MUTOLAA – HAYoTIMIZGA ZAVQ VA FAYZ BAGʻIShLAYDI

Insonning yetuk shaxs sifatida kamol topishida badiiy adabiyotning ahamiyati juda katta. Istiqlol sharoitida oʻzbek xalqi uchun oʻzligini anglash, milliy qadriyatlarni tiklash jarayonida mumtoz adabiyotimiz taraqqiyotiga ulkan hissa qoʻshgan, asarlari jahon madaniyati xazinasidan munosib oʻrin egallagan ijodkorlar bilan birgalikda zamondosh shoir va yozuvchilarning badiiy tafakkur rivojida oʻziga xos oʻrin tutgan asarlaridan bahramand boʻlish xalqqa xizmat qilish burchini anglagan har bir kishi uchun muhimdir, chunki adabiyot hayot darsi sanaladi. Mana shularni hisobga olgan holda "Jayxun ilhomlari” Nodavlat notijorat tashkilotida muhim tadbirlar qatorida tumanimiz yoshlarini jahon va milliy mumtoz adabiyotimizning nodir namunalaridan, hozirgi davrda oʻzbek  va boshqa tillarda yaratilayotgan asarlardan bahramand qilish rejalashtirilib, amaliy ishlar olib borilmoqda.

"Jayxun ilhomlari” NNTga Oʻzbekiston Respublikasi Oliy Majlisi huzuridagi nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash  jamoat fondi tomonidan "Yuksak maʼnaviyatli avlod – yurt kelajagi” nomli loyihasini bajarish uchun 25 mln. soʻm grant mablagʻlari berilgan edi. Biz tashkilotimiz ish faoliyatini rejalashtirishda tumanimiz yoshlarining maʼnaviyatini yuksaltirishga, dunyoqarashini kengaytirishga moʻljallangan har turli tadbirlar bilan birgalikda kutubxona tashkil qilib, uni milliy va jahon adabiyotining sara asarlari bilan boyitishga harakat qildik. Shu maqsadda dastlab Toshkentdagi nashriyotlardan 842 ta kitob olib kelindi. Hozirgi davrda kutubxonamizda homiy tashkilotlar yordamida 2874 ta kitob toʻplangan. Tuman yoshlari, maktab, kollej va litsey oʻquvchilarini kutubxonamizdan unumli foydalanishga jalb qilish maqsadida oʻtgan yil mobaynida boshqa turli tadbirlar qatorida oʻquv oʻrinlarida, shu jumladan olis qishloqlarda ham, kitob sayillari uyushtirildi, koʻchma kutubxona tashkil qilindi. Shu tadbirlarda  faol qatnashgan ijodkor yoshlardan 42 nafarining sara sheʼrlaridan "Jayxun jilgʻalari” nomli toʻplam grant mablagʻi hisobidan nashr qilinib, tuman aholisiga tarqatildi. Kutubxona fondining boyishida faol kitobxonlar tashabbus koʻrsatib, kitob sovgʻa qilish anʼanasini boshlab  berdilar. Masalan: "Yangiobod” mahalla fuqarolar yigʻini raisi Zebo Rajabova 110 ta badiiy kitob sovgʻa qildi. Besh-oʻn donadan kitob sovgʻa qilayotganlar ham anchagina. Men ham oʻzimning shaxsiy kutubxonamdan oʻzbek va rus tillardagi milliy hamda chet el adabiyotiga mansub badiiy, ilmiy kitoblardan 325 tasini kutubxonaga topshirdim. Koʻzlagan maqsadlarimizga erishuvimizda bular hali yetarli emas.

Muhtaram Prezidentimizning shu yil 12-yanvardagi "Kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targʻibot qilish boʻyicha komissiya tuzish toʻgʻrisida”gi  farmoyishi kitob mutolaasini keng targʻib qilishda muhim ahamiyatga egadir.

Bu – ijodkorlar, noshirlar, kitob tarqatuvchilar uchun qulaylik yaratgan boʻlsa, kitobxonlar uchun yangi asarlarni oʻqib, zavqlanishlari uchun katta imkoniyat demakdir. Biz ham bu farmoyishdan  ruhlangan holda yoshlarning maʼnaviyatini yuksaltirib, intellektual salohiyatini oshirishga qaratilgan tadbirlarni oʻz vaqtida oʻtkazib, bu sohada koʻzlangan maqsadlarga erishamiz. Buning uchun esa kutubxona fondini boyitib, kitoblar sonini 5000 taga yetkazamiz, shu bilan birga kitob mutolaasiga targʻib qilish ishlarini ham faol ravishda olib boramiz.

"Argumenti i fakti” gazetasining oʻtgan yilgi 48-sonida dunyodagi bir qancha olimlarning tadqiqot natijalariga tayanib yozishicha, qogʻozga bosilgan kitoblarni mutolaa qilish insonning ruhiy zoʻriqishlarini 68 foizga  yumshatib, barvaqt vafot etish xavfini 23 foizga kamaytirar ekan.

Bu maʼlumotlar yana bir marta inson zamonaviy texnologiya vositalari bilan alahsib qolavermay, badiiy adabiyot namunalari mutolaasi bilan muntazam ravishda shugʻullanib borsa, bu unga har tomonlama foydali ekanligini isbotlaydi. Demak, hayotmizni tobora zavqli va fayzli qilib borish oʻz qoʻlimizda ekan.    

Ahmad NAFASOV,

"Jayxun ilhomlari” NNT raisi.