Yoshlar yetakchilari yangilanayotgan Oʻzbekistonning obroʻsi, nufuzini oshirishga hissa qoʻshadi

Mamlakatimizda oʻsib kelayotgan yosh avlodning sifatli taʼlim olishi, ilmli, salohiyatli boʻlib voyaga yetishlariga sharoit yaratishga doir  koʻpgina islohotlar amalga oshirilayotir.

Joriy yilning 19-yanvarida Prezidentimiz qabul qilgan “Mahallalarda yoshlar bilan ishlash tizimini  tubdan takomillashtirish chora-tadbirlari toʻgʻrisida”gi Qaroriga muvofiq endilikda yoshlar muammolari  bevosita mahallalarda hal etish, taʼlim muassasalarida maʼnaviy-maʼrifiy va tarbiyaviy ishlarning samaradorligini oshirish maqsadida har bir shaharcha, ovul, mahallalarda yoshlar yetakchisi lavozimi joriy etildi.

Yoshlar yetakchilarining zimmasiga mahallalarda yoshlarning boʻsh vaqtlarini mazmunli tashkil etish, milliy xalq oʻyinlari va sport turlarini yoshlar orasida ommalashtirish, Besh muhim tashabbus loyihalari, yoshlar festivallari va boshqa madaniy-maʼrifiy tadbirlarni amalga oshirish, yoshlarning ijtimoiy faolligini oshirish, iqtidorli, isteʼdodi va tashabbuslarini ragʻbatlantirish, ularning intellektual jihatdan kamol topishini taʼminlash kabi masʼuliyatli vazifalar yuklangan.

Shuningdek, huquqbuzarlik sodir etishga moyilligi boʻlgan, jazoni ijro etish muassasalaridan ozod etilgan yoshlarning ijtimoiy-pedagogik reabilitatsiya qilinishi va moslashuviga koʻmaklashadi.

Mahallalarda joriy etilgan yoshlar yetakchisi lavozimiga tayinlanganlar hududlarda yoshlarning  tadbirkorlik gʻoyalarini amalga oshirishda, ular faoliyatiga kredit, subsidiya va boshqa yordam choralarini jalb qilishda hokim yordamchisi bilan hamkorlik qiladi. Yetakchi tavsiyasi asosida moddiy ahvoli qiyin yoshlarni qoʻllab-quvvatlash uchun bir martalik moddiy yordam, ijtimoiy himoyaga muhtoj yosh oilalarga 12 oygacha turar joy ijarasi kompensatsiyasini qoplash uchun subsidiya, psixologik masalahatga muhtoj yoshlarga ixtisoslashgan nodavlat notijorat tashkilotlari hamda nodavlat taʼlim tashkilotlari tomonidan pullik psixologik xizmat koʻrsatilishi bilan bogʻliq xarajatlarni qoplash uchun subsidiya, ijtimoiy himoyaga muhtoj yoshlarning safarbarlik chaqiruvi rezervidagi xizmatni oʻtash badalini toʻliq qoplash uchun subsidiya, mamlakatimizdagi professional va oliy taʼlim muassasalarida taʼlim olayotgan ijtimoiy himoyaga muhtoj iqtidorli yoshlarning toʻlov-kontrakt summasining 50 foizigacha qoplash uchun subsidiya ajratilishi mumkin.

Qarorda qayd etilishicha, mahallada yoshlar siyosatini samarali amalga oshirishga erishgan yoshlar yetakchilari har chorak yakunida moddiy-maʼnaviy ragʻbatlantiriladi. “Yangi Oʻzbekiston islohotchisi” koʻkrak nishoni bilan ham oʻz faoliyatini namunali tashkil etgan, oʻzining shaxsiy fazilatlari bilan boshqalarga oʻrnak boʻlayotgan yetakchilar taqdirlanadi.

Yoshlar bilan ishlash tizimidagi bu oʻzgarishlar yangilanayotgan Oʻzbekistonning nufuzini yana ham oshirishga xizmat qiladi.

Jasur DAVLETOV, Yoshlar agentligi tuman boʻlimi boshligʻi.