OʻQUVChILARIMIZ ILMDA YuKSAK ChOʻQQILAR SARI INTILMOQDALAR

Muhtaram Prezidentimiz Sh.Mirziyoyev yurtimiz tayanchi va kelajagi  yoshlar ekanligini alohida taʼkidlab, yoshlarimiz uchun misli koʻrilmagan darajada imkoniyatlar eshigini ochmoqda. Bu imkoniyatlarni Yurtboshimiz ilgari surgan 5 tashabbus misolida ham koʻrishimiz mumkin.

Besh tashabbusning asosiy boʻgʻini ham yoshlarga qaratilganligi bejiz emas. 5 tashabbus doirasida yurtimizda barcha sohalarda oʻzgarishlar bisyor.

Shu qatorda bizning 48-sonli oʻrta umumtaʼlim maktabimizda ham  keng koʻlamli ishlar amalga oshirilmoqda. Oʻquvchilarimiz fan olimpiadalari, bilimlar bellashuvi va sport musobaqalarida yaxshi natijalarga erishmoqda. Xususan, fevral oyida Yoshlar ittifoqi tuman Kengashi tomonidan oʻtkazilgan “Shaxmat taxtasi” musobaqasida maktabimizning 7-sinf oʻquvchisi Asadbek Oʻrinboyev tuman miqyosida faxrli ikkinchi oʻrinni egalladi. Fanlar olimpiadasida ham maktabimizning olti nafar oʻquvchisi hudud bosqichida gʻolib boʻlishib, tuman bosqichida ham faxrli oʻrinlarni egalladilar.

“Mahallam – mening taqdirimda” nomli koʻrik-tanlovda ham maktabimizning 11-sinf oʻquvchisi Mashhura Abdullayeva va 10-sinf oʻquvchisi Diyorbek Mahmudov tuman bosqichida gʻolib boʻldi. Qoraqalpogʻiston Respublikasi bosqichida ham faol qatnashib qaytdi. Bu natijalarga erishishda ustozlarning mehnati katta, albatta. Shu bilan birga  oʻquvchilarga kengroq imkoniyat yaratish maqsadida maktabimizda alohida 9-11-sinf oʻquvchilari uchun darsdan tashqari bepul toʻgaraklar ham tashkil qilingan. Bundan maqsad oʻquvchilarimizning oliy oʻquv yurtlariga oʻqishga kirish darajasini oshirish va boʻsh vaqtini mazmunli oʻtkazishdir.

Biz taʼlim-tarbiya sohasidagi ishlarimiz bilan davlatimiz rahbari amalga oshirayotgan xayrli ishlarga oʻz hissamizni qoʻshayotganimizdan faxrlanamiz. Yoshlarimiz Prezidentimizning “Yangi  Oʻzbekistonni, albatta, yoshlar bilan birga quramiz”, - degan soʻzlariga javoban ilm-irfon choʻqqilarini egallash sari dalil intilmoqdalar. Chunki muhtaram Prezidentimizning bu soʻzlari har bir yosh avlodning qalbidan joy olib, olgʻa qadam tashlashga undaydi.

Sardor RAJABOV,
48-sonli maktab oʻqituvchisi.