MTT TARBIYaLANUVChILARI XORIJIY TILLARNI OʻRGANIShMOQDA

Mamlakatimizda 6 yoshli bolalarni MTTlarning maktabgacha taʼlim guruhlariga toʻliq qamrab olgan holda ularni maktab taʼlimiga tayyorlash, bilimga intilish koʻnikmalarini hosil qilish, alohida qobiliyatlarini rivojlantirish maqsadida olib borilayotgan ishlar oʻz natijalarini bermoqda. Maktab taʼlimiga tayyorlash guruhlari tarbiyalanuvchilari alifbe saboqlarini qunt bilan oʻrganib, hatto matematik amallarni yoddan bajarishga intilayotgani MTTlar tomonidan tashkil etilayotgan tadbirlarda oʻz ifodasini topmoqda.

Tumanimizdagi 31-sonli maktabgacha taʼlim tashkiloti tarbiyalanuvchilari ishtirokida oʻtkazilgan tadbirda ham soʻz oʻyinlari, tez aytishlar, rus va ingliz tillaridagi savollarga tez javob topish hamda biri-biridan mazmundor sheʼr va qoʻshiqlarni bolajonlar maroq bilan ijro etishdi.

“Keling, til oʻrganamiz!” deb nomlangan ochiq dars-mashgʻulotida dastlab tashkilotning maktabga tayyorlash guruhi oʻqituvchisi Bozorgul Shomurodova tomonidan tayyorlangan stsenariy asosida rus tili boʻyicha bolajonlarning bilim darajasi sinovdan oʻtkazildi. Bolalarning rus tilida salomlashish odobi bilan boshlangan ochiq dars-mashgʻuloti savol-javoblar asosida davom etdi.

Bolajonlar oʻz ota-onalarini 8-mart – Xalqaro xotin-qizlar kuni bilan rus tilida tabriklab, sheʼrlar aytishdi. Ota-onalari va buvijonlariga hafta kunlarini birma-bir taʼriflab berishdi. Oʻqituvchi rahbarligida yangi  mavzuni oʻrganishdi. Yaʼni, uy hayvonlarining nomlarini rus tilida takrorlab, bu boradagi bilimlarini rasmlar orqali mustahkamladilar.

Ochiq dars-mashgʻuloti davomida bolajonlarni charchash holatidan chiqarish maqsadida tetiklantiruvchi mashqlarga keng oʻrin berilgani ayni muddao boʻldi. Kayfiyati koʻtarilgan bolajonlarning faolligi oshib, birgalikda qoʻshiq kuyladilar. “Har doim boʻlsin, quyosh” qoʻshigʻini rus tilida kuylab, raqsga tushdilar, shu bilan birga ushbu mashhur bolalar qoʻshigʻining mazmun-mohiyati xususida tushunchaga  ega boʻldilar.

Ochiq dars-mashgʻuloti yakunida darsda faol qatnashgan  bolajonlarga tashkilot maʼmuriyati tomonidan faxriy yorliqlar taqdim etilib, uy vazifasi topshirildi.
Shu kuni mazkur tashkilotda Azima Oʻrozboyeva tomonidan ingliz tili boʻyicha ochiq dars-mashgʻulotida ham bolajonlar ingliz tilida salomlashish, savol-javoblar asosida oʻtilgan dars mavzusi – yil fasllariga doir soʻzlarni takrorlash hamda yoz, kuz, qish, bahor oylari haqida ingliz tilida gap tuzish boʻyicha oʻz bilim va koʻnikmalarini namoyish etdilar.

Fasllarga oid harakatlarni ifoda etuvchi oʻyinlar, jismoniy mashqlarni bajarishdi.
Shundan soʻng, oʻqituvchi bolajonlarni yangi mavzuga doir yangi soʻzlar bilan tanishtirdi. Bolajonlar bu soʻzlarni toʻgʻri talaffuz qilishni oʻrgandilar va yangi soʻzlarni harakatlar orqali ifodalab berdilar. Dars-mashgʻulot jarayonida charchoqni bosish maqsadida shoʻx harakatlar bilan ijro etiladigan inglizcha qoʻshiqlar kuylashdi. Shuningdek, fasllar va ob-havo mavzusiga doir oʻyinlar oʻynash, oʻtilgan dars yuzasidan savol-javoblar orqali ochiq dars-mashgʻuloti mavzusi yanada mustahkamlandi.

Shunisi eʼtiborliki, boʻlib oʻtgan ochiq dars-mashgʻuloti bolajonlarning xorijiy tillarni oʻrganishga qiziquvchanligini yanada oshirdi. Ingliz tilida savollarga aniq va puxta javob bergan bilagʻon bolajonlar tashkilot maʼmuriyati tomonidan ragʻbatlantirildi.

Dars-mashgʻuloti yakunida bolajonlarga uyda bajarib kelishlari uchun yangi topshiriq berildi. “Fasllarga monand ob-havoni surat chizish orqali tasvirlash” vazifasi boʻyicha oʻqituvchi tushunchalar berib, mavzuni ingliz tilida qayta-qayta takrorlash orqali bolajonlarda zarur  tushunchalar uygʻotishga erishdi.
31-sonli MTTda maktabga tayyorlash guruhi tarbiyalanuvchilari boʻlib oʻtgan dars-mashgʻulotlarida faollik koʻrsatishdi.

R.YOʻLDOShEVA.