MENI ARMIYa TOBLADI

Biz koʻpincha hayotda boʻsh vaqt degan tushunchaga unchalik eʼtibor beravermaymiz. Boʻsh vaqtimiz boʻlganida esa juda koʻp holatlarda undan notoʻgʻri foydalanamiz. Ammo bizning oilamizda kimning-ki boʻsh vaqti boʻlsa, albatta, birinchi galda oʻzi va oilamiz uchun foydali mashgʻulot bilan shugʻullanishga odatlanganmiz. Shaxsan men boʻsh vaqtni imkoniyat, deb tushunaman. 2012-yilda 3-sonli Amudaryo akademik litseyini tugatib, Toshkent tibbiyot akademiyasiga hujjatlarimni topshirdim. Lekin talab qilingan ballni toʻplay olmaganim uchun oʻqishga kira olmadim. Nima qilish kerak? Oldimda bir yil turibdi. Maxsus tayyorlov kursida oʻqisammikan, degan xayolga bordim. Negadir, bunday oʻquv kurslarida oʻqishdan koʻra, harbiy xizmatga borishni istadim.

- Yaxshisi, Armiyaga ketaman, jangovar texnikalarning sir-asrorlarini oʻrganaman, -dedim ota-onamga.

Men boʻsh vaqtimni harbiy hayot bilan band qilishga jazm etdim. Tuman mudofaa ishlari boʻlimi tomonidan chaqiruv qogʻozini olganimda, toʻgʻrisi, oʻzimni zobitday his qilganman. Barcha nazariy va amaliy hamda jangovar tayyorgarlik sinovlaridan muvaffaqiyatli oʻtib, harbiy xizmatga joʻnab ketdim.

Bir yil davomida goʻzal Fargʻonaning Margʻilon shahridagi harbiy qismlardan birida ona Vatan oldidagi oʻz yigitlik burchimni ado etdim. Shuni mamnuniyat bilan ayta olamanki, harbiy hayot meni jismonan va aqlan chiniqtirdi. Maʼnaviy-axloqiy jihatdan shakllanishimga yordam berdi. Bundan tashqari, boʻsh vaqtdan yanada unumli foydalanishni oʻrgandim. Nazariy va amaliy mashgʻulotlarning uzviyligi, bir-biriga uygʻun tarzda olib borilishi bois, men oʻzim qiziqqan tabiiy fanlar boʻyicha bilimimni yanada boyitdim. Oʻtkazilgan nazariy bilimlar test sinovida yuqori natijalarga erishib, qoʻmondonlik tomonidan oliy oʻquv yurtiga oʻqishga kirishda imtiyoz beruvchi tavsiyanomaga ega boʻldim. Harbiy xizmatdan kelgach, qisqa muddat mustaqil tayyorgarlikdan soʻng Toshkent tibbiyot akademiyasining tibbiy profilaktika fakultetiga hujjatlarimni topshirdim. Davlat test sinovlaridan muvaffaqiyatli oʻtib, talabalik baxtiga muyassar boʻldim.

Men barcha tengdoshlarimga qarata shunday degim keladi:

– Azizlar, boʻsh vaqt–inson uchun katta imkoniyat. Ana shu imkoniyatdan foydalanib, umrning har bir lahzasining qadriga yetib yashaylik. Mening hayotimga ana shu imkoniyat zeb berdi. Ona Vatanga xizmat qilishdek baxtga erishdim. Armiya esa meni har jihatdan chiniqtirdi, oldinga, faqat oldinga intilib yashashga oʻrgatdi.

Fursatdan foydalanib, men barcha yurtdoshlarimni, xizmatdosh doʻstlarimni, ona Vatanimiz sarhadlarida sergak turgan askar-u zobitlarni Vatan himoyachilari kuni bilan samimiy tabriklayman. Osmonimiz musaffo, yurtimiz tinch va obod, orzu yoʻllarimiz oydin boʻlsin!

Dilshodbek ROʻZMETOV,

Toshkent tibbiyot akademiyasi 1-bosqich talabasi,

zahiradagi oddiy askar.

(Foto - uza.uz)