“Ayollar daftari”ga kiritilgan ayollarga fermerlar Kengashi tomonidan homiylik yordamlari koʻrsatildi

Maʼlumki, joriy yil 31-mart kuni Oʻzbekiston Respublikasi Vazirlar Mahkamasining “Xotin-qizlar muammolarini oʻrganish va hal etish tizimini yanada takomillashtirish chora-tadbirlari toʻgʻrisida”gi qarori imzolangan edi.

Qarorga muvofiq, “Ayollar daftari”ni yuritish orqali xotin-qizlar muammolarini tizimli ravishda hal etish va ularni ijtimoiy qoʻllab-quvvatlash tartibi toʻgʻrisida”gi nizom tasdiqlandi. Ushbu nizomning 4-bobida “Ayollar daftari” roʻyxatiga kiritilgan xotin-qizlarga amaliy yordam berish tartibi belgilab berilgan.

Qarorda keltirilishicha, sektorlar rahbarlari, tuman oila va xotin-qizlar boʻlimi, tuman Fermer, dehqon hoʻjaliklari va tomorqa yer egalari Kengashi hamda hokim yordamchilari bilan hamkorlikda “Ayollar daftari”ga kiritilgan xotin-qizlarga tomorqadan va dehqonchilikdan daromad manbai sifatida foydalanish uchun koʻmaklashiladi.

Yaʼni, yengil konstruktsiyali issiqxonalar oʻrnatilishiga, parranda, asalari, quyon, baliq va bedana boqishni yoʻlga qoʻyishga, dehqonchilik bilan shugʻullanish, qishloq xoʻjaligi mahsulotlarini yetishtirish, qayta ishlash, saqlash va sotish ishlarida ularga har tomonlama yordamlar beriladi.

 Mazkur qaror ijrosini taʼminlash maqsadida Amudaryo tumanida ham koʻplab amaliy ishlar qilinmoqda.

Bugungi kunda tumanda 3-bosqich “Ayollar daftari”ga jami 3 ming 810 nafar xotin-qizlar qizlar kiritilgan boʻlib, shundan 70 nafari tomorqadan unumli foydalanuvchi ayollar toifasiga kiritilgan boʻlib, ularga hududdagi fermer xoʻjaliklari masʼul sifatida biriktirilgan.

25-iyul kuni Oʻzbekiston Temir yoʻlchilari va transport quruvchilari kasaba uyushmasi Respublika Kengashi bosh mutaxassisi Shamil Xaniyev hamda Amudaryo tuman Fermer, dehqon xoʻjaliklari va tomorqa yer egalari Kengashi raisi Ilhom Palvanovlar “Ayollar daftari”ga kiritilgan, tomorqadan unumli foydalanayotgan ayollar bilan yaqindan suhbatlashdilar.

Zaminimiz serhosil. Tuproq, iqlim sharoiti, toʻrt faslda ham sabzavot ekinlari yetishtirish uchun gʻoyat qulay hisoblanadi. Ayollar ushbu yerlarda mehnat qilib, piyoz, sabzi, kartoshka, sarimsoqpiyoz yoki turli koʻkatlarni ekib, yerdan unumli foydalanish orqali roʻzgʻorlari ehtiyojini qondirish bilan birga, bozor rastalarini toʻldirib, katta daromadga ega boʻlishmoqda.

Oʻrta qala ovulining Bogʻ, Arna boʻyi mahallalari hamda Bobur nomli ovulda istiqomat qiluvchi “Ayollar daftari”ga kiritilgan ayollarning har biriga 100 kg dan bugʻdoy, un, yogʻ, tovuq va oziq-ovqat mahsulotlari tuman Fermer, dehqon xoʻjaliklari va tomorqa yer egalari Kengashi hamda hududdagi fermer xoʻjaliklari rahbarlari tomonidan homiylik yordami sifatida bepul tarqatildi.

Ayol-qizlarning bandligini taʼminlash, kasbga oʻqitish, tadbirkorlik qobiliyatlarini qoʻllab-quvvatlash, oilaviy sharoitini yaxshilash − bugungi kunning muhim talabidir. Shunday ekan, ijtimoiy himoyaga muhtoj ayol-qizlarga koʻmak koʻrsatish, ularni moddiy va maʼnaviy qoʻllab-quvvatlashga hissa qoʻshish jamiyatning har bir faol aʼzosining burchiga aylanmogʻi kerak.

Tuman hokimligining Axborot xizmati.