Qirq yildan keyingi diydor

Joriy yilning 4-iyun kuni Amudaryo tumanidagi 24 – sonli umumiy oʻrta maktabni 1980-yilda tugatgan sobiq bitiruvchilarning 40 yillik yubiley uchrashuvi boʻlib oʻtdi. Ushbu dargohni qirq yil muqaddam tamomlagan sobiq oʻquvchilar diydorlashuvi maktab binosida tashkil etildi.

Uchrashuvga Respublikamizda fan, taʼlim, harbiy sohada, xususiy tadbirkorlikda, pedagogika sohasida faol mehnat qilib kelayotgan 25 dan ziyod bitiruvchilar kelishdi. Uchrashuvga kelgan bitiruvchilar  nafaqat tumanimizda, balki Respublikamizda ham oʻzlarining faol xizmatlari, ulkan tajribalari bilan tanilgan yetuk mutaxassislar boʻlib, Vatanimiz ravnaqi uchun hissa qoʻshayotgan, hozirgi kunda oʻzining boy amaliy tajribasi bilan oʻsib kelayotgan yosh avlodga oʻrnak boʻlayotgan aziz insonlardir.

Uchrashuvda maktabning 25 dan ziyod sobiq oʻquvchilari hamda ularning ustoz – murabbiylari, sobiq oʻqituvchilaridan Podshagul Erniyazova, Boltaboy Alimboyev, Omongul Qayirbergenova, Nagʻishboy Nurniyazovlar qatnashdilar.

Maktab oʻquvchilari tomonidan tashkil etilgan uzoq yillik sinfdoshlar uchrashuvi bayram tantanalariga aylanib ketdi. Tadbirniing tashkiliy qismi maktab binosida oʻtkazildi.

Tadbirda Qozogʻistondan tashrif buyurgan yoshi ulugʻ sobiq ustozlar, faxriy oʻqituvchilar soʻzga chiqib, sobiq oʻquvchilarni 40-yilik uchrashuv bilan muborakbod etdilar. Ularga maktab hayoti, oʻquvchilik yillariga doir qiziqarli maʼlumotlar, hayotning totli onlari xususida iliq fikrlarini bayon etdilar. Sobiq sinfdoshlar ham oltin yoshlikning unutilmas lahzalari, qadr – qimmat, ustozlarga eʼzozlar haqida dil izhorlarini bayon qildilar.

Zamonaviy jihozlangan xonalarda taʼlim olayotgan bugungi kun oʻquvchisiga havas bilan qarashar ekan, bugun yurtimizda ilm – fan va texnologiyalarning bugungi global dunyoda jadal oʻsishi, yoshlarga keng imkoniyatlar yaratilib, ularning isteʼdodi va qobilyatlarini toʻliq amalga oshirishga alohida eʼtibor qaratilganligini taʼkidlab oʻtdilar.

Sinf partalarida oʻtirar ekan, maktab davrida kechgan qiziqarli voqealar, ajoyib sarguzashtlarni miriqib eslashdi. Uchrashuvga kelgan bitiruvchilar maktabning hozirgi hayoti, ilm – fandagi yutuqlari, yangi texnologiyalar bilan tanishdilar va oʻzlarining taassurotlari, bolalik xotiralari bilan oʻroqlashdilar.

Bundan 40-yil oldin maktabni tugatgan sobiq oʻquvchilar taʼlim maskani oldida esdalik fotosuratlariga tushdilar va ustozlarga taʼzim bajo keltirib, maktab rahbariyatiga, ustoz – murabbiylariga ulkan zafarlar va muvaffaqiyatlar, yaxshi niyatlar va istaklar bildirishdi.

Sinfdoshlar oʻrtasidagi doʻstlik tuygʻusi insonni maʼnaviy qoʻllab – quvvatlovchi, uning ogʻirini yengil qiluvchi, ruhiyatini koʻtaruvchi, oʻziga ishonch orttiruvchi kuch hisoblanadi. Insonda doʻstlik, birodarlik, oʻzaro ishonch tuygʻulari darhol yuzaga kelib, oʻz – oʻzidan mustahkamlanib qolmaydi, balki yillar davomida shakllanib boradi.

Tashkilotchilar uzoq va yaqindan kelgan bitiruvchilarni bir payola choyga taklif qildilar, doʻstlar uchun yozilgan dasturxon atrofida doʻstona suhbat va oʻyin – kulgular bilan bitiruvchilar tantanasi uzoq vaqt davom etdi. Sinfdoshlarning sogʻinchli diydorlashuvi uzoq yillar xotirada muhrlanib qoladigan darajada yuqori saviyada oʻtkazildi.

Uchrashuv jarayonida sobiq bitiruvchilarning dil soʻzlari bir – biriga ulanib ketdi, shoʻx- shodon  oʻyin – kulgular avj olib, kuy – qoʻshiqlar yangradi.

Sevara ISMOILOVA, QDU talabasi