EL MEHRINI QOZONGAN AYoL

Olimlar ayollarning yuragi erkaklarnikiga qaraganda tez urishini aniqlashibdi. Qiziq, ehtimol bu ayol zotining oila, roʻzgʻor, farzand tashvishlariga fidoyiligi, kuyunchakligidandir? Chor-atrofimizga nafar solsak, bulardan ham ortib muallima, shifokor, davlat  va jamoat ishlarida ham namuna boʻlib faoliyat yuritayotgan ayollar koʻpligini koʻramiz. Ha, ayol oilaninggina emas, jamiyatning ham gultoji. Ayol nafaqat umr yoʻldoshi va oilasiga, balki kasbiga ham sadoqatli, fidoyi.

T

oshyop ovul fuqarolar yigʻini raisi Gulshod Sobirova ana shundaylar sirasidan. U maktabni tugatganidan soʻng, NDPIning badiiy grafika fakultetida oʻqib, chizmachilik va tasviriy sanʼat oʻqituvchisi mutaxassisligiga  ega boʻldi. Mehnat   faoliyatini 1990-yilda Mangʻit shahar Kengashi mutaxassisi boʻlib ishlashdan boshladi, 1993-2016-yillarda 40-sonli maktabda oʻqituvchilik qildi. 2016-yilda esa Toshyop ovul fuqarolar yigʻinining diniy maʼrifat, maʼnaviy-axloqiy tarbiya masalalari boʻyicha maslahatchisi lavozimida ishlay boshladi. 2019-yil 14-may kuni oʻtkazilgan ovul fuqarolar yigʻini raisi saylovida esa toshyopliklarning eng koʻp ovoziga ega boʻlib, yigʻin raisi boʻlib saylandi.

Bu uning el ishonchini qozona olgani, ularning quvonch-u tashvishlariga yelka tutib, shu el obodligi, tinchligi uchun vaqt bilan hisoblashmay qilgan mehnatlari samarasi edi.

Masʼuliyatli vazifani sidqidildan ado etayotgani bois, ikkinchi muddatga ham saylandi. Bu ishonchni u eng oliy mukofot deb biladi, shunga yarasha ishlashga intiladi.

Bugungi kunda ovulda 596 ta xonadonda  701 ta oila istiqomat qiladi. 68 ta koʻchada oʻzbek, qoraqalpoq, qozoq, qirgʻiz, rus va boshqa millatlarga mansub 3505 nafar aholi hamjihatlikda yashaydi. Ularning 227 nafari turli korxona-tashkilotlarda ishlaydi, 22 nafari tadbirkorlik, 5 nafari savdo-sotiq bilan, 12 nafari kasanachilik, 12 nafari milliy hunarmandchilik, 422 nafari chorvachilik, parrandachilik, 320 nafari  mavsumiy ishlar bilan band.

OFY raisining asosiy ish vaqti el oralab yurib, odamlarning ahvoli bilan tanishish, turmushidagi muammolariga tezkor yechim topish, ishsiz, ishga layoqatli fuqarolarni tadbirkorlikka jalb qilish, oʻz-oʻzini band qilib, oilasida daromad manbalari yaratishga jalb qilish bilan oʻtadi. Shuningdek, ovuldagi 47 nafar nogironligi boʻlgan, boquvchisini yoʻqotgan oilalardan ham xabar olish, qoʻllab-quvvatlash uning eʼtiboridan chetda qolmaydi. Ovuldagi xotin-qizlar faoli, yoshlar yetakchisi, profilaktika inspektori va ovulning nuroniy keksalari koʻmagida oilalarda maʼnaviy muhitni yaxshilash, farovon yashashga intilishni keng targʻib etgani sababli 2022-yilda oilaviy ajrim qayd etilmadi, profilaktik hisobda turuvchilar yoʻq, 8 ta oʻzaro kelishmovchilikka borgan oilalar yarashtirildi.

Ovulda deyarli barcha xonadonlarda tomorqa yer, 383 ta xonadonda qoʻshimcha tomorqa yer, 11 xonadon tomorqasida issiqxona mavjudligi va ulardan samarali foydalanilayotganligi oilalar iqtisodi yana ham yuksalishiga zamin boʻlayotir.

Ovulning mehnatkash, mehr-oqibatli xalqi joriy yil bahorini ham ezgu niyatlar bilan qarshi olib, koʻklamgi ishlarni boshlab yuborishdi. Doniyor Xolmanov turmush oʻrtogʻi Malohat Qurbonboyeva bilan birgalikda oʻzlari bunyod etgan moʻʼjazgina issiqxonasida gul yetishtirishni yoʻlga qoʻyishdi va oilasida daromad manbasini yaratishdi. “Ayollar daftari”ga kiritilgan Shahodat Yusupovaga tadbirkorlik  faoliyatini boshlashi uchun kredit olishga koʻmak berildi va u tikuv mashinasi  olib, oilasi bagʻrida daromad topayapti.

Aholi farovonligini taʼminlashda ularning bandligini taʼminlash muhim oʻrin tutadi. Shu boisdanda G.Sobirovaning kundalik rejasida ishsiz fuqarolarni aniqlash, bandligini taʼminlashga harakat qilish muhim oʻrin tutadi. Ovul aholisi esa kichkina jussasida ham bir olam gʻayrat-shijoat, intilish mujassam, gʻamxoʻr rais ayolning  faoliyatidan mamnun. OFY raisi ularning biriga qiz, biriga opa, biriga singilday aziz. Zero, halol mehnat keltirgan bunday sharaf ulkan baxtdir. Gulshod Sobirova esa el mehri sababli oʻzini chinakam baxtiyor sanaydi.

Oygul RAJABOVA.