Ona tabiatni asraylik

Mamlakatimizning Asosiy qonuni - Konstitutsiyamizning 55-moddasida "Yer, yer osti boyliklari, suv, oʻsimlik va hayvonot dunyosi hamda boshqa tabiiy zahiralar umummilliy boylikdir, ulardan oqilona foydalanish zarur va ular davlat muhofazasidadir”, deyilgan.

Qolaversa, atrof-muhit va aholi salomatligi bilan bogʻliq munosabatlarni tartibga soluvchi qator Qonunlar va qonunosti hujjatlari ishlab chiqilganki, ularning barchasi atrof-muhitga ehtiyotkorona munosabatni taʼminlab, shu orqali aholi salomatligiga xavf tugʻdiruvchi harakatlarning oldini olishga xizmat qiladi.

Darhaqiqat, bizni oʻrab turgan olam - tabiatimiz, hayvonot va nabotot dunyosi, oyogʻimiz ostidagi ona zamin, yer osti va yer usti boyliklari, suv - hammasi butunicha umummilliy boyligimizdir. Ularning yaxlit moʻʼtadil tizimi bizning yashash, umrguzaronlik qilishimiz uchun zaruriy sharoit hisoblanadi.

Shu boisdan-da ona tabiatimizga, xoh oʻsimliklar, xoh hayvonot dunyosiga, xoh yer, suvimizga nomunosib munosabatda boʻlishimiz - uning tabiiy muvozanati buzilishiga, insonlar yashashi uchun noqulay sharoitlarning vujudga kelishiga sabab boʻladi. Yer, yer osti boyliklari, hayvonot, oʻsimliklar, suv va barcha tabiiy zahiralarning davlat muhofazasiga olinganligi ham shuning uchundir. Unga daxl qilish holatlariga amaldagi qonunchiligimizda jazo choralari koʻzda tutilgan.

Shuningdek, 2003-yil 1-maydan kuchga kirgan Oʻzbekiston Respublikasi Vazirlar Mahkamasining "Oʻzbekiston Respublikasi hududida atrof tabiiy muhit ifloslantirilganligi va chiqindilar joylashtirilganligi uchun toʻlovlar tizimini takomillashtirish toʻgʻrisida”gi 199-sonli qaroriga muvofiq, Respublikamiz hududida atrof tabiiy muhitini ifloslantirganligi va chiqindilarini joylashtirganligi uchun ishlab chiqarish korxonalaridan kompensatsiya toʻlovlari undirish, toʻlovlarni davlat tabiatni muhofaza qilish organlari tomonidan undirish va 50 foizini davlat byudjetiga, 50 foizini tabiatni muhofaza qilish ishlariga foydalanish nazarda tutilgan.

Tuman tabiatni muhofaza qilish boʻlimi xodimlari mavjud qonuniy hujjatlarga muvofiq faoliyat yuritishib, tumanimiz tabiatini, tabiiy zahiralarni, suv va oʻsimliklar, hayvonot dunyosini muhofaza qilishga, tabiatga oqilona munosabat oʻrnatilishiga butun imkoniyatlarini safarbar etmoqdalar.

Xususan, tumanimizda faoliyat yuritayotgan 18 ta ishlab chiqarish korxonalaridan atrof tabiiy muhitni ifloslantirganligi va chiqindilar joylashtirganligi uchun kompensatsiya toʻlamlari oʻz vaqtida undirildi.

Tabiatning oʻzi zargarga oʻxshaydi. Uning bagʻridan unib chiqqan har bir giyoh, har bir daraxt, oʻrmonlar, hayvonot olami oʻziga xos bir olamdir. Bu tabiiy boylikka daxl qilinishining oldini olish, muhofaza qilish faqat shu soha xodimlarining ishi emas, balki barchaning burchidir. Chunki, biz yashayotgan hudud musaffoligi, ekologik muvozanat barchamizga birday daxldordir. Shunday boʻlishiga qaramasdan suvdan foydalanish va suv isteʼmoli qoidalarini buzuvchilar, noqonuniy baliq ovlab sotayotgan, baliq tutishda taʼqiqlangan ov qurollarini ishlatayotgan, mahalliy hokimiyat organlari belgilaganidan tashqari yerlarga chiqindilar tashlayotgan, tabiiy muhitni muhofaza qilish qoidalarini qoʻpol ravishda buzayotganlar afsuski, uchrab turibdi.

Joriy yilning oʻtgan toʻqqiz oyida ana shunday noqonuniy harakatlar sodir etilgan 55 ta holat aniqlanib, aybdorlardan jarimalar undirildi. Shuningdek, suvdan tejab-tergab foydalanish uchun har bir suv olish nuqtasiga tegishli texnik pasport olish ishlari yuritilmoqda. Bu limitsiz suv olish holatlarining oldini olishga xizmat qiladi. Hamkor tashkilotlar bilan birgalikda yashil daraxtlarni koʻpaytirish uchun yilimiz koʻklamida tuman boʻyicha 79900 ta tez oʻsuvchi terak, 364200 ta mevali va manzarali daraxtlar, 300 ta kashtan, 46100 ta yapon saforasi koʻchatlari oʻtqazildi va oʻsib-rivojlanishi muntazam nazorat qilinmoqda.

Bizning faoliyatimiz tabiatimiz muhofaza qilinishiga, yer, yer osti boyliklari, suv va boshqa tabiiy zahiralarga oqilona munosabat hukmron boʻlishiga qaratilgan.

M.Abdrimov,

tuman tabiatni muhofaza qilish boʻlimi boshligʻi.

J.Doʻsimbetov,

boʻlim inspektori.

Sh.Boltaboyev,

QR tabiatni muhofaza qilish davlat qoʻmitasi respublika suv resurslarini muhofaza qilish inspektsiyasining tumandagi 1-darajali mutaxassisi.