ASKARLAR IMTIYoZLI TAVSIYaNOMA UChUN TEST TOPShIRDI

Harbiy xizmatni oʻtash har bir oʻgʻlon uchun muqaddas burch va gʻururdir. Bu yoʻnalishda vatan himoyachilariga, jumladan muddatli harbiy xizmatni oʻtayotgan askarlarga qator imkoniyat va imtiyozlar yaratilgan. Muddatli harbiy xizmatni oʻtayotgan harbiy xizmatchilarga Oʻzbekiston Respublikasi oliy taʼlim muassasalariga oʻqishga kirish uchun tavsiyanomalar berish tartibi joriy qilingani ham shular jumlasidandir.

Amudaryo muhandislik texnikumida tumandagi Davlat xavfsizlik xizmati chegara qoʻshinlariga qarashli harbiy qismda muddatli harbiy xizmat burchini oʻtayotgan yigitlar uchun test sinovlari oʻtkazildi.

Test jarayonlari Davlat test markazining Qoraqalpogʻiston Respublikasi boʻlimi, Amudaryo tumani hokimligi, Yoshlar ishlari agentligi tuman boʻlimi bilan hamkorlikda tashkil qilindi.

Muddatli harbiy xizmatni oʻtayotgan harbiy xizmatchilarga Oʻzbekiston Respublikasi oliy taʼlim muassasalariga oʻqishga kirish uchun tavsiyanomalar berish tartibi toʻgʻrisidagi nizomga muvofiq test jarayoni adolatli va shaffof tazda oʻtkazildi.

Shu oʻrinda qayd etish lozimki, tavsiyanomalar Oʻzbekiston Respublikasi Qurolli Kuchlari safida muddatli harbiy xizmatni oʻtab boʻlgan, jangovar va maʼnaviy-maʼrifiy tayyorgarlik boʻyicha yuksak natijalarga erishgan, zaruriy bilim saviyasiga ega, namunali harbiy intizomini namoyon etgan eng munosib harbiy xizmatchilarga beriladi.

 Amudaryo muhandislik texnikumi binosida boʻlib oʻtgan mazkur test sinovida muddatli harbiy xizmatchilarning jangovar, maʼnaviy-maʼrifiy tayyorgarlik dasturlarini oʻzlashtirganlik darajasi, matematika, fizika fanlari boʻyicha bilimi, shuningdek, mantiqiy fikrlash qobiliyati sinovdan oʻtkazildi.

Kelgusida aniq maqsadlarni oldiga qoʻygan oʻgʻlonlar berilgan imkoniyatdan unumli foydalanishga, bor bilimini ishga solib, berilgan savollarga toʻgʻri va aniq javob berishga harakat qilishdi.

Davlat test markazining Qoraqalpogʻiston Respublikasi boʻlimi xodimlari test jarayoniga alohida masʼuliyat va javobgarlik bilan yondashib, zamonaviy videokuzatuv moslamalaridan foydalangan holda imtihonning shaffof va haqqoniy oʻtishini kuzatib bordilar.

Yana bir jihat, imtiyozli tavsiyanoma berishda askarlarning harbiy xizmat mobaynida jangovar, maʼnaviy-maʼrifiy tayyorgarlik fanlaridan olgan baholari, hizmatda erishgan yutuqlari, namunali hulqi, vazifalarni alo darajada bajarganligi ham eʼtiborga olinadi.

Oʻzbekiston Respublikasi Qurolli Kuchlari safida muddatli harbiy xizmatni oʻtab, tavsiyanomaga ega boʻlgan fuqarolar respublikaning oliy harbiy taʼlim muassasalaridagi tegishli taʼlim yoʻnalishlariga oʻqishga kirishda test sinovlari natijalariga koʻra oʻzlari toʻplagan ballarining 50 foizi miqdorida qoʻshimcha ball shaklidagi imtiyozga ega boʻladilar. Qolaversa, oliy harbiy taʼlim muassasalaridan tashqari respublikaning barcha oliy taʼlim muassasalari bakalavriatura yoʻnalishlariga oʻqishga kirish uchun qabul parametrlaridan tashqari ajratiladigan alohida qabul koʻrsatkichlari doirasida tanlovda ishtirok etish huquqiga ega boʻladilar.

Quroli Kuchlarimiz safida xizmat qilayotgan har bir oʻgʻlon bizning faxrimiz va gʻururimizdir. Oʻz yigitlik burchini oʻtab, oliy taʼlim muassasalarida oʻqishni davom ettirayotgan yoshlar esa yurt taraqqiyoti va xalq farovonligiga yanada koʻproq hissa qoʻshishi shubhasiz.

Fotima Eshimbetova