MEHNATI QADR TOPGAN ODDIY DEHQON

Sobiq ittifoq davrida deyarli barcha oʻquv muassasalarida eng koʻrinarli joyga “Qishloqda yashaysanmi, texnikani oʻrgan!” degan chaqiriqnoma shior ilib qoʻyilardi. Yuqori sinf oʻquvchilari umumtaʼlim maktabini  tugatganlik haqidagi attestati bilan birga, albatta, traktorchi mutaxassisligi boʻyicha hujjatga ham ega boʻlishardi. Garchi otasi Xoʻjamurod ota Ashirov savdo sohasi xodimi boʻlsa-da, oiladagi kenja oʻgʻil Yoqubboy texnikaga ixlos qoʻydi. Maktabni tugatmasdanoq Yoqubboy  oʻzi boshqaradigan texnikani mukammal oʻrganishga qaror qildi. Toʻgʻri-da, texnikasi buzilsa, kimga yalinib yuradi? Agar uni miridan-sirigacha oʻrganib olsa, birinchidan, oʻziga  yaxshi, qolaversa, bajaradigan ishida sifat va samara  boʻladi.

Yoqubboy dilidagi ana shu orzusini amalga oshirish maqsadida oilasida hech kimning xayoliga kelmagan taʼlim dargohini tanladi. 1988-1989-yillarda Rossiyaning Volgograd viloyatidagi 2-sonli Kamishin nomli  hunar-texnika bilim yurtida tokarlik mutaxassisligi boʻyicha tahsil oldi. Oʻqishni  tugatib, xoʻjalikda ishchi sifatida ilk mehnat faoliyatini boshlagan Yo.Ashirov 1989-1992-yillarda harbiy xizmat burchini sharaf bilan ado etdi. Keyinchalik xoʻjalik ishchisi, Turkmaniston Respublikasining Toshhovuz shahridagi maxsus avtomatika korxonasida montyor, Qilichboy  xoʻjaligida va “Qori buva” fermer xoʻjaligida traktorchi vazifalarida halol va fidoyi mehnat qildi.

Agar insonda yuksak nazariy bilim boʻlsa-yu, unda qatʼiyat, oʻziga ishonch, tashkilotchilik va tadbirkorlik sifatlari boʻlmasa, oʻzidagi nazariy bilimni amalda qoʻllashga qodir shaxs sifatida namoyon boʻlolmaydi. Qishloq xoʻjaligi sohasi boʻyicha oliy maʼlumotga ega koʻplab mutaxassislarning oʻzlari tanlagan soha boʻyicha koʻngildagiday ish yuritolmasliklari boisi ham, nazarimda ana shundan.

Agar taʼbir joiz boʻlsa, Yo.Ashirov oʻz sohasining diplomsiz yetuk mutaxassisi, toʻgʻrirogʻi, olimi. Yer, texnika, boshqaruv ilmini oʻz hayotiy tajribalari orqali egallagan Yo.Ashirov 2009-2017-yillarda “Yoqubboy Ashirov” fermer xoʻjaligini mahorat bilan boshqardi. Fermer xoʻjaligi tasarrufidagi ekishlik maydonlaridan tortib, irrigatsiya tarmoqlari, har bitta texnika va agregatni mufassal nazoratdan oʻtkazdi, kamchiliklarini  toʻldirdi, nosoz texnikalarni oʻzi bosh boʻlib tuzatdi. Yerlarning meliorativ holatini yaxshilash maqsadida sugʻorish tizimlarini tozalab, zaxkashlar holatini yaxshiladi. Natijada “Yoqubboy Ashirov” fermer xoʻjaligida paxta va  boshqa qishloq xoʻjalik ekinlari hosildorligi oshib, tumandagi ilgʻor xoʻjaliklar qatoridan joy oldi.

Tinib-tinchimas va mehnatkash Yoqubboy Ashirov 2017-2020-yillarda Qilichboy muqobil mashina-traktor parki rahbari sifatida hududdagi fermer xoʻjaliklariga texnika xizmati koʻrsatish sifatini zamon talablari darajasiga koʻtardi. Bu esa dehqonchilik madaniyatini yuksaltirish imkonini berdi.

Ayni paytda MChJ shaklidagi “Amudaryotex” xorijiy korxonasi paxtachilik klasterining hududiy agronomi va “Yoqubboy Ashirov” fermer xoʻjaligi rahbari sifatida faoliyat olib borayotgan tajribali dehqon har kuni dalada. Nafaqat oʻzi rahbarlik qilayotgan fermer xoʻjaligi, balki paxtachilik klasteri bilan shartnoma tuzgan fermer xoʻjaliklari dalalarini kezib, 2021-yilgi paxta hosilining salmogʻini chamalaydi.

Oppoq marjon tizmalariday chanoqlardan toshib turgan hosil barakasidan mamnun, kayfiyati chogʻ Yoqubboyni mustaqillik bayrami arafasida, ertalabdan yoʻqlovchilar koʻp boʻldi. Birinchi boʻlib tuman hokimi Sultonboy Yoʻldashev, soʻng ketma-ket doʻstlari, yaqinlari “Shuhrat” medali bilan mukofotlanganini aytishganida avvalo bunga ishoninqiramadi. Xushxabar qanot yozib, bir zumda butun tumanga tarqalganida farzandlari internet tarmogʻida eʼlon qilingan Prezident Farmonini oʻqib berishdi.

Mustaqilligimizning 30 yilligi munosabati bilan Prezident Farmoniga koʻra, turli sohalarda faoliyat yuritayotgan yurtdoshlarimizdan bir guruhi faxriy unvon, orden va medallar bilan mukofotlangan edilar. Mukofotlanganlar orasida “Yoqubboy Ashirov” fermer xoʻjaligi rahbari Yoqubboy Ashirov ham bor edi.

– Hech kutmagandim, – quvonchini yashira olmaydi Yoqubboy Ashirov. – Internet tarmogʻida eʼlon qilingan Prezident Farmonini farzandlarim oʻqishayapti-yu, quloqlarimga ishonmayman. Axir men bir oddiy dehqon boʻlsam...

Oddiy dehqon! Yangilanayotgan Oʻzbekistonda mehnatkash insonning qadr-qimmati joyiga qoʻyilayotganidan nishona edi bu! Prezident Farmoniga koʻra, qilichboylik oddiy dehqon Yoqubboy Ashirov “Shuhrat” medali bilan taqdirlangani ham dehqonning halol va fidoyi mehnati sharaflangani, qadr topganining isboti.

Oʻzining yoshlik shijoatini, bilim va salohiyatini tumanimiz iqtisodiyotini rivojlantirish, qishloq xoʻjaligini, dehqonchilik madaniyatini yuksaltirishga bagʻishlagan Yoqubboy Ashirovga mukofot muborak, dalalar tomon qoʻyayotgan har bir qadamingiz barakali, hosil xirmonlaringiz sarbaland boʻlsin, deymiz.