“Qadriyatlar bebaho boyligimiz” shiori ostida seminarlar oʻtkazildi

Qadriyatlar – har bir millatning oʻtmishi, buguni va kelajagini oynadek koʻrsatib turuvchi eng muhim omillardan biri.

Milliy qadriyatlar har bir millatning tili, urf-odatlari, tarixi, madaniyati, anʼanalarini, barcha moddiy va maʼnaviy boyliklarini, iqtisodiy, ijtimoiy-siyosiy hayotining barcha tomonlarini oʻz ichiga qamrab oladi. Har bir millatning madaniyati va urf-odatlarini hurmat qilish millati tili va diniy eʼtiqodidan qatʼiy nazar qonun oldida tengligini taʼminlash lozimligi bosh qomusimizda ham belgilab qoʻyilgan.

Shu maʼnoda, yoshlar qalbida qardosh millat va elatlarning urf-odatlarini hamisha hurmat qilish va ularga doʻstona munosabatda boʻlishdek ezgu ishlarni yanada chuqur singdirish borasida koʻplab say-harakatlar qilinmoqda. Yoshlarni qardosh millat vakillarining boy tarixiy qadriyatlari bilan yaqindan tanishtirish maqsadida tashkil qilinayotgan koʻrgazmali seminarlar ham shular jumlasidandir.

22-aprel kuni Amudaryo tumanining Amir Temur nomli ovul fuqarolar yigʻini hududidagi Mehnatkash aholi punktida joylashgan gilamdoʻzlik tsexida ham shu maqsadda koʻrgazmali seminar tashkil qilindi.

Unda tuman hokimining oʻrinbosari Oila va xotin-qizlar boʻlimi boshligʻi Goʻzal Soburova, Ayollarni reabilitatsiya qilish va maslashtirish namunali tumanlararo markazi direktori Gavhar Chimbaychiyeva, mahalla faollari hamda ovul hududida joylashgan umumtaʼlim maktablarning oʻquvchi qizlari ishtirok etishdi.

Seminar davomida bejirim gilamlar toʻqish orqali oʻz milliyligini aholi orasida keng targʻib qilayotgan ayol-qizlarning mehnatlari alohida eʼtirofga loyiq ekanligi taʼkidlandi.

Maʼlumot oʻrnida aytish kerakki, hududda istiqomat qilayotgan ayol-qizlarning bandligini taʼminlashga koʻmaklashish maqsadida tuman prokuraturasi tomonidan 5 ta xonadonga toʻqish stanogini oʻrnatib berilib, gilam toʻqish uchun zarur boʻlgan mahsulotlar va boshqa toʻqish uskunalari bilan taʼminlandi. Oʻtgan yilning bahor oylarida faoliyat boshlagan gilamdoʻzlik tsexlarida ayni paytda biri-biridan chiroyli gilam va paloslar toʻqilib, xaridorlarga yetkazib berilmoqda.

Qadimdan maʼlumki, qardoshlarimizning anʼanaviy gilamdoʻzligi qoʻl mehnatiga asoslanadi. Gilamlarda rang-barang naqshlar, manzaralar, ushbu xalq milliy qadriyatlari, anʼanalari, mahalliy hayvonot va nabotot olami tasvirlanadi. Ushbu kasb asrlardan asrlarga, avlodlardan avlodlarga oʻtib kelayotgani uchun ham juda qadrlanadi. Koʻrgazmali ceminar davomida oʻquvchi qizlar ham darsdan boʻsh vaqtlarida gilam toʻqish sirlarini oʻrganishni niyat qildilar.

Amudaryo tumani Oila va xotin-qizlar boʻlimi tashabbusi bilan tashkil qilingan tadbir doirasida ovul hududida istiqomat qiluvchi “Ayollar daftari”ga kiritilgan 20 dan ortiq xotin-qizlar uchun psixologik trening mashgʻulotlari ham tashkil etildi.

Unda ayollar psixologiyasi hamda sogʻlom va mustahkam oilaning asoslari, xotin-qizlar oʻrtasida uchrayotgan turli noxush holatlarning oldini olish borasidagi ishlarga alohida eʼtibor qaratildi. Ruhiy tushkunlikka tushib qolgan ayollar bilan individual suhbatlar olib borilib, ularning oʻziga boʻlgan ishonchni orttirishga qaratilgan tavsiyalar berib oʻtildi.

Tuman hokimligining Axborot xizmati