40-SONLI MAKTABDA BUTUNJAHON TOZALIK KUNI MUNOSABATI BILAN OChIQ DARS TAShKIL ETILDI

Har yili sentyabr oyining uchinchi shanba kunida butun dunyo boʻylab barcha mamlakatlarda tozalik kuni sifatida nishonlanaishi anʼanaga aylangan.

Butunjahon tozalik kuni - qattiq chiqindilar global muammosiga, shu jumladan dengiz qoldiqlari muammosiga qarshi kurashishga qaratilgan har yili oʻtkaziladigan global ijtimoiy harakatlar dasturidir. Tashkilotning shtab kvartirasi Estoniyaning Tallin shahrida joylashgan.

Butunjahon tozalik kunida dunyoning koʻpchilik mamlakatlarida chiqindilarni tozalash va atrof-muhitni obodonlashtirish bilan nishonlanadi. Atrof-muhitni tozalash tadbirlari deyarli har bir mamlakatda oʻtkaziladi.

Mazkur sana oldidan, yani 17-sentyabr kuni respublikamizning barcha maktablarida “18-sentyabr - Butunjahon tozalik kuni”ga bagʻishlab ochiq darslar oʻtkazildi. Oʻqituvchilar tomonidan oʻquvchilarga chiqindilarni taqsimlash va ularni qayta ishlash haqida tushunchalar berildi. Maqollarda aytilishicha “Uyi tozaga gard yuqmas, gard yuqsa ham, dard yuqmas”, “El sogʻligi – yurt boyligi”dir.

Tozalik va ozodalik azaldan xalqimizning milliy qadriyatlaridan biri sanaladi. Shu sababli hashar va obodonlashtirish tadbirlari doimo mamlakatimizning barcha hududlarini, shaharu qishloqlarini qamrab, tadbirlarda kattayu kichik birdek faol ishtirok etadi. Bularning barchasi koʻngillar obodligiga, aholi salomatligiga, yurtimiz yanada chiroy ochishiga xizmat qiladi.

Darvoqe, tozalik haqida oʻylash, qaygʻurish oiladan boshlanadi. Shu bois, tumanimizning har bir xonadonida, mahallalar guzarlarida har faslda tozalik, obodonlashtirish ishlari amalga oshiriladi. Ayni shu kunlarda esa mahalla va oilalarda kuzgi obodonlashtirish va tozalash tadbirlari amalga oshirilmoqda.

Mangʻit shahridagi 40-sonli umumtaʼlim maktabida esa 17-sentyabr kungi maʼnaviyat darsi mashgʻulotlarida barcha sinflarda “18-sentyabr – Butunjahon tozalik kuni”ga bagʻishlangan ochiq darslar tashkil qilindi. 1-B sinf rahbari Muyassar Kamolova, 2-A sinf rahbari Raʼno Jumanova, 8-A sinf rahbari Nigora Hamroyevalar tashkil qilgan darslar juda qiziqarli va munozaralarga boy boʻldi.

Butunjahon tozalik kuni munosabati bilan tashillashtirilgan ochiq darslardan keyin har bir oʻquvchi atrof-muhitni toza saqlash muhimligini teran anglab yetdilar va uylariga borganida esa ota-onalariga, aka-uka, opa-singillariga, doʻstlariga ochiq dars-mashgʻulotlarida koʻrganlarini va oʻrganganlarini hamda ona yurtimiz, oʻlkamizning tozaligiga eʼtibor berish muhimligi toʻgʻrisida gapirib berajaklarini bildirdilar.

Aslini olganda, har bir inson, yoshidan qatʼiy nazar, tozalikka rioya qilsa, atrof-muhitni obodonlashtirishga, koʻkalamzorlashtirishga oʻzini daxldor deb bilsa, hayotimizda sogʻlom turmush tarzini qaror toptirishda aslo muammo boʻlmaydi. Zero, dorilomon va farovon, obod hayot tozalik, sogʻlom hayot tarzi asosiga quriladi.

Risolat IBRAGIMOVA.