AYoLGA EHTIROM — ONAGA, VATANGA EHTIROM

Donishmandlarning "Qaysidir millatning nimalarga qodirligini bilmoqchi boʻlsang, uning ayoliga boq” degan hikmati bor. Chindan ham har bir xalq – ayolning mahsulidir. Meva daraxtdan ustun boʻla olmaganidek, farzand ham onasidan ustun boʻlolmaydi. Demak, ayolning qudratiga qarab uning tarbiyalayotgan farzandiga baho berish mumkin ekan. Shu oʻrinda qaysidir xalqning kelajagini tasavvur qilmoqchi boʻlsangiz, uning ayolga boʻlgan munosabatiga nazar soling, degim keladi. Zero, ayolga hurmat-ehtirom, unga gʻamxoʻrlik – kelajakka gʻamxoʻrlikdir. Ayolini ulugʻlagan millatning kelajagi albatta buyuk boʻladi.

Oʻzbekiston – chindan ham kelajagi buyuk davlat. Zero, yurtimizda ayolga eʼtibor davlat siyosati darajasiga koʻtarilgan. Ayollarning huquq va erkinliklari qonunlar bilan mustahkamlangan. Oʻzbekiston Respublikasi Konstitutsiyasi, oʻnlab qonunlar, saksonga yaqin farmon va qarorlar, davlat dasturlari xotin-qizlarning ijtimoiy-siyosiy faolligini oshirish, oila va jamiyatdagi mavqeini mustahkamlash, oila, onalik va bolalikni muhofaza qilishda huquqiy asos boʻlib xizmat qilmoqda. Xotin-qizlarning siyosiy faolligini oshirish, kasbiy, jismoniy, maʼnaviy va intellektual salohiyatini yuksaltirish, qiz bolalarni zamonaviy kasb-hunarlarga yoʻnaltirish, ularni sportga keng jalb etish, onalik va bolalikni muhofaza qilish, sogʻlom oilani shakllantirish masalalari ham davlat siyosati darajasiga koʻtarilgan.

Mamlakatimizda xotin-qizlar masalasini hukumat darajasiga koʻtarish, ularning hukumat tarkibida faoliyat koʻrsatishi tajribasini jahon davlatchiligi tarixi kam koʻrgan va bugunda aynan shu holat nufuzli xalqaro ekspertlar tomonidan yuqori baholanmoqda.

1999-yilda "Zulfiya nomidagi davlat mukofotini taʼsis etish boʻyicha takliflarni qoʻllab-quvvatlash toʻgʻrisida”gi Prezident Farmonining qabul qilinishi yosh qizlarimizning isteʼdod imkoniyatlarini namoyish etishiga sharoit yaratdi va bu Farmon yurtimiz qizlarining ijtimoiy hayotida katta hodisa sifatida qabul qilindi.

2004-yil 25-mayda Oʻzbekiston Respublikasi Prezidentining "Oʻzbekiston Xotin-qizlar qoʻmitasi faoliyatini qoʻllab-quvvatlash borasidagi qoʻshimcha chora-tadbirlar toʻgʻrisida”gi PF-3434-sonli Farmoni eʼlon qilindi.

Ushbu Farmon ayollar hayot farovonligini va Xotin-qizlar qoʻmitasi faoliyatini yangi bosqichga koʻtardi. Farmon asosida joriy etilgan diniy maʼrifat va maʼnaviy-axloqiy tarbiya masalalari boʻyicha maslahatchi lavozimida 8655 nafar hayot tajribasiga ega, qadriyatlarni chuqur bilgan, bir soʻz bilan aytganda mahalla vijdoniga aylangan ayollar mahallalarda milliy anʼana va urf-odatlarni rivojlantirish, oilalarda barqarorlik, sogʻlom maʼnaviy-axloqiy muhitni taʼminlash borasida faoliyat olib bormoqda. 2004-yil "Oliy Majlisga saylovlar toʻgʻrisida”gi Qonunning yangi tahririda siyosiy partiyalar tomonidan oʻz nomzodlari tarkibida 30 foizgacha boʻlgan nomzodlarning xotin-qizlar orasidan koʻrsatilishi mumkinligi belgilab qoʻyildi. 2014-yilgi saylovlarda 1 nafar Qoraqalpogʻiston Respublikasi Joʻqorgʻi Kengesi deputati, 7 nafar tuman kengashi deputati ayol-qizlardan saylandi.

