JASORAT TIMSOLI

Shunday insonlar borki, oʻz hayotining goʻzal, farovon boʻlishi uchun astoydil intiladi, hech kimdan kam boʻlmaslik uchun kurashadi va havas qilgulik natijalarga erishadi. Toʻlqin ovulida istiqomat qiluvchi Gulora Bobojonova ana shunday, qatʼiyatli, metin irodali ayol.

Taqdir uni bolaligidanoq turli sinovlarga duch etdi. 11 nafar farzandni dunyoga keltirgan onasi bevaqt vafot etdi. Oila, farzandlar tashvishi yolgʻiz otasiga qoldi. Buning ustiga boshqa tugʻishganlaridan farqli ravishda, Guloraning bir oyogʻi nuqsonli edi. Biroq u jismidagi muammo haqida emas, koʻproq oʻqish, biron kasb egasi boʻlish, shu tufayli faol yashab, hayotda oʻz oʻrnini topishga intildi.

Bolaligidan turli bejirim liboslar tikib, oilasidagilarni, yaqinlarini xushnud etadigan onasining hunariga qiziqib, tikuv mashinasini boshqarishni, kiyimlar tikishni oʻrgandi.

Maktabni tugatganidan soʻng Toʻrtkoʻldagi kasb-hunar bilim yurtida oʻqib, shu kasbni ham nazariy, ham amaliy jihatdan puxta oʻrgandi.

Gulora Bobojonovaning kasbi turmush qurib, oilali boʻlganida ham juda asqotdi. Oila aʼzolarining kiyimlarini ularning didiga mos, zamonaviy uslublarda tikib, olqishini oldi. Yangi kelin tikkan bejirim liboslarga havasmandlar ham kela boshlagach, buyurtmalar oldi va oilasi iqtisodiga koʻmakchi boʻldi. Turmush oʻrtogʻining sogʻligida muammolari borligi uchun roʻzgʻorning kamini oʻz mehnatlari bilan toʻldirishga intildi.

Ayolning joni qirqta boʻladi, deyishadi. Aslida bu ibora ayol bardoshli, matonatli, sinovlarga sabrli boʻlgani uchun aytilgan boʻlsa, ehtimol? Shu jihatdan qaraganda, Gulora Bobojonovaning joni qirqdan ham ziyod, deya taʼriflasak ham mubolagʻa boʻlmas. U bir oʻgʻil, bir qizini odobli, aql-hushli qilib voyaga yetkazdi. Halol mehnatidan topgan daromadidan oʻgʻil uylantirib, qiz chiqardi. Imkoniyatim cheklangan, deb idorama-idora yurib yordam soʻramadi, topganiga qanoat qilib yashadi, intildi, turmush oʻrtogʻiga gʻamxoʻrlik qilishga ham ulgurdi. Halol mehnatlaridan fayzli, obod xonadonida unga yana ham kuch, ruhiy madad beradigan nevara dunyoga keldi.

Oʻtgan yili Gulora Bobojonova oʻz faoliyatini yakka tadbirkor sifatida qonuniy tashkil etib, Toʻlqin ovul fuqarolar yigʻini maʼmuriy binosining boʻsh turgan xonasida tikuvchilik tsexi ochdi va 4 nafar ishsiz ovul ayol-qizlarini ish bilan taʼminladi. Shuningdek, 3-bosqich “Ayollar daftari”da turadigan, ishlashga ishtiyoqi bor ayol-qizlarni tikuvchilik kasbiga oʻqitib, sertifikat olib berdi.

Bu yerda buyurtma asosida tayyorlanayotgan tayyor kiyimlarni koʻrgan odam ularni imkoniyati cheklangan ayol tikkaniga ishonishi qiyin. Biri-biridan bejirim tikilgan, did bilan bezatilgan kiyimlarga qarab havasingiz keladi. Oʻtgan yili ovul xotin-qizlar faoli Gavhar Bobotoyeva koʻmagida 15 million soʻm imtiyozli kredit evaziga 3 ta zamonaviy tikuv mashinalari olgani yakka tadbirkor sifatidagi faoliyati yana ham jonlanishiga zamin boʻldi. Chevar ayollar endilikda oʻzlari gazlama sotib olib, bozorga tayyor kiyimlar chiqarishni ham moʻljallashayapti.

Tengqurlari pensiyaga chiqib, oilasi davrasida bamaylixotir dam olishni moʻljallayotgan bir vaqtda mehnat qilishdan, intilishdan toʻxtamay, ulkan rejalarni koʻzlayotgan fidoyi va jasoratli Gulora Bobojonovaga tolmas kuch-quvvat tilab, xayrlashdik.

Oygul RAJABOVA.