19-20-fevral kunlari “Yashil makon” aktsiyasi doirasidagi tadbirlar uyushqoqlik bilan oʻtkazildi
Bahor fasli kirib kelishiga ham sanoqli kunlar qoldi. Bunday vaqtlarda inson va tabiatning bir-biriga qanchalik uygʻunligi yaqqol seziladi. Qishdan soʻng uygʻongan borliq yana oʻz tarovatini namoyon etgani kabi bahor nafasi sezila boshlagan ilk kunlardanoq odamlar yaratuvchanlik va bunyodkorlik ishtiyoqi bilan ekish, obodonlashtirish va koʻkalamzorlashtirish ishlariga kirishadi.
Ayniqsa, xalqimiz ongu tafakkuri, turmush tarziga singib ketgan qadriyatlarga koʻra, erta bahordan hasharlar uyushtirilib, ariq-zovurlar tozalanadi, hovli-joylar sarishtalanadi, daraxtlarga shakl berilib, yangi umid va orzular bilan nihollar oʻtqaziladi.
Prezidentimiz tashabbusi asosida obodonlashtirish va koʻkalamzorlashtirish, koʻchat ekish ishlarini uyushqoqlik bilan, tizimli ravishda tashkil qilish maqsadida mamlakatimizda 1-martdan boshlab “Yashil yillik” umummilliy tadbiri boshlanadi. Tadbir doirasida Amudaryo tumani boʻyicha jami 724 ming tupdan ortiq mevali va manzarali daraxt koʻchatlarini ekish rejalashtirilgan.
Mazkur tadbir oldidan yerlarni koʻchat ekishga tayyorlash va hududlarni obodonlashtirish maqsadida 19-20-fevral kunlari Respublikamizning barcha hududlarida, shu jumladan, tumanimizda ham “Yashil makon” aktsiyasi uyushqoqlik bilan oʻtkazildi.
Choykoʻl ovuli ahli ham tumanning boshqa hududlari aholisi singari erta tongdan hasharga chiqdilar. “Yashil makon” aktsiyasi doirasida hudud faollari va koʻngillilar ishtirokida ovul fuqarolar yigʻini binosi oldida obodonlashtirish va koʻchat ekish tadbirlari oʻtkazildi.
Tuman hokimi oʻrinbosarlari, Mahalla va oilani qoʻllab-quvvatlash boʻlimi masʼullari hasharchilarga yordamga keldilar. Aktsiya doirasida birgina Choykoʻl ovulida 250 tupdan ortiq mevali daraxt koʻchatlari, mingdan ortiq manzarali daraxt qalamchalari oʻtqazildi. Ayniqsa, aktsiyada ovul yoshlari uyushqoqlik bilan ishtirok etib, hasharda jonbozlik koʻrsatdilar. Ularning yordami bilan 500 metrdan ortiq uzunlikda ariq va zovurlar tozalanib, 40 tonnadan ortiq maishiy chiqindilar tashkiliy ravishda chiqarib tashlandi. Tushlik paytida aktsiya ishtirokchilari uchun dasturxon yozilib, osh tortildi.
Oʻzbekiston Respublikasi Prezidentining 2022-yil 17-fevral kungi “2022-yilgi Navroʻz umumxalq bayramiga tayyorgarlik koʻrish va uni oʻtkazish toʻgʻrisida”gi qarorida ham mamlakatimizda boshlangan “Yashil makon” umummilliy loyihasida belgilangan tadbirlarni uyushtirish, Navroʻz umumxalq bayrami arafasida respublikamizning barcha hududlarida, har bir koʻcha, mahalla, tuman va shaharlarda obodonchilik va koʻkalamzorlashtirishga qaratilgan umumxalq hasharlarini oʻtkazish vazifasi topshirilgan edi.
19-20-fevral kunlari “Yashil makon” aktsiyasi doirasidagi tadbirlar Amudaryo tumanining Toʻlqin ovulida ham uyushqoqlik bilan oʻtkazildi. Tozalash va obodonlashtirish ishlariga tuman “Toza hudud” korxonasi va Obodonlashtirish boshqarmasi ishchi-xizmatchilari hamda texnikalari ham jalb qilindi. Ovul nuroniylari hasharga bosh-qosh boʻlib, mevali va manzarali daraxt koʻchatlarini ekish ishlarini boshlab berdilar. Tadbirlarga tuman hokimining oʻrinbosarlari, tegishli muassasa va korxona-tashkilotlar masʼullari va xodimlari ham oʻz hissasini qoʻshdilar. Ayniqsa, ovul yoshlari alohida kuch-gʻayrat bilan mehnat qilib, oʻz mahallasi va koʻchasining obod va fayzli boʻlishiga munosib hissa qoʻshdilar.
“Yashil makon” aktsiyasi doirasida birgina Toʻlqin ovulida 300 tupdan ziyod daraxt koʻchatlari ekildi. Ariq va zovurlar tozalanib, maishiy chiqindilar chiqarib tashlandi. Daraxt va butalar oqlanib, shakl berildi. Bu ishlarda jami 100 nafardan ziyod aholi ishtirok etdi.
Tushlik paytida hasharchilarga issiq ovqat berilib, sanʼatkorlar ijrosida kuy-qoʻshiqlar yangradi. Bir soʻz bilan aytganda, bahor fasli kirib kelishiga sanoqli kunlar qolganda tashkil qilingan ushbu aktsiya doirasidagi tadbirlar bayram tusini oldi.
Shu oʻrinda aytish kerakki, “Yashil makon” aktsiyasi va “Yashil yillik” umummilliy tadbirlari nafaqat oʻzimiz uchun, balki kelajak avlod uchun ham gʻamxoʻrlikning bir koʻrinishidir. Zero, tozalik va ozodalik bor joyda fayz-u baraka boʻladi. Yashil makonlar va koʻkalamzor hududlar esa sogʻlom turmush kechirishning eng asosiy omillaridan biridir.
Tuman hokimligining axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
