QORAQALPOQ TILI FAN OYLIGI YaXShI NATIJALAR BILAN YaKUNLANDI

Amudaryo tumanidagi 16-sonli maktabida Qoraqalpoq tili fanini oʻqitishga doimo  katta eʼtibor beriladi.

Joriy yilning noyabr oyi “Qoraqalpoq tili fan oyligi” deb eʼlon qilinishi munosabati bilan maktabda oʻquvchilarga qoraqalpoq tilini mukammal oʻrgatishga yoʻnaltirilgan harakatlar yanada kuchaytirildi.
Fan oyligi davomida maktab oʻquvchilari oʻrtasida qoraqalpoq tilida “Ona tilim – jonu dilim” mavzusidagi insholar tanlovi, Qoraqalpoq ertaklari boʻyicha rasmlar tanlovi va “Kimning xati chiroyli” mavzusida xusnixatlar tanlovi oʻtkazildi.

Joriy yilning 30-noyabr kuni maktabda qoraqalpoq tili fani oʻqituvchisi Nasiba Xudoyberganova 8-sinfda ochiq dars oʻtkazib, oʻquvchilarga qoraqalpoq tilini oʻrgatishdagi oʻz mahoratini namoyish qildi. Ushbu ochiq darsda ishtirok etgan oʻqituvchilar Nasiba Xudoyberganovaning oʻquvchilarga qoraqalpoq tilini oʻrgatishdagi uslubiga va mahoratiga katta baho berishdi.

1-dekabr - Qoraqalpoq tiliga davlat tili maqomi berilgan kun munosabati bilan shu yilning 30-noyabr kuni maktabda “Ona tilim – oltin xazinam” mavzusida badiiy kecha oʻtkazildi. Ushbu tadbirda maktabning 5-,6- va 8-sinflari oʻquvchilari qoraqalpoq tilida sheʼrlar aytishib, qoʻshiqlar ijro etishdi, qoraqalpoq kuylariga raqsga tushishdi hamda qoraqalpoq ertaklari asosida sahna koʻrinishlarini namoyish etishdi.

 Shu kuni maktabning 5-,6- va 8-sinflarida qoraqalpoq tili fani oʻqituvchilari Nasiba Xudoyberganova, Latifa Jumaniyozova va Sanobar Xalillayevalar tomonidan namunaviy darslar tashkil etilib, ularda oʻquvchilarga qoraqalpoq tilini oʻrgatishdagi yangi uslublardan keng foydalanildi.

1-dekabr – Qoraqalpoq tiliga davlat tili maqomi berilgan kun munosabati bilan maktabda oʻtkazilgan tadbirlarni tayyorlashda maktabning fidoyi va jonkuyar oʻqituvchilaridan Nigora Ismoilova, Sabohat Ermonova, Gulasal Xolniyozova va Qunduz Ibodullayevalar jonbozlik koʻrsatishdi.

16-sonli ixtisoslashgan davlat umumtaʼlim maktabida Qoraqalpoq tili fan oyligi yaxshi natijalar bilan yakunlandi.

Maktabda taʼlim mazmunini takomillashtirish, fanlarni oʻqitishda yuqori samaradorlikka erishishni taʼminlash maqsadida fan oyliklarini oʻtkazishda oʻqituvchilar mahoratidan va ilgʻor pedagogik texnologiyalardan keng foydalanishga eʼtibor yanada kuchaytirilmoqda.

A.JUMANIYoZOV.