YuKSAK GʻALLA XIRMONI – DASTURXON TOʻKINLIGI, KOʻNGIL XOTIRJAMLIGI

Tumanimizda bugʻdoy yetishtirib, davlatga topshirish boʻyicha yillik shartnomaviy rejalarning ortigʻi bilan ado etilganligi barcha-barchani birdek quvontirdi. Axir quvonmay boʻladimi, bir vaqtlar yetishtirish uchun barcha sharoitlar boʻlishiga qaramasdan asosiy oziq-ovqat mahsuloti boʻlgan un chetdan keltirilgan yurtimizda bugun xirmonlar bugʻdoyga toʻlib, oʻzimizni toʻla taʼminlab, hatto chetga sotilayotgan boʻlsa.

Bu istiqlol yillarida gʻalla mustaqilligiga  erishish borasida olib borilgan oqilona siyosat, xalqimizning yuksak bunyodkorlik mehnati samarasidir.

Demak, soʻz tumanimizda yaratilgan zalvorli bugʻdoy xirmoni bunyodkorlariga!

Nuraddin Bekchonov, "Qipchoq” MMTP raisi:

– Bizning "Qipchoq” muqobil mashina traktor parkimiz hududimizdagi 39 ta fermer xoʻjaliklariga xizmat koʻrsatadi. 15 ta fermer xoʻjaligida oʻtgan yilning kuzida 143 gektar maydonga bugʻdoy ekilib, tekis nihol olishga erishilgan edi. Avvalo, iqlim sharoitimizga mos yangi, hosildor va tezpishar navlar yaratilib, ekilayotgani, qolaversa, vegetatsiya davrida mineral oʻgʻitlar bilan oʻz vaqtida oziqlantirilib, sugʻorilib, begona oʻtlardan tozalangani mazkur maydonlarda moʻl hosil yaratishga asos boʻldi.

Ayni kungacha 15 ta fermer xoʻjalikda ham bugʻdoy topshirish davlat shartnomalari ortigʻi bilan bajarildi. 143 gektar bugʻdoyzordan 362 tonnadan ziyod hosil yigʻishtirilib olindi va davlat xirmoniga topshirildi. Hosildorlik ayniqsa "Xidirov Nurullaboy”, "Oʻrozboyev Dostonbek” fermer xoʻjaliklarida yuqori boʻldi. Xirmoni donga, koʻngli quvonchga toʻlgan tumanimiz dehqonlarini erishilgan yutuq bilan qizgʻin tabriklayman!

Matnazar Aytboyev,

"Aytboy Otaxon” fermer xoʻjaligi raisi:

– Tumanimiz boʻyicha gʻalla topshirish rejasi ortigʻi bilan ado etilganligi dehqonlarnigina emas, butun tumanimiz aholisini quvonchga beladi. Axir gʻalla asosiy  rizq-roʻzimiz, tirikchiligimiz asosi.

Turfa uslubda yopilib, dasturxonimizni bezab turgan biri-biridan shirin nonlarimiz oʻz tuprogʻimizda unib, oʻz mehnatimizdan bunyod boʻlganligini oʻylashning oʻzi har birimizning koʻnglimizni faxr-iftixor tuygʻulariga toʻldiradi.

Bizning "Aytboy Otaxon” fermer xoʻjaligimizda 4,8 gektar maydonga oʻtgan yili kuzda "Krasnodar-99”navli bugʻdoy urugʻini sepgan edik. Bir tekis nihol olib, agrotexnika qoidalariga muvofiq parvarishladik. Natijada har gektaridan 40 tsentnerdan ziyod hosil yigʻishtirib olib, tumanimiz gʻalla xirmonining barvaqt yuksalishiga munosib hissa qoʻshdik.

Qurol Beshboyev,

"Beshboyev Qurbongʻaliy” fermer xoʻjaligi raisi:

– Tumanimiz dehqonlarining yuksak bugʻdoy xirmonida bizning "Beshboyev Qurbongʻaliy” fermer xoʻjaligimiz aʼzolarining ham hissasi borligi barchamizni quvontiradi. 10 gektar bugʻdoy ekilgan dalalardan 25 tonna hosilni davlat xirmoniga topshirdik. Jami hosilimiz gektariga 55-60 tsentnerdan toʻgʻri kelayapti. Rejadan tashqari yigʻishtirib olingan hosil xoʻjaligimiz ijarachilariga, mexanizatorlariga, hududimizdagi kam taʼminlangan oilalarga tarqatilayapti. Yuqori hosil yetishtirishdan ijarachilarimizning manfaatdorligi ularni yana ham unumli ishlashga ruhlantirayapti.

Xurshid Tojiboyev, kombaynchi:

– Gʻalla oʻrim-yigʻimi uyushqoqlik bilan tashkil etilib, zarur sharoitlar yaratilgani bois, tumanimizda gʻalla yetishtirish rejasi qisqa muddatlarda ado etildi. Men ham 6-otryad tarkibida oʻzimga biriktirilgan kombayn yordamida Y.Oʻrozboyev nomli MMTP xizmat koʻrsatadigan fermer xoʻjaliklari dalalaridan 450 tonnadan ziyod bugʻdoyni yigʻib olishga erishdim. Dala boshida issiq ovqat tashkil etilib, dam olish uchun sharoitlar yaratilgani, yonilgʻi-moylash materiallari oʻz vaqtida yetkazib berib turilganligi ishimiz unumli boʻlishini taʼminladi.

Tumanimizning bunyod etilgan ulkan bugʻdoy xirmonida mening ham hissam borligidan quvonaman. Axir gʻalla xalqimizning milliy boyligi, asosiy rizqi. Xalq rizqini ziyoda qilayotgan gʻallakorlar, barcha dehqonlarga yuksak xirmon qutlugʻ boʻlsin, deyman.

Hamro Matyoqubov,

tuman Ichki ishlar boʻlimi yongʻin xavfsizligi boʻlinmasi boshligʻi:

– Tumanimiz dehqonlari erishgan ulkan yutuqda bizning boʻlinmamiz xodimlarining ham hissalari bor.

Tumanimiz boʻyicha tuzilgan oʻrim-yigʻim otryadlarining har biriga xodimlarimiz biriktirildi va yongʻin chiqishining oldini olish borasida barcha chora-tadbirlar koʻrildi.

Oʻrim-yigʻim boshlanishi oldidan barcha fermer xoʻjalik-lari, gʻallakorlar, kombaynchilar gʻallazorlarda yongʻin chiqishining oldini olishga doir yoʻriqnoma bilan tanishtirildi. Koʻrilgan barcha tadbirlar oʻz samarasini berdi. Dehqonlarimizning halol mehnatlari evaziga yetishtirilgan bugʻdoy hosili oʻrib-yigʻib olinib, isrofgarchiliksiz davlat xirmoniga topshirildi.

Boʻlinmamiz xodimlari, gʻallazorlarda oʻrim-yigʻim davrida yongʻin sodir boʻlishining oldi olinganligidan juda xursand.

Suhbatdosh Oygul RAJABOVA.