Vatan taraqqiyotiga gʻov boʻluvchi illatlarga qarshi kurashish keng jamoatchilik orasida targʻib qilinmoqda

18-iyul kuni Amudaryo tumani Mangʻit shahrining Olmazor mahallasi hududidagi 1-sonli Bolalar-oʻsmirlar sport maktabida tuman prokurori katta yordamchisi Abbaz Niyazimbetov, tuman Ichki ishlar boʻlimi boshligʻi oʻrinbosari, podpolkovnik Muxtor Raxmatullayev, Voyaga yetmaganlar boʻyicha katta inspektor-psixolog Ulugʻbek Yoʻldashev, tuman hokimligining din ishlari boʻyicha bosh mutaxassisi Muzaffar Sherimbetov hamda sport maktabi xodimlari ishtirokida yigʻilish boʻlib oʻtdi.

Yigʻilishdan koʻzlangan asosiy maqsad – tinchlikning qadriga yetish, yoshlarni buzgʻunchi gʻoyalardan himoya qilish, Vatan taraqqiyotiga toʻsiq boʻluvchi illatlardan biri − korruptsiyaning oldini olish boʻyicha targʻibot ishlarini olib borishdan iboratdir.

 Oʻzbekiston – barchamizning umumiy uyimiz. Uning tinchligini koʻz qorachigʻidek asrash, taraqqiyotiga munosib hissa qoʻshish shu diyorda yashayotgan har bir fuqaroning burchidir.

 Yigʻilishda soʻzga chiqqanlar, yurtimizda hukm surayotgan tinchlik va barqarorlik zamirida mehnatkash va oqkoʻngil xalqimizning ezgu orzu-umidlari mujassam ekanligini taʼkidladilar.

Habaringiz bor, Qoraqalpogʻiston Respublikasining Nukus shahrida Konstitutsiyaviy islohotlarning baʼzi bir fuqarolar tomonidan notoʻgʻri talqin etilganligi sababli 1-2-iyul kunlari ommaviy tartibsizliklar yuz berdi.

Hurmatli Prezidentimiz ushbu qaltis vaziyatda xalq bilan birga boʻlib, Qoraqalpogʻiston Respublikasiga yetib keldi va Joʻqorgʻi Kenges deputatlari, Respublika faollari bilan uchrashib, Qonstituttsiyadagi har bir oʻzgartish xalq bilan bamaslahat amalga oshirilishini, Bosh Qomusimizdagi Qoraqalpogʻiston Respublikasiga oid moddalar amaldagi tahrirda, oʻzgarishsiz qolishini taʼkidladilar.

Shundan soʻng, yigʻilish ishtirokchilariga shukronalik tuygʻularni mustahkam qaror toptirishga xizmat qiluvchi maxsus videorolik namoyish etildi.

Shu oʻrinda aytish kerakki, Nukus shahrida bulib oʻtgan koʻngilsiz voqealar yurtimizda yashayotgan har bir fuqaroni tinchlikning qadriga yetishga, uni asrab-avaylashga undadi. Shuningdek, koʻpmillatli bagʻrikeng xalqimizning necha asrlardan buyon ogʻizbirchilikda ahil-inoq yashab kelayotganligi, kuchli maʼnaviy va intellektual salohiyatga ega yoshlari bor yurtni hech qanday buzgʻunchi kuchlar yenga olmasligi isbot talab qilmaydigan haqiqat ekanligi barchamizga ayon.

Yigʻilish davomida Vatan taraqqiyotiga toʻsiq boʻluvchi illatlardan eng xavflisi − korruptsiyaga qarshi kurashish boʻyicha tuman prokurori katta yordamchisi Abbaz Niyazimbetov batafsil tushuntirishlar berdi.

Taʼkidlanganidek, korruptsiya – davlat va jamiyatni ich-ichidan yemiruvchi xavfli jinoyat hisoblanadi. Maʼnaviy dunyosi qashshoqlikka uchragan har qanday inson ushbu jinoyatni sodir etishi mumkin.

Buning oldini olish uchun esa, avvalo, yurtdoshlarimiz qalbida ona Vatanga boʻlgan mehr-muhabbatni chuqur singdirmoq, halollik va toʻgʻrilikni hayot tarzining bosh meʼzoni sifatida qoʻymoqlari darkor.

Tuman hokimligining Axborot xizmati.