HUDUDLARDAGI YoNGʻINGA QARShI SUV OLGICh GIDRANTLARNING TEXNIK XOLATI OʻRGANILDI

Yongʻinga qarshi suv olgich, yaʼni gidrantlar yongʻin sodir boʻlganda yongʻin oʻchirish avtomashinalarni suv bilan taʼminlash va yongʻinlarni tezda bartaraf etishda muhim oʻrin tutadi. Kutilmaganda sodir boʻladigan ushbu ofatni bartaraf etish oson kechmaydi. Shu bois ularning texnik holati sozligiga alohida eʼtibor qaratilishi kerak.

Amudaryo tumani hududida jami 252 ta yongʻinga qarshi suv olgich gidrantlar mavjud. Joriy yilning 3-choragi davomida ushbu yongʻinga qarshi suv olgich gidrantlarning texnik holatini amalda oʻrganish boʻyicha Favqulodda vaziyatlar boʻlimining 3- va 4-sonli Kasbiylashtirilgan yongʻin-qutqaruv qismlari hamda Suv tarmoqlari korxonasi bilan hamkorlikda yoʻl xaritasi ishlab chiqilgan.

Mazkur yoʻl xaritaga asosan yongʻinga qarshi suv olgich gidrantlarning texnik holati tuman Favqulodda vaziyatlar boʻlimining 3- va 4-Kasbiylashtirilgan yongʻin-qutqaruv qismlari xizmatchilari, Suv tarmoqlari korxonasi xodimlari ishtirokida amalda oʻrganilib borilmoqda. Yongʻinlarning oldini olishga qaratilgan yoʻl xaritaga muvofiq davlat ahamiyatiga ega alohida obʼektlarda yongʻin xavfsizligini mustahkamlash, shuningdek yongʻin taktik-oʻquv mashgʻulotlar va ushbu obʼektlar rahbarlari oʻrtasida tushuntirish ishlarini tashkil etishga doir kompleks tadbirlar tashkil etilib, belgilangan vazifalar ijrosi taʼminlanmoqda.

Durunki mahallasida oʻtkazilgan navbatdagi oʻrganish ishlari davomida Pahlavon Mahmud koʻchasida joylashgan 8 dona yongʻinga qarshi suv olgich gidrantlarining texnik holati koʻrib chiqildi. Gidrantlarda aniqlangan nosozliklar  tuman Favqulodda vaziyatlar boʻlimi va Suv tarmoqlari korxonasi xodimlari tomonidan joyida bartaraf qilindi.

Natijada hudud aholisining kuz-qish mavsumida uzluksiz suv bilan taʼminlanishi yoʻlga qoʻyildi. Undan tashqari, mahalla hududidagi xonadonlarda yashovchi aholiga yongʻin xavfsizligi qoidalari, kutilmagan ofatlarning oldini olish, ehtiyot choralarini koʻrib borish, yongʻin xavfi mavjud boʻlgan maishiy texnika buyumlarini soz holatda ishlatish kerakligi toʻgʻrisida keng tushunchalar berildi.

Shuningdek, Beshtom mahallasining Beshtom aholi punktidagi mavjud 16 ta hamda Amudaryo gaz servis masʼuliyati cheklangan jamiyatiga qarashli hamda Amudaryo metan savdo masʼuliyati cheklangan jamiyatiga qarashli avtomobillarga siqilgan gaz quyish shoxobchasidagi yongʻinga qarshi suv olgichlarining texnik holati ham oʻrganildi.

Oʻrganishlar davomida yongʻin oʻchirish avtomashinalarining erkin xarakatlanishiga toʻsqinlik qiluvchi sunʼiy toʻsiqlar, yongʻinga qarshi suv olgich gidrantlarda nosozliklar aniqlandi. Barcha nosozliklar Suv tarmoqlari korxonasi xodimlari tomonidan taʼmirlandi. Sunʼiy toʻsiqlar olib tashlandi va yongʻinga qarshi suv olgich gidrantlar soz holatga keltirilib, uzluksiz suv kelishi taʼminlandi.

Ushbu hududda ham aholi honadonlarining yongʻinga qarshi holati koʻzdan kechirilib, mavjud muammolarni bartaraf etish boʻyicha yoʻl-yoʻriqlar berildi va yongʻinlarning, is gazidan zaharlanishning oldini olish kerakligi, aks holda xavfli hodisalarga sabab boʻlishi tushuntirildi.

Favqulodda vaziyatlar boʻlimining Kasbiylashtirilgan yongʻin-qutqaruv qismlari Yongʻin nazoratini va yongʻinlar profilaktikasini amalga oshirish, sodir boʻlishi mumkin boʻlgan yongʻinlarni oʻchirishni, yongʻin zonasida qolgan odamlarni hamda yuridik va jismoniy shaxslarning mol-mulkini qutqarishni amalga oshirishda masʼul hisoblanadi. Shu bois ushbu xizmat xodimlari tomonidan tuman hududida tilsiz yovning oldini olish maqsadidagi tashviqot tadbirlari muntazam ravishda oʻtkazilib boriladi.

M.Yusupov, tuman FVB 3-Kasbiylashtirilgan yongʻin-qutqaruv qismi boshligʻi. 

R.Kazakov, tuman FVB 4-Kasbiylashtirilgan yongʻin-qutqaruv qismi boshligʻi .