XALQARO QIZLAR KUNI MUNOSABATI BILAN BIR QATOR TADBIRLAR OʻTKAZILDI

Xalqaro qizlar kuniga 2011-yil, 11-oktyabrda Birlashgan Millatlar Tashkiloti Assambleyasida asos solingan. Butun jahon boʻyicha qizlarning kamsitilishi, ularning ijtimoiy muammolariga eʼtibor qaratish maqsadida har yili 11-oktyabrda keng nishonlanadi.

Qizlar hayotiga oid muammolarga asosan majburiy nikoh, ularning  taʼlim olish, ishlash huquqlarini cheklash, tibbiy xizmatlardan foydalanishlariga toʻsqinlik qilish, majburiy mehnat va zoʻrlash kiradi.

Dunyoda qizlarning taʼlim olishi uchun keng koʻlamli ishlar olib borilayotganiga qaramasdan, ularning aksariyati fuqarolik urushlari, kambagʻallik tufayli bunga qiyinchilik bilan erishmoqda. Bu kabi muammolar qoʻshni Afgʻoniston, shuningdek, Hindiston, Somali, Pokiston kabi davlatlarda uchraydi.

Ayni paytda dunyoda 15-19 yosh oraligʻidagi har toʻrt nafar qizdan biri ishlash, oʻqish va kasbiy tayyorgarlik imkoniyatiga ega emas.

Mamlakatimizda ham har yili 11-oktyabr – Xalqaro qizlar kuni keng nishonlanadi. “Qizlar haftaligi” doirasida joylarda turli tadbirlar oʻtkazilib, faol va tashabbuskor qizlar taqdirlanadi.

Bu sanani amudaryolik qizlar ham munosib kutib oldilar. Tumanning turli hududlarida, ovul va mahallalari hamda oʻquv muassasalarida koʻngilochar tadbirlar, ijodiy-madaniy targʻibot tadbirlari oʻtkazildi.

Xususan, “Barkamol avlod” markazida iqtidorli qizlar ishtirokida markaz oʻqituvchilari tomonidan mahorat darslari oʻtkazildi. Mahorat darslarida markaz direktori Xonimjon Rajabova ishtirok etib, bichish-tikish va yumshoq oʻyinchoqlar yasash boʻyicha iqtidorli qizlarning koʻnikma va mahoratlarini  sinovdan oʻtkazdi.

Shuningdek, markazda qizlar  tomonidan qoʻl mehnati bilan yasalgan buyumlar koʻrgazmasi tashkil etildi. Qizlarning noyob va innovatsion ixtirolari namoyish qilinib, mahorat darslari orqali markaz oʻqituvchilarining bilim va tajribalari amalda koʻrsatib berildi. Iqtidorli, ixtirochi qizlar ragʻbatlantirildi.

Xalq taʼlimi boʻlishi tasarrufidagi 76-sonli umumtaʼlim maktabining bir guruh aʼlochi va intizomli oʻquvchi-qizlari esa “Taraqqiyot koʻzgusi” gazetasi va Amudaryo televideniyesi birlashgan tahririyatida boʻlishib, Qoraqalpogʻiston Respublikasida xizmat koʻrsatgan jurnalist Robiya Yoʻldosheva bilan dildan, samimiy suhbatlashdilar.

Robiya Yoʻldosheva ularga mamlakatimizda yaratilgan shart-sharoitlar, qizlarning taʼlim olishlari, oʻz iqtidorlarini namoyon  etishda, sportda hamda jamiyatimizning boshqa yoʻnalishlarida katta yutuqlarga erishayotgan qizlar haqida, shuningdek Oʻzbekistonda gender tenglikni taʼminlash davlat siyosatida ustuvor masalalardan biri ekanligi xususida gapirib berdi.

Oʻz navbatida qizlar oʻzlari yozgan sheʼrlarini oʻqib berishdi, shuningdek, hayotda oʻz oʻrinlarini topish maqsadida hozirdan xarakat qilib, boʻsh vaqtlarida qoʻshimcha bilim olayotganliklari xususida toʻlqinlanib soʻzladilar. Oila tutumlari, qiz bolaning odob-axloqi xususida oʻz fikrlarini bildirdilar.

Xalqaro qizlar kuni munosabati bilan tuman hokimligining kichik majlislar zalida Senatorlar, mahalliy Kengash deputatlari va turli sohalarda faoliyat yuritayotgan rahbar ayollar uchrashuvi ham boʻlib oʻtdi. Unda ishtirokchilar tomonidan mamlakatimizda ayol-qizlarga koʻrsatilayotgan yuksak eʼtibor va ragʻbat alohida eʼtirof etilib, qizlarning kasb-kor egallashlari, oliy maʼlumot olishlari, oʻz biznes-rejalarini mustaqil ravishda amalga oshirishlari uchun davlatimiz tomonidan koʻrsatilayotgan amaliy yordam, qabul qilinayotgan qonunlar, qonunosti hujjatlari xususida toʻlqinlanib soʻz yuritdilar.

Shu bilan birga ular oʻzlari hayotda, siyosatda, oilada erishayotgan yutuqlari, tajriba va tashabbuslari yuzasidan oʻzaro fikr almashdilar. Ayniqsa, Oʻzbekistonda gender tengligini taʼminlash, shuningdek, har qanday zoʻravonlik holatlarining oldini olishga qaratilgan chora-tadbirlarni mamnuniyat bilan eʼtirof etdilar.

Shu kuni Mangʻit shahridagi 1-sonli va 30-sonli umumtaʼlim maktablarining bir guruh oʻquvchi-qizlari ishtirokida eng koʻp ish oʻrinlari yaratgan tadbirkor Tamara Yusupova rahbarligidagi “Tamara tekstil” masʼuliyati cheklangan jamiyatiga sayohat tashkil etildi.

Sayohat davomida oʻquvchi-qizlar eng zamonaviy bichish-tikish va toʻqish texnologiyalari bilan yaqindan tanishdilar. Shu bilan birga jamiyat rahbari Tamara Yusupova erishayotgan yutuqlar, tadbirkorning umummanfaatini koʻzlab amalga oshirayotgan va rejalashtirayotgan yangi loyihalarini qiziqish bilan kuzatdilar.

Xalqaro qizlar kuni munosabati bilan boʻlib oʻtgan barcha tadbirlar, iqtidorli qizlarni qoʻllab-quvvatlash, ularning qiziqishlari hamda qobiliyatlarini amalda namoyon etishga boʻlgan intilishlarini ragʻbatlantirishga qaratilgani bilan ishtirokchilarga zavq-shavq bagʻishladi.

Muyassar XALILLAYeVA.