YoShLAR BIZDAN IBRAT OLIB ULGʻAYSIN!

Joriy yilning 9-fevralida Prezidentimiz Shavkat Mirziyoyev raisligida ichki ishlar organlari faoliyati tizimida mavjud boʻlgan muammo va kamchiliklarni bartaraf etish yuzasidan oʻtkazilgan videoselektor yigʻilishida yosh avlod tarbiyasini kuchaytirish uchun barcha imkoniyatlarni ishga solish, taʼlim muassasalarida oʻquvchilar davomatini yaxshilashga eʼtiborni kuchaytirish zarurligi taʼkidlangan edi.

Yoshlar tarbiyasi uchun barchamiz masʼulmiz. Birinchi  navbatda farzand oilada tarbiya topadi. Shu boisdan ham ota-ona bola tarbiyasiga jiddiy eʼtibor berishi lozim. Farzandlarga oilada yaxshi  tarbiya berilsa, ularga barcha sharoitlar yaratilib, boʻsh vaqtlarini mazmunli oʻtkazishlariga eʼtibor kuchaytirilsa, ayni muddao boʻladi.

Agar bolalarga shunday imkoniyatlar yaratib berilmasa, ular zerikarli hayotlaridan bezor boʻlib, turli illatlarga ilakishib ketishlari mumkin.

Ming afsuski, ayrim oilalarda ota-ona farzandlariga namuna yoki ibrat boʻla olishmayapti. Ular farzandlari koʻz oʻngida spirtli ichimliklar ichishib, janjal va toʻpolon koʻtarishgacha borishadi. Xalqimizda: "Qush uyasida koʻrganini qiladi”, degan hikmatli ibora bor. Ota-onaning bir-birovlariga behayolarcha munosabatlarini koʻrgan farzandning yaxshi inson boʻlib yetishishi qiyin, albatta. Bola avval oilada, keyin taʼlim muassasasida yaxshi tarbiya olishi lozim.

Yoshlar tarbiyasini yaxshi yoʻlga qoʻyish maqsadida  oila – maktab – mahalla hamkorligini yaxshilash lozim, deb hisoblayman. Chunki taʼlim-tarbiya ishlari shunday tashkil etilgan joylardagi yoshlar psixologiyasi taʼlim va tarbiya oʻlda-joʻlda boʻlgan joylardagiga qaraganda tubdan farq qiladi.

Shunday ekan, aziz yurtdoshlar, yoshlar tarbiyasiga barcha joyda – oilada ham, taʼlim muassasalarida ham, mahallalarimizda ham jiddiy eʼtibor beraylik.

Baxtiyor RAJABOV,

sport taʼlimi faxriysi.

(Foto: OʻzA)