PAXTA QABUL QILISh MASKANIDA YoNGʻINNING OLDINI OLISh BOʻYIChA OʻQUV-MAShQI OʻTKAZILDI

Bu yilgi paxta yigʻim-terim mavsumi boshlanishiga ham oz fursat qoldi. Erta bahorda yerga qadalgan chigit dehqonning mehnati bilan unib-oʻsib, shu kunlarda moʻl hosildan nishona bera boshladi. Hademay oppoq ochilgan paxtalar mohir terimchilar yordamida terilib, qabul maskanlariga keltiriladi va baland xirmonlar koʻtariladi. Mavsum arafasidagi ayni kunlarda paxta qabul qilish maskanlarida muhim palla oldidan tayyorgarlik ishlari qizgʻin tusga kirgan.

Amudaryo tumanida ham paxta yigʻim-terim mavsumini betalafot va samarali oʻtkazish borasida keng koʻlamli ishlar amalga oshirilmoqda. Jumladan, tasodifiy yongʻinlarning oldini olish va unga qarshi kurashishga alohida eʼtibor qaratilmoqda. Paxta qabul qilish maskanlaridagi yongʻin oʻchirish texnikalari koʻrikdan oʻtkazilib, shay holatga keltirilmoqda.

Yaqinda tuman Favqulodda vaziyatlar boʻlimi tomonidan Amudaryo paxta paxta qabul qilish punktida kelib chiqishi mumkin boʻlgan yongʻin holatlarining oldini olish boʻyicha oʻquv mashqlari oʻtkazildi.

Ayoqchi mahallasi hududida joylashgan ushbu maskanning umumiy yer maydoni 1 gektarga teng boʻlib, 17 ta bunt maydonchalarini oʻz ichiga olgan. Hududga kirish 2 ta asosiy darvoza orqali amalga oshiriladi. U yerda yongʻin oʻchirish avtomobillari harakatlanish imkoniyatiga ega. Maskanda bosh, maʼmuriy, maishiy va yordamchi xoʻjaliklar binolari, paxta, chigit va tayyor mahsulotlar omborlari, ustaxona, podstantsiya, tozalash, press va arra tsexlari, quritish barabanlari, oʻtxona, tarozixona, laboratoriya, qorovulxona, oshxona, pillaxona, koʻngilli yongʻindan saqlash deposi ham mavjud boʻlib, yongʻinga qarshi jihozlar bilan taʼminlangan.

Tadbir doirasida barchani hushyorlikka chorlovchi va yongʻin xavfsizligini targʻib qiluvchi eslatma va yoʻriqnomalar koʻrinarli joylarga oʻrnatildi. Mavsumni betalafot oʻtkazish va jalb qilingan ishchi-xizmatchilarning hushyorligini oshirish boʻyicha maslahatlar berildi. Yongʻin xavfsizligini taʼminlashda yongʻin xavfsizligi xizmatining jangovar shayligi muhim ahamiyatga ega boʻlganligi sababli maskandagi suv olish gidrantlari va hovuzlarning sozligi koʻrikdan oʻtkazildi.

Shundan soʻng, maskan hududida oʻquv mashqi mashgʻulotlari tashkil etildi.  Mashgʻulotlar davomida bunt ustiga paxtani ortayotgan transportyor lentasidan uchqun chiqishi natijasida 2 ta buntda shartli ravishda sunʼiy yongʻin keltirib chiqarildi. Yongʻinni oʻchirishga tuman Favqulodda vaziyatlar boʻlimidagi 3- va 4-sonli yongʻin qutqaruv qismidan 3 ta yongʻin oʻchirish ekipaji, maskanga qarashli koʻngillilardan tashkil qilingan 1 ta yongʻin oʻchirish ekipaji ishtirok etdi. Shunindek, qoʻshimcha ravishda tuman Obodonlashtirish boshqarmasi tomonidan 1 ta suv tashishga moʻljallangan avtotsisterna va boshqada hamkorlikdagi xizmatlar jalb qilindi. 

Undan tashqari, Taxiatosh tumanining uzoq davom etuvchi yongʻinlarni oʻchiruvchi tayanch maskani texnikalari toʻgʻrisida koʻrgazmali ravishda tushunchalar berildi. Mashgʻulotlarda shaxsiy tarkibning favqulodda yongʻin sodir boʻlganda uni tez va talafotsiz bartaraf etishga qaratilgan koʻnikmalari shakllantirildi.

Tabiat injiqliklarini yengib, ulkan mashaqqatlar evaziga yetishtirilgan va koʻpchilikning yordami bilan yigʻib-terib olingan paxta xirmonlarini tasodifiy yongʻinlardan asrash, imkon boricha shunday holatlar sodir boʻlishining oldini olish lozim. Paxta xomashyosi bilan bogʻliq obʼektlarda bu kabi tadbirlar, yongʻin oʻchirish amaliy taktik mashq va mashgʻulotlari oʻtkazilayotgani mavsumni betalofat oʻtkazishda muhim ahamiyat kasb etadi.

O. Xudoyberganova.