MUZAFFARNING ISh KUNLARI

Xalq deputatlari Amudaryo tuman Kengashining 18-Xitoy saylov okrugidan deputati Muzaffar Yeshchanov har gal saylovchilari bilan uchrashganida saylov okrugi hududida istiqomat qiluvchi har bir fuqaro, har bitta oila va xonadon hayotiga doir yutuq va muammolarni avvaldan sinchiklab oʻrganadi.

M.Yeshchanovning deputat sifatidagi oʻz hayot shiori bor: “Yakka odam oʻzi muvaffaqiyat qozonolmaydi, barcha masalada uni ragʻbatlantirib turuvchi kuch − xalqdir”. Shuning uchun ham u deputat boʻlmasidan avval, Toshkent Davlat agrar Universitetini tugatib, 2008-yilda “Shoʻr qalʼa” fermer xoʻjaligi ish yurituvchisi sifatida ilk mehnat faoliyatini boshlagan kunlaridanoq xalq ichiga kirib borish, ular bilan birga mehnat qilish, quvonch-u tashvishlarini birgalikda baham koʻrish orqali kundalik  ish rejalarini muvaffaqiyatli, toʻsiqlarsiz amalga oshirish mumkinligini anglab yetdi.

Ishonch − inson orzulariga qanot bagʻishlaydi, deydilar. Muzaffar ham ana shu ishonch tuygʻusini his etgan sari yosh boʻlsa-da, nufuzli mehnat jamoalarida, xususan, tuman qishloq va suv xoʻjaligi boʻlimining irrigatsiya-melioratsiya tarmoqlari va qurilmalari boʻyicha yetakchi mutaxassisi, Namuna MMTP raisi, MChJ shaklidagi “Amudaryotex” xorijiy korxonasi agronomi, Meliorativ ekspeditsiyaning Amudaryo meliorativ uchastkasi boshligʻi vazifalarida sidqidildan xizmat qildi. U qaysi  jamoada, qay lavozimda ishlashidan qatʼiy nazar, bir vaqtning oʻzida “Muzaffar Yeshchanov” fermer xoʻjaligiga ham rahbarlik qildi. Paxta va boshqa qishloq xoʻjaligi mahsulotlari yetishtirish boʻyicha “Muzaffar Yeshchanov” fermer xoʻjaligini tumandagi ilgʻor qishloq xoʻjalik korxonalari safiga  olib chiqdi.

U okrug hududidagi mahallalarda xotin-qizlar faollari, koʻcha boshchilari va nuroniylar ishtirokidagi har bir uchrashuvida Prezidentimiz tashabbusi bilan ishlab chiqilgan Yangi Oʻzbekistonning taraqqiyot strategiyasi mazmun-mohiyati xususida tushunchalar berib, ushbu strategiyaning xalqimiz hayotini tubdan yaxshilash, farovonligini taʼminlashga xizmat qilishga qaratilgan bandlari bugungi hayotimizda yaqqol namoyon boʻlishi uchun har bitta xonadon va oilada amalga oshirilishi lozim boʻlgan vazifalarga alohida ahamiyat qaratadi. Xususan, kam daromadli, ehtiyojmand oilalarni kambagʻallikdan chiqarish boʻyicha oʻz rejalari asosida davlatimiz tomonidan koʻrsatilayotgan eʼtibor yuzasidan saylovchilarning fikrlari, takliflarini oʻrganishdan aslo charchamaydi.

M.Yeshchanov  ayni paytda Namuna mahallasida tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman hokimi yordamchisi sifatida deyarli har kuni xalq bilan birga. 18-Xitoy saylov okrugi hududidagi va Namuna mahallasi tasarrufidagi barcha koʻchalar va mahalla guzarida amalga oshirilayotgan obodonlashtirish va koʻkalamzorlashtirish ishlariga bosh-qosh.

M.Yeshchanovning ham deputat, ham hokim yordamchisi sifatidagi faoliyat koʻlami  ancha keng. Oʻzi tugʻilib-oʻsgan  Namuna mahallasi ahli, qolaversa, 18-Xitoy saylov okrugi hududidagi mahallalarda yashovchi saylovchilar ishonchini oqlash, xalqning dard-u tashvishlariga sherik boʻlib yashash uning zimmasidagi masʼuliyatli vazifadir. Oilada esa tartib-intizomni xush koʻradigan umr yoʻldosh va mehribon ota. Rafiqasi Maʼmuraxon bilan ikki oʻgʻil, ikki qizni ilmli-maʼrifatli qilib voyaga yetkazishmoqda. Obod va charogʻon oila qoʻrgʻoni hamisha saranjom-sarishta, yaxshilar qadamidan fayzli. Deputat va hokim yordamchisi, namunali fermer xoʻjaligi rahbari, ibratli oila sohibi Muzaffar Yeshchanovning har bir ish kuni xalq bilan birga, unga ishonch bildirgan saylovchilar davrasida kechadi. Mazmunli uchrashuvlar, samimiy va oshkora muloqotlarga boy bunday davralar yosh va tashabbuskor deputatga yana yangi orzular, rejalar sari yoʻl ochaveradi.

Robiya YOʻLDOShEVA.