TOʻGʻRI AXBOROT YoShLARNI EZGULIKKA UNDAYDI

Maʼlumki, yoshlar yangilikka intiluvchan, modaga oʻch, xorij standartlarini oson qabul qilishga moyil boʻladi. Bugungi kunda yoshlarga tashqi muhitdan kirib keladigan barcha axborotlarni filtrlab berish imkoniyati yoʻq. Yuksak texnologiyalar va axborot asrida yashar ekanmiz, tabiiyki, mamlakatimiz ham globallashuv jarayonlaridan tashqarida emasligini unutmasligimiz zarur.

Bugungi kunda dunyoni tashvishga solayotgan, xususan, shu kunlarda MDH mamlakatlarida tezda tarqalayotgan "Koʻk kit”, "Jim-jit uy”, "F-57”, "Yugurmasang, oʻlasan”, "Men – oʻyinda” kabi oʻz joniga qasd qilishga undovchi oʻyinlarning ijtimoiy tarmoqlar orqali yoshlarimizning eʼtiborini tortishining oldini olish uchun yoshlar orasida profilaktik tadbirlar olib borish, buning uchun ota-onalar, mahalla, taʼlim muassasalari, voyaga yetmaganlar ishlari boʻyicha komissiyalar va ichki ishlar boʻlimlari  profilaktika nozirlari, keng jamoatchilik vakillari tomonidan yoshlar qoʻlidagi mobil qurilmalari va kompyuterlarni vaqti-vaqti bilan nazorat qilish lozim deb oʻylayman. Mamlakatimizda internetdan foydalanishni cheklovchi qonunlar yoʻq, ammo bu har kim xohlagancha undan foydalansin, degani emas. Negaki, har bir ishda meʼyor boʻlgani yaxshi. Oʻzbekistonda aynan shunday axborot manbalaridan foydalanishni tartibga soluvchi qonuniy asoslar yaratib qoʻyilganini unutmasligimiz kerak.

Tumanimizda globallashuv davrida yoshlar maʼnaviyatini shakllantirish va ularni milliy qadriyatlarga hurmat ruhida tarbiyalash maqsadida taʼlim tizimidagi muassasalarning deyarli barchasi «ZiyoNET» tarmogʻiga ulangan. «ZiyoNET»da turli xil milliy taʼlim saytlari mavjud boʻlib, uning asosiy maqsadi taʼlim tizimida yoshlar va taʼlim oluvchilarga bilim olish jarayonida axborot-kommunikatsiya xizmatlarini koʻrsatishdan iborat.

Yoshlarda yot gʻoyalarga qarshi mustahkam immunitetni shakllantirish maqsadida "Jaholatga qarshi maʼrifat”, "Men diniy ekstremizm va terrorizm tahdidini qanday tushunaman?” mavzularida ijodiy ishlar (sheʼr, insho va rasmlar) tanlovlari tashkil etilmoqda. Bunday madaniy-maʼnaviy tadbirlarning amalga oshirilishida Oʻzbekiston «Milliy tiklanish» demokratik partiyasi tuman Kengashining deputatlik guruhi ishtirokini ham taʼkidlab oʻtish zarur. Deputatlik guruhining bevosita ishtirokida joriy yilning aprel oyida umumtaʼlim maktablari va kasb-hunar kollejlari, akademik litsey oʻquvchiqizlari ishtirokida mamlakatimizning  Birinchi Prezidenti I.A.Karimovning «Yuksak maʼnaviyat – yengilmas kuch» asarining «Maʼnaviyatga tahdid – oʻzligimizga tahdid» nomli bobini oʻrganishga bagʻishlangan tadbirlar oʻtkazildi.

Bundan tashqari, Oʻzbekiston «Milliy tiklanish» demokratik partiyasining «Donolik va tashabbuskorlik – siyosiy yetakchilik mezoni» koʻrik tanlovining tuman bosqichida tumandagi taʼlim muassasalarida faoliyat yuritayotgan yosh ziyoli ayol-qizlar ishtirok qilib, oʻzlarining siyosiy bilimdonlik darajasini namoyish qildilar va Qoraqalpogʻiston Respublikasi miqyosida faxrli 2-oʻrinni egallashga erishdilar.

Joriy yilning may oyida umumtaʼlim maktablarida «Navoiy vorislari» gʻazalxonlik tanlovining tuman bosqichi oʻtkazildi. Partiya deputatlik guruhining tashabbusi bilan taʼlim muassasalarida «Kitobning yoshlar maʼnaviyatini shakllantirishdagi oʻrni va ahamiyati» mavzusida suhbatlar uyushtirildi.

Shuni unutmasligimiz kerakki, yangiliklarning barchasi ham ijobiy xususiyatga ega emas. Internetdan foydalanuvchi farzandlarimiz ongiga buni yaxshilab singdirishimiz lozim. Toki yoshlarimiz yangiliklar ortidan quvib, bizdan uzoqlashib ketmasin.

Gulmirza Babajanov,

52-sonli maktab oʻqituvchisi, xalq deputatlari tuman Kengashi deputati.

(Foto - uzedu.uz)