“Temir daftar”dagi oilalarga Prezident Qaroriga koʻra bir martalik moddiy yordam koʻrsatildi

Prezidentimizning 2021-yil 21-dekabrdagi “Aholining kam taʼminlangan qatlamlarini qoʻllab-quvvatlash va ijtimoiy himoyasini yanada kuchaytirishga oid qoʻshimcha chora-tadbirlar toʻgʻrisida”gi Qarori ijrosini taʼminlash doirasida Amudaryo tumanidagi 49 ta ovul va mahalla fuqarolar yigʻinlarida 4 ta sektor rahbarlari ishtirokida amaliy ishlar qilindi.

Oʻzbekiston Respublikasi Prezidenti Shavkat Mirziyoyevning mazkur Qarori azaliy bobomeros qadriyatlarga sadoqat, yuksak insoniylik sifatlarini oʻzida mujassam etgan mehr-oqibat tuygʻularining hamisha ustuvorligini ifoda qilgani bilan xalqimiz uchun muhim ahamiyat kasb etdi.

Davlatimiz rahbarining mazkur Qaroriga koʻra, mamlakatimizda ijtimoiy himoyaga muhtoj, ehtiyojmand oilalarning turmush sharoitlarini yaxshilashga qaratilgan chora-tadbirlarni davom ettirish, ularni ijtimoiy va moddiy jihatdan qoʻllab-quvvatlash maqsadida 2021-yil davomida “Temir daftar”ga kiritilgan oilalarga, 18 yoshga toʻlmagan farzandlari bor boquvchisini yoʻqotganlik pensiyasi yoki nafaqasini oluvchi oilalarga, shuningdek, 18 yoshgacha boʻlgan bolalari uchun nogironlik nafaqasini oluvchi oilalarga 800 ming soʻmdan bir martalik moddiy yordam koʻrsatilishi belgilangan edi.

Amudaryo tumani Ichki ishlar boʻlimi boshligʻi, 3-sektor rahbari Ulugʻbek Xudoyberganov oʻzi rahbarlik qilayotgan sektor hududidagi 12 ta ovul va mahalla fuqarolar yigʻinlarida yashovchi “Temir daftar” roʻyxatida turgan, 18 yoshga toʻlmagan farzandlari bor, boquvchisini yoʻqotgan, ehtiyojmand, yordamga muhtoj oilalarda boʻlib, ularni Yangi yil bayrami bilan tabrikladi va Prezidentimiz Qaroriga koʻra, 800 ming soʻmlik bir marta beriladigan mablagʻlarni oʻz egalariga topshirdi.

Shuningdek, sektor rahbari hududlardagi ovul va mahalla fuqarolar yigʻinlarida istiqomat qiluvchi, 18 yoshgacha bolalari uchun nogironlik nafaqasi oluvchi oilalarga ham tashrif buyurib, imkoniyati cheklangan, koʻngli kemtik bolalar holidan xabar olib, ularga yangi yil sovgʻalari bilan birga 800 ming soʻmlik bir martalik moddiy yordam pullarini topshirdi.

Prezidentimiz Qaroriga koʻra amalga oshirilgan mazkur tadbir davomida moddiy yordam pullarini haqiqiy egalariga oʻz vaqtida yetkazib berishni taʼminlash maqsadida jarayonga hududlardagi profilaktika inspektorlari jalb etildi.

Yangi yil bayrami arafasida amalga oshirilgan bu xayrli tadbir hayotning bemavrid sinovlari tufayli biri otasidan, yana birlari onasidan ayrilib, koʻngillari yarim boʻlib qolgan bolalarga, shuningdek, nogironligi boʻlgan bolajonlarga xush kayfiyat, quvonch bagʻishladi. Ularning qalblarida ertangi kunga ishonch, oʻzaro mehr-oqibat, davlatimizning yuksak insonparvarlik tamoyillariga asoslangan ijtimoiy-maʼnaviy siyosatiga hurmat tuygʻulari yanada mustahkamlandi. Zero, inson va uning orzu-intilishlari, hayoti mamlakatimizda hamisha ulugʻ va qadrlidir.

Risolat IBRAGIMOVA.