TINChLIKKA RAHNA SOLUVChI JINOYaTChILIKKA QARShI KURAShISh — VAZIFAMIZ

Hozirda mamlakatimizda xalqimizning baxtli hayoti uchun, olis kelajakda emas, balki bugungi kunda, ayni paytda yaxshi yashashi, munosib hayot kechirishi va barcha imkoniyatlardan bahramand boʻlishini taʼminlashga  qaratilgan xalqparvar tizimni yoʻlga qoʻyishga qaratilgan keng koʻlamli islohotlar amalga oshirilmoqda. Taraqqiyotning yangi bosqichiga qadam qoʻyilayotgan hozirgi sharoitda tinchlik va osoyishtalikni saqlash juda muhimdir.

Oʻquv dargohidagi tahsilim davomida tinchlikka rahna soluvchi jinoyatchilik va uning sabablarini aniqlashda muhim boʻlgan tergov yoʻnalishini tanlashni maʼqul koʻrdim. Taʼkidlash joizki, jinoyat boʻyicha tergovga qadar tekshiruv oʻtkazish ishlari koʻrilayotgan  jinoyat tarkibini tashkil qiluvchi qilmishlar haqida dastlabki axborotlar olingan vaqtdan boshlanadi va jinoyat ishini qoʻzgʻatish haqidagi protsessual qarorni qabul qilish vaqtiga qadar davom etadi. Ushbu davr mobaynida jinoyat ishini qoʻzgʻatish uchun asos boʻlishi mumkin boʻlgan Jinoyat kodeksida ushbu jinoyat tarkibini tashkil qiluvchi jinoyatning obʼektiv va subʼektiv belgilarini aniqlashga qaratilgan tergov harakatlarini oʻtkazish kerak. Xususan, jinoyat boʻyicha tergovchi, jinoyat ishi qoʻzgʻatish haqida qaror qabul qilar ekan, yuz bergan tergov vaziyati va boshlangʻich maʼlumotlarni baholaydi va ularga asosan tergov tusmollarini ishlab chiqadi, tergov rejasini tuzadi.

Jinoyat kodeksining 164-moddasi boʻyicha jinoyat ishini qoʻzgʻatish uchun Oʻzbekiston Respublikasi Jinoyat-protsessual kodeksining 322-moddasida koʻrsatilgan barcha holatlar asos boʻlishi mumkin. Faqatgina tegishli huquqni muhofaza qiluvchi organlar xodimlari uchun mazkur asoslar, ular tomonidan nechogʻlik sifatli tekshirib olishlariga bogʻliq boʻladi.

Bosqinchilik va boshqa jinoyatlarni tergov qilishning birlamchi va kechiktirib boʻlmas tergov harakatlari bosqichini toʻplangan maʼlumotlarni tahlil qilish bilan yakunlash lozim. Aniqlangan vaziyatdan kelib chiqib, tergovning keyingi bosqichida hal qilinishi lozim boʻlgan vazifalar va amalga oshirilishi lozim boʻlgan tergov harakatlarini toʻgʻri belgilash lozim.

Men shu kabi bilim va koʻnikmalarni egallab, kelajakda jinoyatchiliklarning oldini olishga, yurtimizda tinchlik barqaror boʻlishiga munosib hissa qoʻshaman.

Joʻshqin Yoʻldoshev,  OʻzR IIV Akademiyasi 3-oʻquv kursi kursanti.