ADLIYa BOʻLIMI TOMONIDAN XALQARO KORRUPTsIYaGA QARShI KURAShISh KUNI MUNOSABATI BILAN TADBIR TAShKIL ETILDI

Oʻzbekiston Respublikasi Konstitutsiyasi qabul qilinganligining 29 yilligi va Xalqaro korruptsiyaga qarshi kurashish kuni munosabati bilan tuman Adliya boʻlimi tomonidan aholi oʻrtasida turli targʻibot tadbirlari tashkil etildi. Tadbirlarda mamlakatimizdagi yangidan qabul qilinayotgan normativ-huquqiy hujjatlar, korruptsiyaga qarshi kurashish sohasida amalga oshirilayotgan ishlar bilan tanishtirilib, fuqarolarning huquqiy tushunchalari kengaytirildi.

Joriy yilning 2-dekabr kuni ham sana munosabati bilan tuman Mahalla va oilani qoʻllab-quvatlash boʻlimi binosida Adliya boʻlimi va Ichki ishlar boʻlimi masʼullari ishtirokida uchrashuv oʻtkazilib, huquqiy tushunchalar berildi.

Maʼlumki, Prezidentimizning 2018-yil 13-apreldagi “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida”gi Farmoniga koʻra yangidan qabul qilinayotgan qonunlar, normativ-huquqiy hujjatlarning mazmun-mohiyati va ahamiyatini tumanlar tuzilmalaridagi ijrochilarga yetkazish tuman adliya boʻlimlarining asosiy vazifalaridan biri hisoblanadi. Shuningdek, aholining huquqiy savodsizligiga barham berish borasida huquqni muhofaza qiluvchi va sud organlari bilan birgalikda tegishli chora-tadbirlarni amalga oshirish, «respublika – viloyat – tuman – mahalla» printsipi boʻyicha huquqiy targʻibot tadbirlarini tashkil etish kabilar ham boʻlim masʼullari tomonidan tashkil etiladi.

Bu boradagi vazifalar ijrosini taʼminlash maqsadida tuman Adliya boʻlimi tomonidan tumandagi davlat organlari va tashkilotlari bilan hamkorlikda aholining huquqiy ongi va huquqiy madaniyatini yuksaltirish, yangidan qabul qilinayotgan normativ-huquqiy hujjatlarni keng aholi qatlamiga yetkazish, ularning huquqiy bilimlarini oshirish maqsadida targʻibot tadbirlari amalga oshirib kelinmoqda.

Mazkur tadbir davomida Oʻzbekiston Respublikasi Konstitutsiyasi, Oʻzbekiston Respublikasining “Korruptsiyaga qarshi kurashish toʻgʻrisida”gi, “Odam savdosiga qarshi kurashish toʻgʻrisida”gi, “Huquqbuzarliklar profilaktikasi toʻgʻrisida”gi Qonunlari, Oʻzbekiston Respublikasi Jinoyat kodeksi, Maʼmuriy javobgarlik toʻgʻrisidagi kodekslar yuzasidan tushuntirishlar berildi. Shuningdek, korruptsiya har bir mamlakat ijtimoiy-iqtisodiy taraqqiyoti uchun ulkan tahdid ekanligi, u jamiyatning maʼnaviy-axloqiy asoslarini yemirishi, odamlarning davlatga, boshqaruv idoralariga ishonchini soʻndirishi, fuqarolarning jamiyat va davlat ishlarini boshqarishdagi ishtirokiga salbiy taʼsir koʻrsatishi taʼkidlandi.

Shu bilan birgalikda ijro intizomini mustahkamlash, berilgan vazifa va topshiriqlarni sidqidildan bajarish bugungi kunning muhim talablaridan ekanligi aytildi. Ayniqsa, jamiyatda korruptsiyaga nisbatan murosasiz munosabatni shakllantirish, davlat va jamiyat hayotining barcha sohalarida korruptsiyaning oldini olishga doir chora-tadbirlarni amalga oshirish, korruptsiyaga oid huquqbuzarliklarni oʻz vaqtida aniqlash, ularga chek qoʻyish, ularning oqibatlarini, ularga imkon beruvchi sabablar va shart-sharoitlarni bartaraf etish, korruptsiyaga oid huquqbuzarliklarni sodir etganlik uchun javobgarlikning muqarrarligi printsipini taʼminlash borasidagi vazifalarga alohida toʻxtalib oʻtildi.

Uchrashuvda ishtirokchilarni qiziqtirgan savollarga toʻliq, batafsil tushuntirishlar berildi hamda ularning bu toʻgʻrisidagi fikr-mulohazalari, takliflari ham eshitildi.

Jamshid Bekmibetov, tuman Adliya boʻlimi mutaxassisi.