Amudaryolik sahovatpesha fermer — "Oʻrozboyev Ulugʻbek" fermer xoʻjaligi raisi Ulugʻbek Oʻrozboyev kam taʼminlangan 200 ta oilaga jami 10 tonna bugʻdoy tarqatdi

Xayr va sahovat insonni ulugʻlab, har ikki dunyoda ham ajru savobga sazovor etishi haqida koʻplab hadislar, xalq orasida maqollar va rivoyatlar bor. Islom dinida moʻminning eng ulugʻ sifatlaridan biri xayr va saxovat ekaniga ishora qilinadi.

Davlatimiz rahbarining tashabbusi bilan aholini ijtimoiy himoya qilish, ehtiyojmand oilalarni moddiy qoʻllab-quvvatlash ishlari doimiy kun tartibidagi masalalarga aylangan.

Aholi muammolarini aniqlash va ijtimoiy himoyaga muhtoj oilalar rzyxatini shakllantirish, ularga har tomonlama, manzilli koʻmak koʻrsatish maqsadida yirik ijtimoiy dasturlar - “Temir daftar”, “Ayollar daftari”, “Yoshlar daftari” tizimlari yaratildi. Oʻtgan vaqt davomida birgina “Temir daftar” orqali fuqarolar yigʻini hamda sektorlar tomonidan aholining ehtiyojmand qatlamlari hisobga olinib, ularning ijtimoiy-iqtisodiy holati oʻrganildi. Shu bilan birga, aholini kambagʻallikdan chiqarish, ular bilan manzilli va maqsadli ish olib borishga doir muhim qadamlar qoʻyildi.

Davlatimiz va hukumatimizning bu kabi insonparvar siyosatidan amudaryolik sahovatpesha tadbirkorlar ham oʻrnak olishmoqda. Shunday sahiy ishbilarmonlardan biri tumanimizning Doʻrman ovulida fermer xoʻjaligini tashkil qilib, yerdan moʻl hosil va daromad olayotgan fermer Ulugʻbek Oʻrozboyev tuman Mahalla va nuroniylarni qoʻllab-quvvatlash boʻlimiga tashabbus bilan murojaat qildi. Fermer xoʻjaligi dalalarida yetishtirilgan bugʻdoyning bir qismi – 10 tonnasi ehtiyojmand oilalarga tarqatildi.

24-sentyabr kuni tumanning barcha ovul va mahallalarida yashovchi ehtiyojmand, ijtimoiy himoya daftalariga kiritilgan 200 ta oilalarning vakillari tuman Mahalla va nuroniylarni qoʻllab-quvvatlash boʻlimiga taklif qilindi. Ularning har biriga bir qop – 50 kilogrammdan bugʻdoy tarqatildi.

Islom dinimiz taʼlimotiga koʻra ehson qilish eng savobli amallardan sanaladi. Qurʼoni Karimda ehsonning fazilati zikr qilinib, ehson qiluvchilarga beriladigan savob-mukofotlar ham bayon etilgan. “Alloh yoʻlida mollarini ehson qiluvchilar (savobining) misoli goʻyo bir donga oʻxshaydiki, u har bir boshogʻida yuztadan doni boʻlgan yettita boshoqni undirib chiqaradi. Alloh xohlagan kishilarga (savobini) yanada koʻpaytirib beradi. Alloh (karami) keng va bilimdon zotdir”.

Alloh taolo bu misoli bilan qilingan bittagina ehson evaziga bitta emas, balki, yetti yuz va undan ortiq savob ato etishi mumkinligini bildirmoqda.

Ehson qiluvchi kishi bu ehsoni evaziga faqatgina oxiratda ajr olibgina qolmay, bu dunyoda ham mukofotlarga ega boʻladi. Muhtojlarga xayr-saxovat qilish insonlar oʻrtasida mehr-oqibat rishtalarini yanada mustahkam bogʻlanishiga, jamiyatda oʻzaro hurmat va totuvlik hislarini ortishiga, dunyoviy ishlarini rivoj topishiga xizmat qiladi. Qolaversa, kimningdir ogʻirini yengil qilish, unga yaxshilik ulashish insonni maʼnan yetuklikka eltuvchi asosiy koʻprikdir.

Tilagimiz – elimizda Ulugʻbek Oʻrozboyevdek sahovatpesha, qoʻli ochiq tadbirkorlar va ishbilarmonlar koʻpayaversin!

Tuman hokimligining Axborot xizmati.