40-sonli maktabda “Inson qadri ulugʻ, xotirasi muqaddas” shiori ostida maʼnaviy-maʼrifiy tadbir oʻtkazildi

Har bir inson yurt taraqqiyotiga munosib hissa qoʻshish uchun yashaydi. Shunday odamlar borki, ular xalq farovonligi yoʻlida hattoki, jonlaridan kechishgan. Bular ikkinchi jahon urushida tinchlik uchun kurashgan yurtdoshlarimizdir.

Har yili mamlakatimizda 9-may – “Xotira va qadrlash kuni”ni keng nishonlash, Ikkinchi jahon urushida fashizm ustidan qozonilgan Gʻalabaga munosib hissa qoʻshgan, mustaqillik yillarida xizmat burchini bajarish chogʻida halok boʻlgan harbiy xizmatchilar va huquqni muhofaza qiluvchi organlar xodimlarining xotirasini abadiylashtirish, oramizdagi barcha faxriylarga hurmat koʻrsatish maqsadida bayram tadbirlari oʻtkazilib kelinmoqda.

Jumladan, Amudaryo tumanidagi 40-sonli umumiy oʻrta taʼlim maktabida ham 9-may − “Xotira va qadrlash kuni” munosabati bilan “Inson qadri ulugʻ, xotirasi muqaddas” shiori ostida maʼnaviy-maʼrifiy tadbir oʻtkazildi.

Tadbirda Amudaryo tumani “Nuroniylar” jamoatchilik Kengashi raisi oʻrinbosari, “Ardaqli nuraniy” koʻkrak nishoni sohibi Bekman Allabergenov, bir guruh mehnat faxriylari, maktab jamoasi hamda oʻquvchilari ishtirok etdilar.

Tadbirda maktabning iqtidorli oʻquvchilari oʻzlarining tayyorlagan sahna koʻrinishlari, ona Vatan hamda tinchlikni tarannum etuvchi dilbar navolari hamda goʻzal raqslari bilan yigʻilganlarni hursand qilishdi.

Shundan soʻng, Oʻzbekiston Respublikasi Maʼnaviyat va maʼrifat markazi Amudaryo tumani boʻlinmasi rahbari Mahsud Sadullayev Ikkinchi jahon urushida erishilgan Gʻalabaning 77 yillik bayrami bilan barchani muborakbod etdi.

Amudaryo tumani “Nuroniylar” jamoatchilik Kengashi raisi oʻrinbosari, “Ardaqli nuraniy” koʻkrak nishoni sohibi Bekman Allabergenov esa tumanimizda ikkinchi jahon urushiga qatnashgan 4 ming 344 nafar insonning jasorati bugungi avlodlarga ibrat boʻlib kelganligini va bundan keyin ham shunday boʻlib qolishini taʼkidladi.

Mehnat faxriysi Soliy Sabirov esa Oʻzbekiston xalqining Ikkinchi jaxon urushi davrida koʻrsatgan jasorati, bukilmas irodasi va matonati, insonparvarlik fazilatlari haqida garirib tinchlikning qadriga yetish zarurligini, tinchlik buyuk neʼmat ekanligini taʼkidladi.

Darhaqiqat, tinchlik va baxt hamma vaqt birga yuradi, deydilar. Biz ham ona Oʻzbekistonimizda baxt va farovonlikka erishmoqni istasak, bugungi dorilomon hayot, yashash lazzati, rizq-nasiba neʼmati, orzu-havaslarga yetishmoq imkonidan unumli foydalanib, tinchlikning qadrini yaxshi anglashimiz, bunday eʼtiqod-odatlarni yoshlarga har kuni singdirib borishimiz lozim.

 Tadbir yakunida faxriylarga esdalik sovgʻalari topshirildi.

F.Eshimbetova