GRANT LOYIHASI DOIRASIDA OChIQ DARS OʻTKAZILDI

Tumanimizning ijtimoiy-siyosiy va ommabop nashri “Taraqqiyot koʻzgusi” gazetasining ilovasi – “Mening oilam” gazetasi tahririyati  Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab- quvvatlash jamoat fondi tomonidan tashkil etilgan “Nogironligi boʻlgan shaxslarni ijtimoiy-maʼnaviy qoʻllab-quvvatlash” mavzusidagi grant tanlovida  “Besh muhim tashabbus – yoshlarga qanot!” nomli loyihasi bilan qatnashib, gʻolib boʻldi va loyihani amalga oshirishni boshladi.

Shu yilning 24-noyabrida loyiha doirasida tumanimizdagi 32-sonli maktabda Toʻlqin ovuli hududida yashovchi nogironligi  boʻlgan yoshlar uchun “Kompyuter texnologiyalari va internetdan samarali foydalanish” mavzusida ochiq dars  oʻtkazildi.

Ovul hududidagi imkoniyati cheklangan, uy sharoitida taʼlim oluvchi  28-, 33- va 32-sonli maktablar  oʻquvchilari uchun mutaxassis oʻqituvchi Sohiba Yoʻldosheva,  32-sonli maktab ijodiy-madaniy ishlar boʻyicha targʻibotchisi Nazokat Qodirovalar zamonaviy axborot-kommunikatsion texnologiyalar va ularning  taʼlim olish hamda ijtimoiy faoliyatdagi ahamiyati, ulardan samarali foydalanish,  qoʻllanish  yoʻl-yoʻriqlari xususida elektron doska  yordamida ochiq dars oʻtdilar.

Tadbirni  “Taraqqiyot koʻzgusi” gazetasi maxsus muxbirlari  Oygul Rajabova, Mahmudjon Shomurodovlar tashkillashtirdi.

Maktabning kompyuter sinfxonasida oʻtkazilgan ochiq dars uy sharoitida taʼlim oluvchi oʻquvchilarga juda qiziqarli va manfaatli boʻldi.

Sevara ISMOILOVA