Baxtli qoʻsha-qariganlar

Xalqimizda yoshi ulugʻ insonlar yashaydigan oilalarga hurmat va havas bilan qarashdek yaxshi odat bor. Chunki nuroniy otaxonlar, onaxonlar yosh avlodga mehr-oqibatdan saboq berib, oilalarda totuvlik, jamiyatda barqarorlik muhitini mustahkamlashga munosib hissa qoʻshayotir. Shu boisdan ham mamlakatimizda keksalarning hayot darajasi va sifatini yaxshilash, ularni moddiy, maʼnaviy qoʻllab-quvvatlash koʻlamini kengaytirish, yoshi ulugʻ insonlarni eʼzozlash milliy qadriyatlarimizdandir.

Tumanimizda ham koʻpchilikka oʻrnak boʻlgulik ibratli hayot yoʻlini bosib oʻtib, halol mehnati bilan obroʻ-eʼtibor qozongan, mahalladoshlari, qoʻni-qoʻshnilari hayoti ham tinch-osoyishtaligiga hissa qoʻshib kelayotgan namunali oilalar koʻp. Mangʻit shahrining Durunki mahallasida isiqomat qiluvchi Fayzulla Abdullayev va ayoli Toʻxtajon Abdullayevalar ana shunday elda hurmat qozonganlardan. Ularning bolaligi Ikkinchi jahon urushi, urushdan soʻnggi ogʻir tiklanish yillariga toʻgʻri keldi. Yurtdoshlarimiz boshidan kechirgan qahatchilik, yoʻqchilik azobi zalvorini his qilib ulgʻayishdi, ogʻir kunlarda borini birga baham koʻradigan nekbin xalqimizning oliyhimmatligidan, doʻst-birodarligidan namuna olib ulgʻayishdi.

Hozir Fayzulla Abdullayev sakson yoshdan oshdi. Toʻxtajon ona esa saksonga yaqinlashdi. Xuddi yangi oila qurayotganida keksalarning “baxtli boʻling, qoʻsha qaring”, degan tilaklari ijobat boʻlganday, ular pir-u badavlatlarga aylanishdi. Fayzulla ota tadbirkorlik faoliyati bilan shugʻullanib, oʻz oilasining iqtisodini yuksaltiribgina qolmay, ehtiyojmand oilalarni ham qoʻllab-quvvatlab, qoʻlidan kelgan yordamini ayamadi. Ularning totuv oilasida dunyoga kelgan ikki oʻgʻil, toʻrt qiz ham esli-hushli, odobli, ilmli boʻlib, hayotda oʻz oʻrinlarini topishdi.

Fayzulla ota, Toʻxtajon ona nevaralarining ham zamonaviy bilimlarni puxta egallashlariga, oliygohlarda oʻqib, el koriga yaraydigan insonlar boʻlishiga alohida eʼtibor berishdi. Hozir barchasi turli sohalarda mehnat qilishadi.

Yaqinda ularning oila qurganiga 58-yil toʻldi. Shu munosabat bilan pir-u badavlat bu insonlarni qutlash, quvonchiga sherik boʻlish, duolarini olish uchun farzandlari, yaqinlari, qoʻni-qoʻshnilari, mahalla fuqarolar yigʻini masʼullari tashrif buyurishdi.

Toʻkin dasturxon atrofida yuzlari nur taratib turgan nuroniylarni Durunki mahalla fuqarolar yigʻini raisi Shuhrat Jumaniyozov, oʻrinbosari Gavhar Mingboyevalar qizgʻin qutlab, sovgʻa-salomlar topshirdilar, mahallada mehr-oqibat, oʻzaro hamdoʻstlik barqaror boʻlishiga, ehtiyojmand oilalarni qoʻllab-quvvatlab, yosh oilalarga oʻz hayotiy tajribalari asosida nasihatlar qilib, ijtimoiy muhit yaxshilanishiga oʻz munosib hissa qoʻshayotganliklarini eʼtirof etdilar.

Shu kuni Fayzulla ota, Toʻxtajon onaning xonadoni qutlab keluvchilar bilan nurafshon boʻldi, ezgu tilaklardan koʻngillari togʻday yuksaldi. Ilohim, ularday boʻlib ahil yashab, qoʻsha qarimoq baxti barchaga nasib qilsin!

Durunki mahallasida bunday ahil va uzoq yillar hamjihatlikda umrguzaronlik qilib, boshqalarga ibrat boʻlayotgan oilalar koʻp. Mahalla fuqarolar yigʻini xodimlari ularning hayotiy tajribalarini targʻib etishga, umrboqiy urf-odatlarimiz, anʼanalarimizni yoshlar qalbiga singdirishga doir koʻpgina tadbirlar oʻtkazishmoqda.

Oygul RAJABOVA.