YIGʻILIShDA JINOYaTChILIKNING OLDINI OLISh MASALALARI MUHOKAMA ETILDI

Respublikamiz hududida jinoyatchilikka qarshi kurash, huquqbuzarlik holatlarining oldini olish borasida huquq-tartibot idoralari tomonidan keng jamoatchilik bilan hamkorlikda qator ishlar amalga oshirilmoqda. Davlatimiz rahbari tomonidan ham bu borada mahallalarda jinoyatchilikni jilovlash, jamoat xavfsizligi va fuqarolar osoyishtaligini taʼminlash, jinoyatchilikning oldini olishda “mahallabay” ish tashkil etish boʻyicha tegishli vazifalar belgilab berildi.

5-iyul kuni tuman Ichki ishlar boʻlimida ushbu topshiriqlar ijrosini taʼminlash, mahallalarda jinoyatchilikni jilovlash, jamoat xavfsizligi va fuqarolar osoyishtaligini taʼminlash, jinoyatchilikni oldini olish borasida tashkil qilingan amaliy ishlarni muhokama qilish maqsadida yigʻilish oʻtkazildi. Yigʻilishda sektorlar rahbarlari, tegishli davlat organlari va tashkilotlari masʼullari ishtirok etdilar.

Taʼkidlanganidek, har bir mahalla, oila va shaxs kesimida jinoyatchilikning sabablarini aniqlash, ularni bartaraf etish orqali huquqbuzarliklarning oldini olish va jinoyatchilikka qarshi kurashishga oid muammolarni bevosita joylarning oʻzida hal etish orqali samarali natijalarga erishiladi. Shuningdek, hududlarda jinoyatchilik ahvolidan kelib chiqib, har bir ovul va mahallani toifalarga ajratish hamda hokimlik, sektorlar va jamoatchilik bilan hamkorlikda «jinoyat oʻchoqlari»ni bartaraf etish uchun barcha zarur kuch va vositalarni jalb qilish bugungi kundagi eng dolzarb masalalardan biri hisoblanadi.

Yigʻilish davomida masʼullar Prezidentimizning shu yil  26-martdagi “Jamoat xavfsizligini taʼminlash va jinoyatchilikka qarshi kurashish sohasida ichki ishlar organlari faoliyatini sifat jihatidan yangi bosqichga koʻtarish chora-tadbirlari toʻgʻrisida”gi Farmoni jamoat xavfsizligini taʼminlash, huquqbuzarliklarning oldini olish va jinoyatchilikka qarshi kurashishning yaxlit tizimini shakllantirishning ustuvor yoʻnalishlarini ilgari surish bilan birga, ichki ishlar organlari tizimidagi islohotlarning yangi davrini boshlab berganiga alohida toʻxtalib oʻtdilar. Shu nuqtai nazardan jinoyatchilikka qarshi kurashish va huquqbuzarliklarning oldini olish borasida umumiy tartib-taomillar asosida yondashishga nisbatan, har bir hududning oʻziga xosligidan kelib chiqib ishni tashkil qilishning afzalligi haqida soʻz yuritildi.

Undan tashqari, hududlarda sodir etilayotgan huquqbuzarlik va jinoyatchilik holatlarining kelib chiqish sabablarini oʻrganish, “jinoyat oʻchoq”larini bartaraf etish va jamoat xavfsizligini taʼminlash borasidagi chora-tadbirlar hamjihatlikda amalga oshirilishi lozimligi, bu boradagi amaliy ishlarga keng jamoatchilik jalb etilishi kerakligi taʼkidlandi. Shuningdek, jamoat tuzilmalari va fuqarolarning barcha turdagi salbiy ijtimoiy illatlarga boʻlgan murosasizlik hissini shakllantirish, ularning jamiyat hayotidagi rolini oshirishga ham bu borada eʼtiborga olinishi lozim boʻlgan ishlardan biri sifatida qaralishi kerakligi aytilib, targʻibot-tashviqot va profilaktik tadbirlarni yanada kuchaytirish muhim ahamiyatga ega ekanligi eʼtirof etildi.

 Yigʻilishda jinoyatchilikni “mahallabay” jilovlash borasidagi chora-tadbirlarni amalda bajarishda “Temir daftar”, “Ayollar daftari” va “Yoshlar daftari” negizida mahallalar kesimida aniq maʼlumotlar bazasidan foydalanilayotgani, bu esa har bir muammoli shaxs bilan yakka tartibda manzilli ishlash imkonini berayotgani toʻgʻrisida soʻz yuritildi. Buning natijasida nizoli shaxslarni yarashtirish, ayollarga maʼnaviy va psixologik yordam koʻrsatish, ishsizlar bandligini taʼminlash, yaʼni muammoga qarab manzilli ishlash tizimi yoʻlga qoʻyilgani aytib oʻtildi.

Yigʻilish yakunida masʼullar tomonidan jinoyatchilik va huquqbuzarliklarning oldini olish, jamoat xavfsizligini taʼminlash, jamiyatda tinchlik va osoyishtalik oʻrnatish borasida tegishli chora-tadbirlar hamda vazifalar belgilab olindi.

Orifjon Qosimov, tuman IIB huquqbuzarliklar profilaktikasi boʻlinmasi boshligʻi.