ShIFOKORLAR OILASI

Inson zoti jamiki mavjudotlar ichida eng aqllisi, farosatlisi, moʻʼtabari. U yaratuvchanlik qobiliyatiga ega, hayotni, jamiyatni oʻzgartirishga qodir. Turmushimizdagi jamiki qulayliklar, obodlik, farovonlik insonlar zakosi, fidoyi mehnati mahsulidir. Biroq, shunday bir soha xodimlari borki, ularning mehnatlarining hech bir qiyosi yoʻq, ular – odamlar dardiga darmon boʻluvchi tibbiyot xodimlaridir.

Issiq jon isitmasiz boʻlmaydi, deydi xalqimiz. Ha, sogʻligida muammo boʻlmagan, shifokorlar huzuriga najot istab bormagan odamni topish mushkul. Joni azobdagi odamga yordam bera olish, uni dard iskanjasidan qutqarish – chinakam fidoyilikdir.

Tuman Tibbiyot birlashmasiga qarashli shoshilinch tibbiy yordam boʻlimida qariyb oʻn yildan beri jarroh-shifokor boʻlib ishlab kelayotgan, shu davr mobaynida  ulkan tajriba toʻplab, murakkab jarrohlik amaliyotlarini ham muvaffaqiyatli ado etib, el olqishini olayotgan Sanjar Ollaberganov ham butun salohiyatini, iqtidorini kasbiga bagʻishlaganlarning biri.

 U oʻrta maktabni tugatgach, Toshkent Pediatriya tibbiyot oliygohining Nukus filialiga oʻqishga kirdi. Oliygohni tugatib, 1-yil muddat onkolog-shifokor boʻlib ishladi va sohasi boʻyicha chuqurroq bilim olish maqsadida Toshkent Tibbiyot oliygohida ordinaturada jarrohlik yoʻnalishi boʻyicha tahsil oldi. 2011-yildan beri tuman Tibbiyot birlashmasiga qarashli shoshilinch tibbiy yordam boʻlimida jarroh-shifokor. Kasbiga sidqidildan ixlos qoʻygan yigit oʻz ustida ishlashdan, oʻqib-oʻrganishdan erinmaydi. Shu tariqa sohaga joriy etilayotgan ilgʻor texnologiyalarni ham puxta oʻrgandi, nufuzli oliygohlarda malaka oshirdi va hozirgi kunda jarrohlik amaliyotlarida yangi texnologiyalarni muvaffaqiyatli qoʻllamoqda.

Bunday amaliyotlar bemorning tez va asoratsiz sogʻayib ketishida muhim rol oʻynaydi.

S.Ollaberganovning bu kasbga ixlos qoʻyishi bejiz emas. U butun umrini tibbiyot sohasiga bagʻishlagan tajribali jarroh Farhod Ollaberganovning ikki oʻgʻlining kattasi. Oilada ota-ona kasbining  nechogʻlik masʼuliyatli, mashaqqatli  va ayni damda sharafli ekanligini ham chuqur his qilib ulgʻaygan Sanjar otasiga munosib izdosh boʻlishga intildi.

Ularning oilasini shifokorlar oilasi, deb ham atash mumkin. Chunki Farhod Ollaberganovning Sanjardan tashqari uch nafar qizi oliy maʼlumotli shifokor boʻlib yetishishgan.

– Men otamdagi oʻta bosiqlik, mulohazalilik va kasbga ixlos kabi xislatlarni oʻzimda shakllantirishga doim harakat qilaman. Chunki bemorning ahvoliga qarab muomala qilish, uning koʻngliga yoʻl topa olish juda muhim. Bemorning injiqliklarini ham koʻtarishga, sogʻayib ketishiga ishontirib muolaja qilishga toʻgʻri keladi, – deydi Sanjar kulib.

– Shifokorlikni tanlaganingizdan afsuslangan vaqtlaringiz ham boʻladimi?

– Afsuslanmayman. Biroq bizning boʻlimga asosan, ogʻir ahvoldagi, shoshilinch yordamga muhtoj bemorlar olib kelinadi. Ularni qisqa muddatda oyoqqa turgʻizish qiyin. Ularning nega dorilaring kor qilmayapti, nega ogʻriqlarim qolmayapti, kabi savollari baʼzan dilimni ogʻritadi.

Shunday vaqtlarda hatto keksalikka qadam qoʻyganlarida ham kasbini ardoqlab, ishlab kelayotgan otamni oʻylayman. Bu menga dalda beradi.

Ha, hech kim qay makonda, qay manzilda, qanday oilada dunyoga kelishini oʻzi belgilamaydi.

S.Ollaberganovning tolei kulgani shuki, shifokorlar oilasida dunyoga keldi va oʻzining hayot yoʻllari ham qipchoqlik shifokor qiz Guljahon  Obdalova bilan bogʻlandi. Ular 2012-yilda ezgu orzu-umidlar bilan oila qurishdi. Hozir biri-biridan shirin uch nafar farzandlarning ota-onalari boʻlishdi.

– Ham oila, yosh bolalar bilan ish qiyinlik qilmaydimi? – qiziqib soʻrayman Guljahondan.

– Yaqin koʻmakchim – qaynonam bor, shuning uchun bamaylixotir ishlayman. Xudoga shukur, oilamiz tinch, ahil, – deydi quvonib Guljahon.

Tumanimizda sogʻlikni saqlash sohasi rivojiga oʻzlarining munosib hissalarini qoʻshib kelayotgan oilaviy shifokorlarni kasb bayramlari bilan qutlab, ishlarida muvaffaqiyatlar tilab qolamiz.

Oygul RAJABOVA.