«MEHRJON” BAYRAMI KENG NIShONLANDI
Ajdodlarimizning asosiy bayramlaridan biri boʻlgan “Mehrjon” keyingi ming yil ichida alohida bayram sifatida kam nishonlansa-da, butunlay yoʻqolib ketmadi. “Mehrjon” kuz va hosil bayrami tusini oldi. Endilikda koʻpgina bayramlar kabi Mustaqillikdan soʻng, qadimiy “Mehrjon” mamlakatimizning barcha hududlarida noz-neʼmatlarga boy kuzning tarovatli lahzalarini madh etuvchi hosil bayrami sifatida keng nishonlanadigan boʻldi.
“Mehrjon” bayrami, ayniqsa, bolajonlar va oʻquvchi-yoshlar qalbida tabiatga mehr-muhabbat tuygʻusini uygʻotish, dehqonlarimiz tomonidan yetishtirilgan turli noz-neʼmatlarning inson hayotida oʻta muhim ekanligini anglatish xususiyatlari bilan nihoyatda sevimlidir. Bejizga Abu Rayhon Beruniy bobomiz “Qadimgi xalqlardan qolgan yodgorliklar” asarida “Mehrjon” soʻzini “Mehr - quyosh”, “jon-sevgisi”, yaʼni quyosh sevgisi degan maʼnolarda talqin qilmaganlar.
Choykoʻl ovulidagi 42-sonli umumtaʼlim maktabida boʻlib oʻtgan “Mehrjon” bayramida oʻquvchi-yoshlar ushbu bayramning tarixi, asrlar davomida paydo boʻlgan dehqonchilik taqvimi bilan bogʻliq xalq anʼanalari haqida maʼruzalar qildilar. Shundan soʻng, oʻquvchilar bu bayram bobodehqonlarimizning yil boʻyi yetishtirgan hosillarini moʻl-koʻl yigʻib olishayotgan palladagi tantanasi ekanligini sahna koʻrinishlari, kuz oylari taʼrifi haqidagi sheʼr va qoʻshiqlari, raqslari bilan ifoda etishdi.
Davraga noz-neʼmatlarga toʻla savat bilan Kuz faslining kirib kelishi barchaga xush kayfiyat bagʻishladi. Oʻquvchilar kuz neʼmatlariga toʻla dasturxondagi turli mevalar, poliz va sabzavot mahsulotlariga sheʼriy taʼriflar berdilar. “Kuz – Mehrjon – hosil bayrami” shiori ostida nishonlangan mazkur tadbirda oʻquvchi-yoshlar xalqimizning eng sevimli bobomeros qadriyatlaridan biri hisoblangan “Mehrjon” bayrami haqida oʻzlari yozgan sheʼr va hikoyalarini oʻqib berishdi. Shuningdek, oʻquvchilar bir-birlariga “Mevalarning foydali xususiyatlarini bilasizmi?” “Tumanimiz iqlim sharoitida qanday poliz va sabzavotlar yetishtiriladi?” “Kim oʻz oila tomorqasida ishlashni yaxshi koʻradi?” “Tomorqa – koni foyda, deganda nimani tushunasiz?” kabi savollar berishib, oʻzaro zakovat sinovlarida ishtirok etishdi.
Boʻlib oʻtgan “Mehrjon” bayrami oʻquvchi-yoshlarda ona tabiatga cheksiz mehr-muhabbat, bobodehqonlar va sohibkor bogʻbonlar mehnatiga nisbatan hurmat tuygʻularini yanada mustahkamladi.
Risolat IBRAGIMOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
