“Korruptsiyaga qarshi kurashishning samarali usullari” mavzusida yigʻilish boʻlib oʻtdi

Korruptsiya – bu jamiyatnining rivojiga salbiy taʼsir koʻrsatuvchi xavfli jinoyat hisoblanadi. Mazkur illat demokratiya va huquq ustuvorligi asoslariga putur yetkazibgina qolmasdan, inson huquqlari buzilishiga olib keladi, bozorlar faoliyatiga toʻsqinlik qiladi, hayot sifatini yomonlashtiradi va odamlar xavfsizligiga tahdid soladigan uyushgan jinoyatchilik va boshqa hodisalarning ildiz otishiga sharoit yaratib beradi.

Taʼkidlab oʻtish oʻrinliki, ushbu illat dunyoning barcha mamlakatlarida uchraydi. Uni bartaraf etish boʻyicha jahon hamjamiyati tomonidan bir qator samarali ishlar amalga oshirilmoqda. Shu jumladan, mamalakatimizda ham mazkur jinoyatning oldini olish maqsadida bir qator qonun va qonunosti hujjatlari qabul qilingan boʻlib, keyingi yillarda korruptsiyaga qarshi kurashishning samarali mehanizmlari ishlab chiqildi va keskin kamayishiga erishildi.

25-noyabr kuni Amudaryo tumani Davlat xizmatlari markazida “Korruptsiyaga qarshi kurashish usullari” mavzusida yigʻilish boʻlib oʻtdi. Yigʻilishda tuman hokimining oʻrinbosari – Oila va xotin-qizlar boʻlimi boshligʻi Goʻzal Saburova, fuqarolik holati dalolatnomalarini yozish boʻlimi mudirasi Sanobar Xolboyeva, Yuridik xizmat koʻrsatish markazi boshligʻi Nilufar Jumaniyozova, tuman prokurori yordamchisi Abbaz Niyazimbetov, Ichki ishlar boʻlimining xotin-qizlar masalalari boʻyicha katta inspektori Inobat Oʻrazmatova hamda mahallalarda faoliyat yuritayotgan xotin-qizlar faollari, keng jamoatchilik vakillari ishtirok etishdi.

Yigʻilishda tuman fuqarolik holati dalolatnomalarini yozish boʻlimi mudirasi Sanobar Xolboyeva korruptsiyani yuzaga keltiruvchi omillar sifatida aholining huquqiy savodxonligi pastligi, mamlakatda diniy va axloq qoidalarining buzulishi, inflyatsiyaning yuqori darajasi, davlat sektoridagi xizmat qilayotgan xizmatchilar daromadlarining xususiy sektorda topish mumkin boʻlgan daromadlardan kamligi va shu kabi boshqa sabablar ekanligini aytib oʻtdi.

Tuman Yuridik xizmat koʻrsatish markazi boshligʻi Nilufar Jumaniyozova esa korruptsiyaga qarshi kurashishning samarali usullari haqida gapirdi. Keltirilishicha, ichki va tashqi nazoratni kuchaytirish va saylov tizimi orqali kurashish jahon mamlakatlarida tan olingan usul sifatida qaraladi.

Boshqaruv apparatining oʻzida ichki nazorat tuzilmalari tashkil etilib, ushbu tuzilma aʼzolari xodimlarning etiket qoidalariga rioya qilishlarini nazorat qilib borsa, mazkur illatning sezilarli darajada kamayishiga erishiladi.

Shundan soʻng, Ichki ishlar boʻlimining xotin-qizlar masalalari boʻyicha katta inspektori Inobat Oʻrazmatova tumandagi har bir korxona, tashkilot, muassasa rahbarlari, xodimlarining oʻz xizmat vazifalarini bajarishda har qanday moddiy qiymatga ega “hadya”larning berilishiga, olishiga yoki ularning xizmat vazifalarini bajarishi munosabati bilan boshqa imtiyozlar taklif qilinishga qarshi samarali tarza kurashilayotganligi, shuningdek, ushbu illatga qarshi kurashishda xodimlar orasida qatʼiy fuqarolik pozitsiyasini shakllantirish maqsadida turli ijtimoiy tadbirlar, sport musobaqalari va tanlovlar oʻtkazilib kelinayotganligini taʼkidladi.

Tuman prokurori yordamchisi Abbaz Niyazimbetov faqatgina pora olgan kishi korruptsioner emasligini, balki pora taklif qilgan va bergan shaxs ham jinoyatchi boʻlishini aytib, jinoyatga jazo muqarrar ekanligini taʼkidlab oʻtdi.

Tuman hokimi oʻrinbosari Goʻzal Saburova xotin-qizlar faollariga oʻz xizmat vazifalarini sidqidildan va vijdonan bajarishlarini, ish jarayonini holislik va shaffoflik tamoyillari asosida samarali usulda tashkil etishlari lozimligini aytib murojaat qildi.

Shuningdek, korruptsiviy holatlarning oldini olishda barcha birdek harakat qilishi lozimligini bu esa jamiyat rivojida nihoyatda muhim ahamiyat kasb etishini taʼkidladi.

Darhaqiqat, baʼzi fuqarolarning qonunlarga eʼtiborsizligi, befarqligi, har bir ishni pul orqali hal qilish mumkin degan fikri uning farzandlari va oilasi oldida, yashab turgan joyidagi hamqishloqlari orasida yuzini yerga qaratadi. Shunday ekan ushbu illatdan barchamiz yiroqda boʻlaylik!

Tuman hokimligining Axborot xizmati.