11-mart kuni 16-maktabda ingliz tili fanidan ochiq dars mashgʻuloti tashkil qilindi

Davrimizning oʻziga xos xususiyatlaridan biri boʻlgan axborot-kommunikatsiya texnologiyalarining jadal rivojlanishi natijasida uning imkoniyatlaridan samarali foydalanilmoqda. Umumtaʼlim maktablarida ushbu vositalar yordamida taʼlim jarayoniga yangicha yondashilib, uni tashkil etishga alohida eʼtibor qaratilmoqda.

XXI asr — yuksak texnologiyalar asri boʻlib, zamonaviy yoshlarimiz nafaqat davr ruhiga monand, balki elektron olamdagi taraqqiyotga muvofiq qadam tashlamoqdalar. Shu boisdan ham, yosh avlodga taʼlim berish jarayoniga boshqacha yondashish talab etilmoqda. Darslarda oʻqituvchining oʻrni ham oʻzgarib bormoqda. Oʻqituvchi endilikda asosan yoʻnaltiruvchi vazifasini oʻtamoqda. Zamon bilan hamnafas qadam tashlashni maqsad qilgan oʻqituvchilar darsning har qanday qismini AKT orqali jonlantirishga tayyor boʻlishlarini ham davr talab etmoqda.ʼ

Oʻqituvchi va murabbiylar davr talabidan kelib chiqqan holda darslarni noanʼaniviy tarzda, zamonaviy axborot texnologiyalaridan foydalanib, tashkil qilishmoqda.

11-mart sanasida tumanimizdagi 16-sonli ixtisoslashtirilgan davlat umumtaʼlim maktabida ingliz tili fanidan ana shunday noanʼaviy ochiq darsi oʻtkazildi. Dars mashgʻulotida AKTdan, taqdimotlardan samarali foydalanildi. Maktabning 7-“B” sinf oʻquvchilarining ingliz tili fanidan olgan bilimlarini sinovdan oʻtkazish, oʻquvchilarning fanga boʻlgan qiziqishlarini yanada oshirish, qolaversa, oʻquvchilarda yangi bilim, koʻnikma va malakalarni hosil qilish maqsadida tashkil qilingan ochiq darsda sinf oʻquvchilarining 13 nafari qatnashdilar. “Mening sevimli mashgʻulotim” mavzusida oʻtkazilgan dars mashgʻulotini maktabning ingliz tili fani boʻyicha tajribali oʻqituvchisi Mavluda Niyozova tashkil qildi.

Aytish joizki, mamlakatimizda chet tillarini, ayniqsa, ingliz tilini oʻrganishga katta eʼtibor qaratilmoqda. Oʻsib kelayotgan yosh avlodni chet tillarga oʻqitish, shu tillarda erkin soʻzlasha oladigan mutaxassislarni tayyorlash tizimini tubdan takomillashtirish hamda buning negizida, ularning jahon taraqqiyoti yutuqlari hamda dunyo axborot resurslaridan keng koʻlamda foydalanishlari, xalqaro hamkorlik va muloqotni rivojlantirishlari uchun shart-sharoit, imkoniyatlar yaratish bugungi kundagi ustuvor vazifalardan biriga aylangan.

Bugungi kunda ingliz tilini oʻrganishga boʻlgan talab va qiziqish shunchalik kuchaydiki, bogʻcha yoshidagi bolalardan boshlab, katta yoshdagi mutaxassislargacha ingliz tili oʻrganishga harakat qilayapti. Bu ijobiy holat, albatta, chunki, til oʻrganish oʻsha tilda gaplashuvchi davlatlar madaniyati, tarixi va urf-odatlarini oʻrganish uchun ham zamin yaratadi.

Ingliz tilini oʻrgatish orqali yosh avlodni ingliz xalqi madaniyati, tarixi, urf-odatlari bilan yaqindan tanishtirishni maqsad qilgan Mavluda Niyozova ochiq dars mashgʻulotida turli xil interaktiv metodlardan, innovatsion texnologiyalardan foydalandi. Dars davomida oʻquvchilar kichik guruhlarga ajratilib, turli xil topshiriqlar, tarqatma materiallar, savol-javoblar orqali bilimlari sinovdan oʻtkazildi. Ochiq dars mashgʻulotini maktabning izlanuvchan oʻqituvchilaridan Gulzira Yangiboyeva hamda Nafisa Yangiboyevalar kuzatib bordilar.

Dars jarayonida faol ishtirok etgan oʻquvchilar ragʻbatlantirildi. Ochiq dars mashgʻuloti juda qiziqarli va mazmunli oʻtdi. Ustoz dars oʻtishdan koʻzlagan maqsadiga erishdi.

Ch.Arslonova.