KASBIDAN KAMOL TOPGAN AYoL

Kutubxona – nurxona! Umrimizning qanchadan qancha aziz lahzalari  shu qutlugʻ maskanda kechadi, kitoblar mutolaasidan shuurimiz oydinlashadi, koʻnglimizga nur inadi.

Kutubxonalarda faoliyat yuritib, tashrif buyuruvchini iliq qarshi olib, uning yoshiga, qiziqishiga mos  sara kitoblarni tavsiya qiluvchilarni esa maʼrifat ulashuvchilar deb atasak, arziydi.

Tumanimizdagi 21-sonli maktabda 36-yildan beri kutubxonachi boʻlib ishlab kelayotgan Gulchehra opa Tojimurodovani shu boisdan ham barcha oʻquvchilar, oʻqituvchilar hurmat qilishadi.

Kutubxonaga tashrif buyurgan oʻquvchilarga opa izlagan mavzudagi kitoblarini topishda yordam berish bilan cheklanmay, ularning oʻqigan kitoblari yuzasidan savol-javoblar ham qilib turadi. Deyarli har yili yosh kitobxonlar tanlovlarini tashkil etadi.

Gulchehra Tojimurodova maktab oʻqituvchilar jamoasining  yaqin koʻmakdoshi. U maktabda oʻtkaziladigan turli maʼnaviy-maʼrifiy tadbirlarning ham yuqori saviyada oʻtishiga, turli tanlovlar tashkil etilishida oʻz hissasini qoʻshadi.

– Bir umr shu kasbda ishladim. Oʻquvchilarni kitobxonlikka jalb qilishga, darsliklar, turli qoʻshimcha qoʻllanmalar va badiiy asarlarni qadrlashga oʻrgatishga harakat qildim, – deydi u oʻz faoliyatidan xursand boʻlib.

Kasbidan kamol topib, elda obroʻ-eʼtiborli boʻlgan Gulchehra Tojimurodovani 8-mart – Xalqaro xotin-qizlar bayrami bilan qutlab qolamiz.

Dilfuza BOZORBOYeVA, shu maktab oʻqituvchisi.