MAQSADIMIZ – BARKAMOL AVLODNI VOYaGA YeTKAZISh

Ajiniyoz nomidagi Nukus Davlat pedagogika instituti qoshidagi 3-sonli Amudaryo akademik litseyi tumanimizdagi nufuzli oʻquv muassasalaridan biri sanaladi. 2008-yilda oʻz faoliyatini boshlagan mazkur oʻquv dargohini har yili 200 nafardan ziyod ilmga chanqoq yoshlar tamomlaydilar.

Akademik litsey 495 oʻquvchi oʻringa moʻljallangan boʻlib, oʻquv jarayonini tashkil etishga xizmat qiladigan 30 ta oʻquv xonalari zarur anjomlar bilan jihozlangan. Umumiy yer maydoni 5,4 ming metr kvadratni tashkil etuvchi oʻquv muassasasining fayzli bogʻi, barcha qulayliklarga ega sport zali, 3 ta oʻquv-laboratoriya xonalari hamda 120-oʻrinli faollar zali mavjud. Zamonaviy sharoitlarga ega boʻlgan, har biri 100-oʻrinli 2 ta yotoqxonada uzoq masofadan qatnovchi 200 nafar oʻquvchilar joylashtirilgan.

Fan va oʻquv-laboratoriya xonalari zamon talablari darajasida zarur uskunalar bilan taʼminlangan.

Bugungi kunda akademik litseyda 14 ta guruhda 402 nafar oʻquvchilar taʼlim-tarbiya olishmoqda. Darslar oʻzbek tilida, yuqori malakali mutaxassis oʻqituvchilar tomonidan olib boriladi.

Oʻquvchilarning mukammal bilim olishlari uchun 15 ta fan toʻgaraklari tashkil qilingan va ularning bilimi reyting tizimi asosida baholanib, yillik natijalari birinchi va ikkinchi semestr yakunlariga koʻra chiqariladi.

Oʻquv jarayonida anʼanaviy dars shakllari bilan bir qatorda interfaol oʻqitish usullaridan ham keng foydalaniladi. Kafedralar ilmiy va oʻquv faoliyatida oliy taʼlim muassasalari xodimlari ham ishtirok etadilar.

Akademik litseyda oʻquvchilar bilim saviyasini nazorat qilish maqsadida reyting tizimi, oʻquvchilar bilimlari oʻsishini nazorat qilish tizimlari ishlab chiqilgan.

2011-2015-yillarda 1272 nafar bitiruvchilarimizning 654 nafari, yaʼni 52 foizi oliy taʼlim muassasalari talabalari boʻlishdi. 2017-2018 oʻquv yilida esa 227 nafar bitiruvchilardan 92 nafari oliy oʻquv yurtlariga oʻqishga kirishdi. Bu koʻrsatkich bilan akademik litsey Oʻzbekiston Respublikasida faoliyat yuritayotgan 143 ta akademik litseylar orasida 55-oʻrinni, Qoraqalpogʻiston Respublikasidagi 10 ta akademik litsey oʻrtasida 3-oʻrinni egallab turibdi.

Akademik litsey maʼmuriyati keyingi yillarda bitiruvchilarning OTMlarga kirish koʻrsatkichini yaxshilash maqsadida bir qator ishlarni amalga oshirmoqda. Xususan, soʻnggi uch yil ichida litsey oʻqituvchilari tomonidan Nukus Davlat pedagogika instituti professor-oʻqituvchilari bilan hamkorlikda 10 ta nomdagi ilmiy-uslubiy qoʻllanmalar yaratildi.

2017-2018 oʻquv yilida esa litsey oʻqituvchilarining 6 nomdagi oʻquv-uslubiy qoʻllanma va risolalari chop etildi.

2016-2017 oʻquv yilida Fanlar olimpiadasining Qoraqalpogʻiston Respublikasi bosqichida 5 nafar oʻquvchi sovrinli oʻrinlarni egallashdi. Ona tili va adabiyot fanidan Umida Maqsadboyeva 1-oʻrinni, Dilafroʻz Ozodova 2-oʻrinni, kimyo fanidan Maʼmurjon Karimov 3-oʻrinni, 2-bosqich oʻquvchilari oʻrtasida Fanlar olimpiadasining Qoraqalpogʻiston Respublikasi bosqichida kimyo fanidan Shahzod Ibrohimov 2-oʻrinni, ona tili va adabiyot fanidan Mohira Farhodova 2-oʻrinni egalladi.

2017-2018 oʻquv yilida oʻquvchilarimiz Fanlar olimpiadasi Qoraqalpogʻiston Respublikasi bosqichida munosib ishtirok etishdi. Jumladan, Shahzod Yoʻldoshboyev matematika, Maftuna Hayitboyeva ona tili va adabiyot fanidan faxrli 3-oʻrinni egallashdi va 4-bosqich Fan olimpiadasiga yoʻllanma olishdi.

Akademik litsey oʻquvchilari uchun ingliz tili oʻqituvchilari tomonidan seminar-treninglar, ochiq darslar oʻtkazish anʼanaga aylangan. Koʻpchilik oʻqituvchilarimiz DTM tomonidan oʻtkazilgan sinovlarda muvaffaqiyatli qatnashib, 15 foizlik ustama olishga erishdilar.

Oʻquv muassasamizda sport-sogʻlomlashtirish ishlariga alohida eʼtibor beriladi. Birgina 2018-yilning oʻzida sportchi oʻquvchi-yoshlarimiz sportning shaxmat, yengil atletika, stol tennisi, futbol va minifutbol, voleybol turlari boʻyicha oʻtkazilgan musobaqalarda tuman va Respublika miqyosida faxrli oʻrinlarni egallashdi.

Maqsadimiz – har tomonlama bilimdon, barkamol yoshlarni tarbiyalash, qolaversa, akademik litseyimizning taʼlim-tarbiya sohasidagi reytingini yanada oshirishdir.

Men fursatdan foydalanib, tumanimiz oʻquv muassasalarida faoliyat yuritayotgan barcha hamkasblarimni, faxriy ustozlarimni 1-oktyabr – Oʻqituvchi va murabbiylar kuni bilan samimiy muborakbod etaman. Ularning yosh avlod taʼlim va tarbiyasi yoʻlidagi sharafli ishlarida yutuqlar tilayman.

Gʻulomjon DUYSENBOYeV, Amudaryo akademik

litseyi direktori.