JINOYaTChILIKNING OLDINI OLISh MASALALARI MUHOKAMA ETILDI

Amudaryo tumanida jinoyatlarning barvaqt oldini olish va huquqbuzarliklarga qarshi kurashish faoliyatida yoʻl qoʻyilgan kamchiliklar va galdagi vazifalar muhokamasiga bagʻishlangan yigʻilish oʻtkazildi.

Shu yil 30-oktyabr kuni tuman hokimligi binosida boʻlib oʻtgan mazkur yigʻilishda Qoraqalpogʻiston Respublikasi Ichki ishlar vazirining birinchi oʻrinbosari Baxtiyor Rajabov, tuman hokimi Sultonboy Yoʻldashev, tuman prokurori, Ichki ishlar boʻlimi boshligʻi va masʼullari ishtirok etishdi. Shuningdek, hokim oʻrinbosarlari, sektorlar, tegishli davlat organlari va tashkilotlar rahbarlari, fuqarolar yigʻinlari raislari ham qatnashishdi.

Yigʻilishda huquqbuzarliklar profilaktikasi va jinoyatchilikka qarshi kurash, bu borada tumandagi huquqni muhofaza qiluvchi organlar va jamoat tashkilotlarining hamkorligi, amalga oshirilayotgan chora-tadbirlarga doir masalalar muhokama qilindi.

Taʼkidlanganidek, joriy yilning 9 oyi davomida tuman Ichki ishlar boʻlimi xodimlari tomonidan hududda tinchlikni saqlash, ijtimoiy-siyosiy barqarorlikni taʼminlash, sodir etilgan jinoyatlarni oʻz vaqtida fosh qilish, jinoyatchilik va huquqbuzarliklarning, shuningdek, har qanday favqulodda hodisalar sodir etilishining oldini olish borasida jamoatchilik vakillari va boshqa masʼul tashkilotlar bilan hamkorlikda bir qator tezkor-profilaktik tadbirlar amalga oshirilgan. Ammo olib borilgan tezkor profilaktik tadbirlarga qaramasdan Amudaryo tumani hududida joriy yilning oʻtgan 9 oyi mobaynida jami jinoyatlar soni 22,5 foizga, jinoyat qidiruv sohasidagi jinoyatlar 38,9 foizga, iqtisodiy sohadagi jinoyatlar 3,1 foizga oshgan. Boshqa sohadagi jinoyatlar esa 10,7 foizga kamayishiga erishilgan.

Bundan tashqari, tumandagi 37 ta ovul va mahallalarda voyaga yetmaganlar, guruhlar, muqaddam sudlanganlar, xotin-qizlar, ishsizlar va yoshlar tomonidan sodir etilgan jinoyatlar 52 tani tashkil qilgan. Shunga koʻra, tuman hududidagi 49 ta mahallalarning 22 tasi “qizil”, 7 tasi “sariq” toifalarga ajratilgan. 20 ta ovul yoki mahallada esa umuman jinoyat sodir qilinmagani bois “yashil” toifaga kiritilgan.

Yigʻilishda huquqbuzarliklar profilaktikasi va jinoyatchilikka qarshi kurashda kuzatilayotgan ayrim kamchiliklar sohadagi islohotlarga soya solayotgani eʼtirof etildi. Shu sababli huquqbuzarliklar profilaktikasini tashkil etish, jinoyatlarning oldini olish, jinoyatlarni roʻyxatdan oʻtkazish va hisobga olish, tezkor qidiruv va tergovdagi tizimli kamchiliklar tanqidiy muhokama etildi.

Jinoyat va huquqbuzarliklar aksariyat hollarda oila va oddiy maishiy munosabatlar zamirida kelib chiqqani, qarindosh-urugʻlar, qoʻni-qoʻshnilar oʻrtasidagi nizolar toʻliq bartaraf etilmayotgani, oilalarda ijtimoiy-maʼnaviy muhitni sogʻlomlashtirish borasidagi kamchiliklar koʻrsatib oʻtildi. Ilgari sudlangan shaxslar tomonidan va mast holda jinoyat sodir etilishining oldini olishga qaratilgan tadbirlar taʼsirchanligini oshirish kerakligi tilga olindi.

Yigʻilish davomida fuqarolar yigʻinlari hamda profilaktika inspektorlari faoliyatini samarali tashkil etish bilan bogʻliq tadbirlar koʻrib chiqildi. Yoshlar, ayniqsa, voyaga yetmaganlar oʻrtasida huquqbuzarlik va jinoyatlarning oldini olishda tuman hokimligi, Xalq taʼlimi, Ichki ishlar boʻlimi, Yoshlar agentligi va boshqa mutasaddi idoralar bilan hamkorlikni kuchaytirish zarurligi koʻrsatib oʻtildi. Shuningdek, jinoyatni hisobga qoʻyish, tezkor qidiruv va tergovdagi kamchiliklar, huquqni muhofaza qiluvchi organlarning ayrim xodimlari tomonidan inson huquqlarini poymol etish holatlariga chek qoʻyish borasida masʼullar oldiga aniq vazifalar qoʻyildi.

Yigʻilish yakunida bildirilgan fikr-mulohazalar eʼtiborga olingan holda aholi tinchligini taʼminlashdagi nuqsonlarni oʻz vaqtida bartaraf etish, davlatimiz rahbari huquqni muhofaza qiluvchi organlar oldiga qoʻygan vazifalarni bajarish boʻyicha aniq tadbirlar belgilab olindi.

O.Xudoyberganova.