Mehr, eʼtibor, saxovat! Asrlar osha xalqimizning qon-qoniga singib ketgan bu ezgu fazilatlar ayni kunda ham turmushimizning yanada fayzli, jamiyatimizda hamjihatlikning, ahillikning ustuvor boʻlishiga xizmat qilmoqda. Muhtaram Birinchi Prezidentimiz I.A.Karimovning "... har qaysi xalqning bagʻrikengligi va olijanobligi, kerak boʻlsa, odamiyligi va insonparvarligi nafaqat oʻz yaqinlari, balki begona odamlardan oʻz mehri va yordamini ayamasligida yaqqol koʻrinadi, sinovdan oʻtadi”, degan soʻzlari ifodasini hayotimizning har lahzasida koʻrishimiz, his qilishimiz mumkin.

Oʻzbekiston Kasaba uyushmalari federatsiyasi tomonidan bir qator jamoat tashkilotlari ishtirokida joriy yilning 20-aprelidan 23-mayigacha mamlakatimizdagi ehtiyojmand oilalar va mehribonlik uylarida tarbiyalangan 620 juft kelin-kuyovning nikoh hamda 3 ming 280 nafar bolaning sunnat toʻyi oʻtkazilayotgani ham ana shunday xayrli ishlardandir.

Mamlakatimizda aholining ijtimoiy himoyaga muhtoj qatlamlarini moddiy va maʼnaviy qoʻllab-quvvatlashni kuchaytirish, jamiyatimizda hamjihatlik, mehr-oqibat, bagʻrikenglik va xayr-saxovat muhitini yanada mustahkamlash maqsadida tashkillashtirilayotgan bu tadbirga muvofiq tumanimizda ham shu yilning 26-aprelida "Bek” toʻyxonasida 21 nafar bolajonlarning sunnat toʻylari, 12 juft kelin-kuyovlarning nikoh toʻylari oʻtkazildi.

Tumanda xayriya nikoh va sunnat toʻylari oʻtkazildi (Fotogalereya)

 Dastlab ular tumanimizning diqqatga sazovor joylarini tomosha qilib, Xotira maydonidagi yodgorlik poyiga gullar qoʻydilar. Soʻngra ular «Yusuf eshon bobo» jomeʼ masjidida sharʼiy nikoh oʻqildi.

Toʻy bolalar esa istirohat bogʻi va tumanimizda boʻlib turgan koʻchma hayvonot bogʻini sayr qilishdi.

Muhtasham toʻyxona oldida kelin-kuyovlarni, toʻy bolalarni sanʼatkorlar karnay-surnay sadolari ostida kutib olishdi.

Toʻy! Bu soʻzni har gal eshitganimizda koʻnglimiz bir orziqib, quvonchdan entikib ketadi. Boisi, hammamiz ham farzandlarimizning ana shu qutlugʻ kunini sogʻinib, toʻy uchun borimizni yigʻib yashaymiz. Sunnat toʻyini, nikoh toʻyini elga maʼlum qilib, dasturxon yozishni orzu qilamiz.

Ha, toʻy toʻla maʼnoda orzu-niyatlar ijobati boʻlganligi boisdan ham qutlugʻ tantana. Biroq bu tantanaga ota-onang, yaqinlaring, doʻstlaringdan tashqari, butun yurting evrilib tursa, quvonchingga sherik boʻlsa, yelib-yugurib xizmat qilsa... bu yanada ulkan baxt emasmi?

Toʻyxonaga yor-yor, kelin-salomlar sadolari ostida, bejirim liboslarda, koʻngillarida olamcha hayajon bilan kirib kelgan 12 juft kelin-kuyovlarning, sarpolari yarashgan 21 nafar bolajonlarning yuzlarida ana shunday masrurlikning ifodasi aks etib turardi.

Toʻy sababchilari yasatilgan toʻkin dasturxon atrofiga joylashib olgach, Qoraqalpogʻiston Respublikasi Joʻqorgʻi Kengesi Raisi M.Yerniyazov, Oʻzbekiston va Qoraqalpogʻiston Kasaba uyushmalari tashkilotlari vakillari ularni hayotlaridagi unutilmas kun bilan samimiy qutladi.

Shundan soʻng toʻy bolalarga velosipedlar va esdalik sovgʻalari, kelin-kuyovlarga mebellar jamlanmasi sertifikati va nikoh uzuklarisovgʻa qilindi.

Toʻybolalar nomiga "Xalq banki”ning tuman boʻlimida ochilgan hisob raqamlarining har biriga 1 million soʻm oʻtkazilgan omonat daftarchalar topshirildi.

Nikoh toʻylari oʻtayotgan kelin-kuyovlarning ish bilan taʼminlanganlik holati oʻrganib chiqilib, ishsizlari ishga joylashtirilgani yangi bunyod etilayotgan oilalarning moddiy farovonligini taʼminlashga xizmat qilishi soʻzsiz.

Soʻngra tuman FHDYo boʻlimi xodimlari tomonidan 12 juft kelin-kuyovlarning nikohi qonuniy qayd etilib, nikoh guvohnomalari topshirildi.

Tadbirda ishtirok etgan nuroniylar, kelin-kuyovlarning, toʻy bolalarning yaqinlari davlatimizning, jamiyatimizning eʼtibori, muhtaram Prezidentimiz Sh.Mirziyoyevning yoshlarning baxtiyor va farovon yashashi, hayotda munosib oʻrinlarini topishi yoʻlida koʻrsatayotgan gʻamxoʻrliklari uchun minnatdorchilik bildirishdi.

Taniqli sanʼatkorlar ijrosidagi kuy-qoʻshiqlar davraga fayz kiritdi.