TADBIRKORLIK ASOSLARI BOʻYIChA OʻQIGAN YoShLARGA SERTIFIKATLAR BERILDI

Maʼlumki, Prezidentimiz tomonidan 2020-yil 25-dekabr kuni oʻtkazilgan “Oʻzbekiston yoshlari forumi”da yoshlarga ijobiy motivatsiya, biznes va tadbirkorlik sohasida zarur bilim va malakalarni shakllantirish, shu orqali ularni tadbirkorlikka keng jalb etish va bandligini taʼminlash boʻyicha “Har bir tadbirkor – yoshlarga madadkor” tashabbusi qoʻllab-quvvatlandi.

Ushbu tashabbus  doirasida ishsiz va uyushmagan yoshlarni kasb-hunarga, tadbirkorlikka yoʻnaltirish, bu borada  koʻnikmalarga oʻqitishni tashkil etish asosida 1 nafar tadbirkorga  1 nafardan ishsiz yoshni biriktirish orqali mamlakatimizda 2021-yil davomida 500 ming nafar yoshni ish bilan taʼminlash vazifasi belgilab berilgan edi.

Ushbu maqsadni amalga oshirish uchun hududlarda yoshlar tadbirkorligini qoʻllab-quvvatlash va ularni kasb-hunarga oʻqitishning yangi tizimi joriy etildi.

Bugungi kunda tumanimizda ham yoshlarni ish bilan taʼminlash, ularga yaxshi mehnat sharoitlarini yaratish, kasb-hunarli qilish, taʼlim sifatini oshirish, davlat va jamiyatga yetuk kadrlarni yetishtirib berish maqsadida barcha imkoniyatlar safarbar etilib, yoshlarga zarur shart-sharoitlar yaratib berilmoqda.

Sektorlar va mahallalar kesimida “Yoshlar daftar”lari shakllantirilib, ishsiz va uyushmagan yoshlar mehnat bozorida talabi yuqori boʻlgan kasblarga oʻqitilmoqda.

Yaqinda tuman hokimligining majlislar zalida “Har bir tadbirkor – yoshlarga madadkor” tamoyili asosida “Yoshlar – 1+1” dasturi doirasida ishsiz, uyushmagan yoshlarni kasb-hunarga, tadbirkorlikka oʻqitish boʻyicha amalga oshirilayotgan ishlarga bagʻishlangan tadbir boʻlib oʻtdi. Unda tuman hokimining birinchi oʻrinbosari M.Temirboyev, yoshlar masalalari boʻyicha tuman hokimining oʻrinbosari M.Shermetov, tuman Prokuraturasi xodimlari, Yoshlar ishlari agentligi tuman boʻlimi boshligʻi J.Davletov, tuman savdo-sanoat palatasi boʻlimidan K.Eshmanov, aktsionerlik-tijorat “Mikrokreditbank”ning  tuman boʻlimidan N.Rasulov, “Xalq banki” tuman boʻlimidan R.Saparniyozov hamda bir guruh yoshlar va OAV vakillari ishtirok etdilar.

Tadbirda “Har bir tadbirkor – yoshlarga madadkor” tamoyiliga koʻra, “Yoshlar – 1+1” dasturi doirasida tumanda tashkil etilgan 48 soatlik oʻquv kursini muvaffaqiyatli tamomlagan yoshlarga sertifikatlar berildi.

Ishsiz va uyushmagan yoshlarni tadbirkorlik asoslariga oʻqitish boʻyicha tashkil etilgan mazkur oʻquv kursida tumanimiz mahallalarida shakllantirilgan “Yoshlar daftari”ga kiritilgan 52 nafar yosh tadbirkorlik va kasb-hunar koʻnikmalariga oʻqitilib, ularga masʼullar tomonidan sertifikatlar tantanali ravishda topshirildi.

Shuningdek, tadbirda yoshlarga oʻz tadbirkorligini boshlashlari uchun biznes-loyihalarini ishlab chiqish, kredit olish va kredit mablagʻlarini maqsadli, rejali sarflash boʻyicha mutaxassislar tomonidan zarur tushuncha va tavsiyalar ham  berildi.

Robiya YOʻLDOShEVA.