VAKTsINA – NAJOT, UNGA MUNOSABAT QANDAY?

Qariyb 2-yilga yaqin vaqtdan beri dunyo xalqlariga achinarli talofatlar yetkazayotgan koronavirus infektsiyasiga qarshi kurash oqilona va samarali tashkil etilganligi bois, bizning mamlakatimizda boshqa mamlakatlarga solishtirganda  yoʻqotishlar ancha kam va kasallikka chalinganlarning askariyati tuzalib, sogʻlom hayotga qaytmoqda.

Bu borada koronavirus infektsiyasiga gumon qilinib, namuna olingan shaxslar hamda ushbu infektsiya tasdiqlangan bemorlarga birlamchi tibbiy – sanitariya yordamini koʻrsatish, tekshiruv natijalariga koʻra, ularga davo muolajalarini olib borish tizimli ravishda yoʻlga qoʻyildi.

Tibbiyotning tasdiqlashicha, ushbu xastalikni yengib oʻtishning yagona yoʻli - bu aholida jamoaviy immunitetni shakllantirishdir. Bunga esa kasallikka qarshi emlash orqali erishish mumkin.

Shunisi eʼtiborliki, davlatimizning gʻamxoʻrligi tufayli barcha sinovlardan, jahon Sogʻliqni saqlash tashkiloti roʻyxatidan oʻtgan vaktsinalar yurtimizga olib kelinib, dastlabki bosqichda aholi  bilan eng koʻp muloqot qiladigan ishchi-xizmatchilar, xavfli guruhga kiruvchi yaʼni, keksa va surunkali kasalliklarga chalingan fuqarolar emlangan boʻlsa, keyinchalik 18 yoshdan yuqori boʻlganlarni ommaviy emlash yoʻlga qoʻyildi.

Tumanimiz Tibbiyot birlashmasida ham bu juda muhim tadbirni namunali oʻtkazish uchun yetarli sharoit yaratildi va koʻngilli aholi oʻzi tanlagan vaktsina turi bilan emlanmoqda. Bunda avvalo tashrif buyuruvchilar tibbiy tekshiruvlardan oʻtkazilib, shifokorlar tavsiyasiga koʻra emlanmoqda. Buning uchun tuman Sanitariya-epidemilogik osoyishtalik va jamoat salomatligi boʻlimida vaktsina saqlash omborxonasida vaktsinalar talablar darajasida saqlanmoqda. Vaktsinalarni olib kelish va emlash punktlariga yetkazib berish uchun 1 ta maxsus jihozlangan avtomashina ajratilgan.

Shu kungacha tumanimizga 160 ming dozaga yaqin 6 turdagi vaktsinalar olib kelindi. Ushbu vaktsinalar bilan 18 yoshdan yuqori, emlanishi lozim boʻlgan aholining 72500 nafari qamrab olindi. Bu 59 foizni tashkil qiladi. Kunlik emlanayotganlar esa barcha bosqichlarda 1200-1300 nafarni tashkil etadi. Ushbu raqamlarning oʻziyoq tumanimiz aholisining oʻzlarini koronavirus infektsiyasidan himoyalashga jiddiy eʼtibor bermayotganini yaqqol koʻrsatib turibdi. Toʻgʻri, dunyoning boshqa davlatlariga qaraganda yurtimizda kunlik kasallikka chalinish va kasallikdan vafot etish koʻrsatkichlari past. Biroq bu bilan hech kim menga koronavirus infektsiyasi yuqmaydi, deya olmaydi. Yaʼni emlanmay turib hech kim himoyalana olmaydi.

Bu haqda gapirilganida baʼzilar emlanib ham kasallikka chalinayotganlar borligini iddao qiladi. Toʻgʻri, bunday holatlar oz boʻlsa-da uchrashini  hech kim inkor etmaydi. Biroq ularda kasallik yengil, yoʻqotishlarsiz kechayotgani, jiddiy asoratlar qoldirmayotgani – haqiqat.

Shuni unutmaslik kerakki, keyingi vaqtlarda koronavirus infektsiyasining avvalgilariga qaraganda ogʻir shtamlari tarqalmoqda. Bu tumanimiz aholisi hayotiga ham xavf solmasligiga hech kim kafolat bera olmaydi.

Kasallik tarqalishining, koronavirus infektsiyasi tufayli yaqinlarimizni yoʻqotishning oldini olishning yagona yoʻli - kasallikka qarshi emlanish ekanligini unutmasligimiz kerak. Chunki, yaqinlarimiz, oila aʼzolarimizning sogʻ-omon, baxtiyor yashashi uchun har birimiz masʼulmiz.

Emlanish har bir fuqaroni va uning yaqinlarini kasallikdan ishonchli himoya qiladi.

Shunday ekan, odamlar orasidagi vaktsinalar xususidagi beʼmani gaplarga emas, sogʻligʻimiz posbonlari boʻlgan shifokorlar tavsiyasiga koʻra emlanishga oshiqing, deb qolamiz.

Oygul RAJABOVA.