KOʻP XONADONLI UYLARDA YaShOVChI AHOLIGA QULAY ShAROITLAR YaRATILMOQDA

Tuman uy-joy kommunal xizmat koʻrsatish boʻlimi tomonidan koʻp xonadonli uylarda yashovchi aholiga qulay shart-sharoitlar yaratish maqsadida tizimli ishlar olib borilmoqda.

Amudaryo tumanida jami 52 ta koʻp xonadonli uy-joylar mavjud boʻlib, shundan 3 tasi Jumurtov shaharchasida, 1 tasi Qipchoq shaharchasida, 4 tasi Tosh yop ovulida, qolgan 44 tasi Mangʻit shahrida joylashgan. 2015-2020-yillar oraligʻida 10 ta koʻp xonadonli uylar yangidan qurilgan. Mazkur koʻp xonadonli uy-joylarga namunali xizmat koʻrsatish maqsadida 2017-yil 2 ta  “Mangʻit bino taʼmir”, “Amudaryo bino taʼmir” xususiy uy-joy mulkdorlar shirkatlari va 2021-yilda “Man bino taʼmir” MChJ tashkil qilindi. Bugungi kunda shirkat tomonidan koʻp xonadonli uy-joylardagi muammolarni oʻrganish, ularni hal etish choralarini koʻrish, aholidan badal mablagʻlarini yigʻish ishlari olib borilib, tijorat banklarnining kredit mablagʻlarini oʻz vaqtida soʻndirish ishlari amalga oshirilmoqda.

Vazirlar Mahkamasining Qarori asosida 2019-yildan yangi tizim joriy qilindi, yaʼni, aholidan yigʻiladigan majburiy badal mablagʻlarini undirish billing tizimi - “Obod uy” elektron dasturi orqali amalga oshirilmoqda. Bu tizim koʻp xonadonli uylarni saqlash bilan bogʻliq xarajatlar boʻyicha hisob-kitob ishlarini yuritishda ochiqlik va shaffoflikni taʼminlaydi. Hozirgi paytda maʼlumotlar bazasi shakllantirilmoqda.

Mazkur  tizimda tushumni undirish avtomatik tarzda olib boriladi va aholi toʻlovlarni onlayn tarzda amalga oshiradi. Yaʼni, xonadon egasining telefon raqami bazaga kiritiladi, fuqaro toʻlov tizimlari orqali toʻlash imkoniyatiga ega boʻladi. 

Tumanda 42 ta koʻp xonadonli uylarning taʼmirtalab boʻlgan tom qismi yangidan zamonaviy profnastil bilan yopilib, axolining kuz-qish mavsumidan betalofat oʻtishiga sharoit yaratildi.  Shuningdek, 42 ta koʻp xonadonli uyarning old tomoniga beton qoplamali yoʻlaklar qurildi. 15 ta koʻp xonadonli uylarga yangidan umumfoydalanish hojatxonalari qurib berildi. 18 ta koʻp xonadonli uylarning old tomoniga bolalar maydonchasi tashkil qilinib, yonida 1 tadan bostirma, 41 ta koʻp xonadonli uylarning kirish yoʻlaklariga temir eshiklar oʻrnatildi.

Bundan tashqari, tijorat banklari tomonidan imtiyozli kredit mablagʻlari ajratilib, 41 ta uyning fasad qismlarida, 29 ta uyning kirish yoʻlaklarida taʼmirlash ishlari amalga oshirildi. 2021-yil davlat dasturi asosida 3 ta qoʻp xonadonli uy-joylarning tom qismida mukammal taʼmirlash ishlari bajarildi.

Sanjar Murodov, tuman uy-joy kommunal

xizmat koʻrsatish boʻlimi boshligʻi.