DARYoBOʻYI MAHALLASIDA “HOKIM VA YoShLAR” UChRAShUVI OʻTKAZILDI

Yoshlar – ertangi kun bunyodkorlari, yurt tayanchi va kelajagi hisoblanadi. Shu bois ularni komil insonlar qilib voyaga yetkazish, yetuk va bilimli boʻlib ulgʻayishlariga sharoit, imkoniyat yaratish kabi masalalarga davlatimiz tomonidan alohida eʼtibor qaratilib kelinmoqda.

Shu yil 3-noyabr kuni Daryo boʻyi mahallasidagi 21-sonli Bolalar musiqa va sanʼat maktabida hudud yoshlarini qiynayotgan muammolarni aniqlash va bartaraf etish, ijtimoiy koʻmakka muhtoj boʻlgan yoshlarga yordam koʻrsatish, tashabbuskor yigit-qizlarni har tomonlama qoʻllab-quvvatlash kabi maqsadlarda tuman hokimi Sultonboy Yoʻldashevning uchrashuvi tashkil etildi. Uchrashuvda Prezidentning tumandagi Xalq qabulxonasi mudiri Erkin Rajabov, Yoshlar agentligi tuman boʻlimi boshligʻi Sardor Ismailov hamda mutasaddi tashkilotlar masʼullari ishtirok etishdi.

Tuman hokimi Sultonboy Yoʻldashev hamda Prezidentning tumandagi Xalq qabulxonasi mudiri Erkin Rajabovlar soʻnggi vaqtlarda yoshlar uchun juda koʻplab imkoniyatlar yaratilayotgani bois yoshlar undan  unumli foydalanib, oʻz kelajaklarini yoʻlga qoʻyishlari, yurtimiz ravnaqiga hissa qoʻshadigan munosib kadrlar boʻlib yetishishlari lozimligini taʼkidlashdi. Yoshlar agentligi tuman boʻlimi boshligʻi Sardor Ismailov Oʻzbekiston Respublikasi Prezidentining tegishli farmon hamda qarorlarida belgilangan vazifalar ijrosini taʼminlash yuzasidan tumanda olib borilayotgan ishlar, tuman yoshlarini qoʻllab-quvvatlash borasida koʻrilayotgan chora-tadbirlar, kelgusidagi rejalar xususida keng toʻxtalib oʻtdi.

Shundan soʻng, tadbirda ishtirok etayotgan mahalla yoshlarining murojaat va takliflari tinglandi. Yoshlar tomonidan qilingan murojaatlarining ayrimlari shu joyning oʻzida oʻrganildi va amaliy  yordam berildi.

Jumladan, mahalla fuqarosi boʻlgan yoshlardan biri Munira Rajabova oʻgʻliga kasalligi tufayli davolatish boʻyicha amaliy yordam soʻrab murojaat qildi. Murojaat egasiga shu joyning oʻzida soha mutaxassislar tomonidan tegishli tushuntirishlar berildi.

Oʻz tadbirkorchiligini rivojlantirish uchun imtiyozli kredit olishda yordam soʻrab murojaat qilgan Elmira Oʻtemurodovaga ham yoʻl-yoʻriq va tavsiyalar berilib, kredit olish tartibi tushuntirildi. Bir martalik moddiy yordam olishda yordam berishni soʻrab murojaat qilgan fuqaro Munojot Yoʻldoshevaga esa Vazirlar Mahkamasining 312-qarorga koʻra bazaviy hisoblash miqdorining 4 baravari miqdorida  bir martalik moddiy yordam beriladigan boʻldi.

Shuningdek, mahalla fuqarolari boʻlgan, hozirda oliy taʼlim muassasalarida toʻlov-shartnoma boʻyicha tahsil olayotgan Jaloladdin Oʻrazimbetov hamda Munojot Jumaboyevalarga murojaatlariga koʻra, Vazirlar Mahkamasining 312-qaroriga muvofiq toʻlov-kontrakt summasini 50 foizgacha boʻlgan qismini qoplashda amaliy yordam koʻrsatiladigan boʻldi.

Bunday uchrashuvlar yoshlarimizning oʻzlariga boʻlgan ishonchi yanada yuqori boʻlishiga zamin yaratib, qalblaridagi yurt taqdiriga daxldorlik hissi yanada mustahkamlanishi, komil insonlar boʻlib ulgʻayishlarida muhim ahamiyat kasb etadi.

O.Xudoyberganova.