PROFILAKTIKA INSPEKTORINING FUQAROLAR YIGʻINI MASʼULLARI VA JAMOATChILIK BILAN HAMKORLIGI MUHIM AHAMIYaT KASB ETADI

   Profilaktika inspektori oʻziga biriktirilgan maʼmuriy hududda jamoat tartibini saqlash, Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslarning huquqlarini, qonuniy manfaatlarini, mol-mulklarini turli xil jinoiy tajovuzlardan himoya qilish hamda xavfsizlikni, shuningdek, huquqbuzarlik profilaktikasini taʼminlash borasidagi faoliyatni amalga oshiradi.
 Undan tashqari, profilaktika inspektori huquqbuzarliklar profilaktikasini qonunda berilgan vakolatlar doirasida fuqarolarning oʻzini oʻzi boshqarish organlari va jamoatchilik imkoniyatidan unumli foydalangan holda olib boradi. Jamoat tartibini saqlash, fuqarolar xavfsizligini taʼminlash, huquqbuzarliklarning sodir etilishi sabablarini va ularga imkon berayotgan shart-sharoitlarni aniqlash, gʻayriijtimoiy xulq-atvorga ega va huquqbuzarlik sodir etgan shaxslarni aniqlash, profilaktik taʼsir koʻrsatish orqali ularning xulq-atvorini tuzatish kabilarga koʻmaklashadilar.
Profilaktika inspektori maʼmuriy hududda xizmat faoliyatini amalga oshirishda fuqarolik jamiyati institutlari bilan hamkorlik qiladi. Bu borada Oʻzbekiston Respublikasining 2014-yil 14-maydagi «Huquqbuzarliklar profilaktikasi toʻgʻrisida»gi qonunining 4-moddasida asosiy vazifalar belgilab berilgan. Shuningdek, mazkur qonunning 21-moddasida profilaktika inspektori huquqbuzarliklar profilaktikasida fuqarolik jamiyati institutlari, jumladan fuqarolarning oʻzini oʻzi boshqarish organlari, nodavlat notijorat tashkilotlari bilan hamkorlikda amalga oshiradigan yoʻnalishlar koʻrsatilgan.
Unga koʻra, profilaktika inspektori maʼmuriy hududni profilaktik koʻzdan kechirish va kriminogen vaziyatni tahlil qilish, jamoat tartibini saqlash va fuqarolar xavfsizligini taʼminlash, huquqbuzarliklarning umumiy, maxsus, yakka tartibdagi va viktimologik profilaktikasini tashkil etish va amalga oshirishda hamkorlik qiladi. Shu bilan birga fuqarolarni qabul qilish, ularning ariza va shikoyatlarini koʻrib chiqish va hal etish, maʼmuriy huquqbuzarliklarni aniqlash va ular toʻgʻrisidagi ishlarni yuritish hamda hal qilish, pasport-viza va nazorat-litsenziyalash qoidalariga rioya etilishini taʼminlash kabilar ham hamkorlikda amalga oshiriladi.
 Profilaktika inspektorining bugungi kunda keng jamoatchilik, shu jumladan, fuqarolik jamiyati institutlari bilan hamkorligi hududlarda osoyishtalikni taʼminlash, huquqbuzarlik va jinoyatlarning oldini olishda muhim ahamiyat kasb etadi.

   A.Jumaboyev, IIV Akademiyasi 3-oʻquv kursi kursanti.