BOBUR NOMLI OVUL HUDUDIDAGI IShSIZ YoShLARGA EKIN YeRLARI AJRATIB BERILDI

Respublikamizning barcha hududlarida “Har bir yoshga bir gektar” loyihasi amalga oshirilmoqda. Ushbu loyiha doirasida Amudaryo tumanida ham fermer xoʻjaliklari hududidan yerlar ajratib berilib, yoshlarning bandligi taʼminlanmoqda.

Oʻzbekiston Respublikasi Prezidenti tomonidan yoshlar masalalariga bagʻishlab, joriy yilning 27-yanvar kuni oʻtkazilgan videoselektor yigʻilishida belgilab berilgan vazifalar ijrosini taʼminlash maqsadida Bobur nomli ovul hududidagi «Abdulla» fermer xoʻjaligida 16 nafar ishsiz yoshlarga yerlar boʻlib berilib, sertifikatlar tarqatildi. Ushbu yer ajratish va sertifikat tarqatish tadbirida tuman Ichki ishlar boʻlimi boshligʻi oʻrinbosari Nurbek Kamolov, Yoshlar ishlari agentligi tuman boʻlimi bosh mutaxassisi Sardor Kuraboyev, Bobur ovul fuqarolar yigʻini raisi Gulbahor Reyimova hamda ovuldagi ishsiz yoshlardan 16 nafari qatnashishdi.

Tadbirda masʼullar har bir qarich yerdan unumli foydalanish, intensiv usulda mahsulot yetishtirish hamda ishsiz yoshlar bandligini taʼminlash maqsadida “Har bir yoshga – bir gektar” loyihasi doirasida amalga oshirilayotgan ishlar haqida toʻxtalib oʻtdilar. Shundan soʻng, “Yoshlar daftari”ga kiritilgan ushbu yoshlarning har biriga 0,2 ga yer maydoni ajratildi.

Shu yerning oʻzida soha mutaxassislari tomonidan yoshlarga ertangi ekinlar turlari, ularni ekish va parvarishlash agrotexnikasi haqida batafsil tushunchalar berildi.  Shuningdek, yerga ishlov berish, yer unumdorligini oshirish va boshqalar toʻgʻrisida kerakli maʼlumotlar berib oʻtildi. Tuman Ichki ishlar boʻlimi boshligʻi oʻrinbosari Nurbek Kamolov bugungi kunda mamlakatimizda yoshlarga qaratilayotgan eʼtibor, yaratilayotgan imkoniyatlar, ayniqsa, ularni ish bilan taminlash borasida amalga oshirilayotgan chora-tadbirlar toʻgʻrisida keng toʻxtalib oʻtdi. Ayniqsa, hozirda turli loyihalar doirasida kreditlar ajratish, shu orqali yoshlarni ishbilarmonlik va kichik tadbirkorlikka jalb etish keng yoʻlga qoʻyilganini alohida taʼkidladi.

Maʼlumki, mamlakatimiz aholisi soni ortib borishi bilan bir qatorda uning mehnat bandligini taʼminlash masalasi ham dolzarb ahamiyat kasb etmoqda.

Keyingi yillarda davlatimiz rahbarining aynan ishsizlik muammosini hal etishga qaratilgan chora-tadbirlari bu borada qator ijobiy natijalar bermoqda. Ayniqsa, ishsiz yoshlarni ish oʻrinlari bilan taʼminlashga yoʻnaltirilgan ishlar natijasida yosh tadbirkorlar soni ortayotgani, ularning davlatimiz byudjetiga qoʻshayotgan hissasini alohida takidlash joiz.

Tadbir davomida suv, oʻgʻit hamda texnika yordami borasidagi muammolar muhokama qilindi. Oʻz navbatida yoshlar ham oʻzlariga ajratilgan yerlardan unumli foydalanib, makkajoʻxori ekishni, pishib yetilganidan soʻng ham don, ham yem-xashak mahsulotlarini xalqqa yetishtirib berishni rejalashtirishayotganini, shu bilan birga yaxshigina daromad topib, oʻz oilalariga moddiy yordam berishlarga imkoniyat yaratilganidan mamnunligini bildirishdi.

Ekin maydonlari ajratib berilib, bandligi taʼminlanayotgan ushbu yoshlar ham zimmalaridagi masʼuliyatni his qilgan holda mutasaddi tashkilotlar va xalqimiz ishonchini oqlab, oʻz oilasiga daromad keltirish bilan birga yurtimiz ravnaqiga munosib hissa qoʻshishadi.

Komronbek Kamolov.