20-noyabrida "Oʻzbekiston Respublikasida yoshlarga oid davlat siyosatining asoslari toʻgʻrisida”gi Qonun qabul qilingan edi. Ana shu Qonun asosida Oʻzbekiston yoshlarining orzu-istaklariga qanot bagʻishlash, ularning iqtidorlarini yuzaga chiqarish, oʻqish, ishlash, dam olish, yashash sharoitlarini yanada yaxshilash boʻyicha kompleks chora-tadbirlar dasturlari ishlab chiqilib, har yili ana shu dasturlar doirasida samarali ishlar olib  borildi. Bundan tashqari, Oʻzbekiston Respublikasi Konstitutsiyasi asosida oʻsib kelayotgan yosh avlod huquq va manfaatlarini kafolatlashga yoʻnaltirilgan  yigirmadan ortiq qonun va qonunosti hujjatlari qabul qilinib, bu borada bir qator xalqaro hujjatlar ham imzolandi.

Lekin shiddat bilan rivojlanib borayotgan zamon, yoshlarimiz ongu shuuridagi oʻzgarishlar, kun sayin hayotimizdan oʻrin olayotgan yangilanishlar mavjud qonun hujjatlariga singdirilgan yoshlar hayoti, turmush tarziga oid normalar, tamoyil va talablarni yanada takomillashtirish zarurligini taqozo etdi. Mana, yaqinda qabul qilingan yangi tahrirdagi "Yoshlarga oid davlat siyosati toʻgʻrisida”gi Oʻzbekiston Respublikasi Qonuni oʻsib kelayotgan yosh avlod, kelajagimiz egalarining huquq va manfaatlarini kafolatlovchi mustahkam poydevor boʻldi.

Axtam Roʻzimurodov amudaryolik yoshlarni ana shunday muhim Qonun qabul qilinishi bilan tabriklab, ularning dilidagi orzu-istaklari, oʻqishda, ishda va hayotlarida mavjud boʻlgan, yechimini kutayotgan muammolari bilan qiziqdi va yoshlarni oshkora, samimiy muloqotga chorladi.

Oshkora va samimiy muloqotlarda yoshlar oʻzlarini qiziqtirgan savollar bilan murojaat etdilar. Xususan, Amudaryo xizmat koʻrsatish va servis kasb-hunar kolleji oʻquvchisi Husanjon Yoʻldoshev, Amudaryo qishloq xoʻjalik kasb-hunar kolleji  oʻquvchisi Nigora Rahimova, Amudaryo xizmat koʻrsatish va servis kasb-hunar kolleji oʻquvchisi Shohista Rahimboyeva, Amudaryo qishloq xoʻjalik kasb-hunar kolleji oʻquvchisi Umidjon Sobirov, 19-sonli umumtaʼlim maktabi boshlangʻich sinf oʻqituvchisi Gʻulomjon Abdullayev hamda 40-sonli maktabning maʼnaviyat va maʼrifat ishlari boʻyicha  direktor oʻrinbosari Muqaddas Beknazarova va boshqalar oʻzlari oʻqishda va ishda erishayotgan yutuqlar bilan birga mavjud kamchiliklar haqida soʻz yuritdilar. Tumanda "Yoshlar markazi”, tuman tarixini aks ettiruvchi muzey, markazlashgan yoshlar kutubxonasi, suzish sportiga qiziquvchilar uchun yopiq suv havzasi, kollej va litsey hamda umumtaʼlim maktablarida chet tillarni chuqurlashtirilgan tarzda oʻrgatishga ixtisoslashgan maxsus repetitorlik sinf (kurs)lari, ayniqsa, qishloq joylarida yoshlar muntazam shugʻullanishi uchun talablar darajasidagi sport toʻgaraklari, 9-sonli bolalar musiqa va sanʼat maktabining "Choykoʻl” ovuli hududidagi filiali oʻquvchilari uchun pianino olib berish, kollej va akademik litsey oʻquvchilarining oʻqishga qatnashi uchun qulaylik yaratish maqsadida tuman markazidan qishloqlarga maxsus transport qatnovini yoʻlga qoʻyish borasidagi yoshlar tomonidan tushgan takliflar va savollarga "Kamolot” YoIH Markaziy Kengashi boʻlim mudiri Axtam Roʻzimurodov, tuman hokimligi masʼul mutaxassislari, idora va tashkilotlarning rahbarlari atroflicha javob berdilar.

Shuningdek, yoshlar bilan oshkora muloqot tadbirida Oʻzbek milliy akademik drama teatrining isteʼdodli aktyori Tolibjon Moʻʼminov, Rio-de-Janeyroda oʻtkazilgan yozgi olimpiada oʻyinlari boks boʻyicha chempioni Shahobiddin Zoirovlar oʻzlari hayotda, sanʼat va sport sohasida erishgan yutuqlari haqida soʻz ochib, yoshlarni qiziqtirgan  savollarga javob berdilar.

"Kecha kim edigu bugun kim boʻldik, ertaga qanday yuksak marralarni egallashimiz kerak?!” mavzusida boʻlib oʻtgan targʻibot va oshkora muloqot dasturi tumanimiz yoshlarining ijtimoiy faolligini yuksaltirish, yoshlarga oid davlat siyosatini amalga oshirish borasidagi yana bir ezgu qadam boʻldi.

Robiya YOʻLDOShEVA.