Mamlakatimiz aholisining yarmidan koʻprogʻini tashkil etuvchi xotin-qizlar davlat va jamiyat qurilishining barcha jabhalarida amalga oshirilayotgan islohotlar jarayonida faol qatnashib, Vatanimiz taraqqiyoti, uning yanada gullab-yashnashiga munosib hissa qoʻshmoqda. Sobiq ittifoq davrida faqatgina dala ishlari bilan mashgʻul boʻlib, ogʻir sharoitlarda mehnat qilgan ayollarimiz bugun nafaqat taʼlim va tibbiyot sohasi, balki ishlab chiqarish va xizmat koʻrsatish kabi sohalarda ham mehnat qilib, yurtimiz taraqqiyotiga munosib hissa qoʻshmoqdalar.

Ayniqsa, soʻnggi yillarda tadbirkorlik, xususiy va oilaviy biznes sohasida ayollarning ishtiroki kuchayib borayotgani quvonarli holat.

2016-yilda "Xotin-qizlar qoʻmitasining eng namunali boshlangʻich tashkiloti” koʻrik-tanlovining "Fuqarolar yigʻinining eng namunali xotin-qizlar bilan ishlash boʻyicha komissiyasi raisi” nominatsiyasi boʻyicha "Kuyukoʻpir” OFYning xotin-qizlar bilan ishlash boʻyicha komissiyasi raisi M.Sapayeva tanlovning Oʻzbekiston bosqichida 3-oʻrinni egalladi.

Joriy yilning "Xalq bilan muloqot va inson manfaatlari yili” deb belgilanishi munosabati bilan jamoat tashkilotlari joylarda aholi bilan suhbatlar, muloqotlar oʻtkazmoqda. Bu uchrashuvlar mazmunidan shunday xulosaga keldikki, bugunning ayoli – davlat va jamiyat rivoji yoʻlida amalga oshirilayotgan islohotlardan toʻliq xabardor va ularni qoʻllab-quvvatlaydi. Ular orasida bankdan kredit olib, tomorqa xoʻjaligi bilan shugʻullanish, chorvachilik va parrandachilikni yoʻlga qoʻyib, oilaviy daromadlarini koʻpaytirish, tadbirkorlik bilan shugʻullanib, iqtisodiyotimiz rivojiga hissa qoʻshish istagidagi ayol-qizlarimiz talaygina. Davlatimiz va hukumatimiz tomonidan ularga amaliy yordamlar berilmoqda.

Ayol sogʻlom boʻlsa, millat sogʻlom boʻladi, degan gap bejiz aytilmagan. Zero, sogʻlom onadan sogʻlom farzand dunyoga keladi. Shu sababli xotin-qizlarning salomatligini mustahkamlash, "Sogʻlom ona – sogʻlom bola” tamoyilini amalga oshirish ishlariga katta eʼtibor berilmoqda. Bu borada muhtaram Prezidentimiz tashabbuslari bilan sogʻlikni saqlash tizimida keng koʻlamli islohotlar amalga oshirilmoqda. Hatto, chekka qishloqlarda ham oilaviy poliklinikalar, ularning boʻlimlari faoliyati yoʻlga qoʻyilishi kelgusida ham ayol-qizlarimiz salomatliklarini mustahkamlashga, sogʻlom farzandlar dunyoga kelishiga va farzandlarimizning barkamol shaxs sifatida shakllanishlariga xizmat qiladi.

Fursatdan foydalanib, tumanimizda yashovchi barcha xotin-qizlarni, tabarruk onaxonlar va muhtarama ayollarimizni, aziz opa-singillar va jajji qizlarimizni oʻzlaridek goʻzal va maftunkor bahor faslining ilk bayrami – 8-mart – Xalqaro xotin-qizlar kuni munosabati bilan chin qalbimdan samimiy muborakbod qilaman!

Farzandlaringiz va yaqinlaringiz baxtiga, elu yurtimiz baxtiga hamisha omon boʻling, aziz va mehribon ayollar!

Maryam AHMEDOVA,

tuman hokimi oʻrinbosari,