AYoL BAXTI

Insonning kelajagiga ilk qadam bolaligidanoq boshlanadi, deyishadi. Chunki oʻz hayoti davomida biron kasb-korni puxta egallab, ana shu kasb-kori tufayli umr sahifalarini oʻzgalar havas qilarli darajada maʼno-mazmun bilan boyitib yashayotgan insonlarning aksariyati oʻzi sevgan mashgʻulotlari, orzu-niyatlari haqida soʻz ochganlarida, albatta, bolalik xotiralarini tilga olishadi.

Tumandagi 21-sonli BMSMning amaliy sanʼat yoʻnalishi toʻgarak rahbari Xonimjon Ismoilova amaliy sanʼatning kashtachilik, zardoʻzlik, gilamdoʻzlik, palos toʻqish sirlariga oshno boʻlganida hali juda yosh, jamalak sochli qizaloq edi. Bu hunarlarga ilk koʻnikmani onasidan olgan Xonimjon oʻz intilishlari, milliy hunarmandchilik sohasiga boʻlgan qiziqishlari tufayli ulgʻaygan sari ushbu sohaga mehr qoʻyib, qoʻli gul zardoʻz, gilamdoʻz, kashtachilik va palos, kiyim-kechaklar toʻqish, hatto uylarga islimiy naqshlar solish, rassomlik boʻyicha  mohir hunarmandga aylandi.

Maktabni tugatganidan soʻng, Beruniy shahridagi texnika litseyida toʻqimachilik yoʻnalishida tahsil olib, xalq hunarmandchiligining noyob sirlarini mukammal oʻrgandi.

Xonimjon ilk mehnat faoliyatini Amudaryo agrobiznes kasb-hunar kollejida laborant boʻlib ishlashdan boshladi. 2013-yildan 21-sonli BMSMda amaliy sanʼat yoʻnalishi boʻyicha toʻgarak rahbari sifatida faoliyatini davom ettirdi.

Mana 10-yildirki, X.Ismoilova oʻquvchi-yoshlarga kashtachilik, zardoʻzlik, gilamdoʻzlik, palos va kiyim-kechaklar toʻqish, rassomlik, islimiy naqshlar solish, rang-barang gullar yasash sirlaridan saboq berib kelmoqda.

Maktabning amaliy sanʼat yoʻnalishida 10 nafar oʻquvchi taʼlim-tarbiya olishadi. Ularning qiziqish va intilishlarini qoʻllab-quvvatlash, oʻz iqtidorlarini namoyon etishlari uchun imkoniyatlar yaratish esa oʻqituvchining tajriba va mahoratiga bogʻliq.

U ayni paytda oʻz sohasi boʻyicha bilim va malakasini oshirish maqsadida Ajiniyoz nomidagi NDPIning tasviriy sanʼat fakultetida tahsil olmoqda. Bir vaqtning oʻzida “Gulruh” oilaviy korxonasini boshqarish, oʻquvchi-yoshlarga tasviriy sanʼat yoʻnalishida taʼlim berish uchun insonga qanchalik kuch, maʼnaviy ruh kerak boʻlishini hisobga olsak, X.Ismoilovaning uddaburon, oʻz oldiga qoʻygan orzu-niyatlari yoʻlida tinib-tinchimas, fidoyi ayol ekanligini anglash qiyin emas.

TTBning tez tibbiy yordam boʻlimida haydovchi boʻlib ishlovchi umr yoʻldoshi Farhod Ismoilov va farzandlari barcha ishlarida Xonimjonga yaqin maslakdosh va koʻmakdosh. “Gulruh” oilaviy korxonasida 5 nafar qipchoqlik yoshlarning doimiy ish bilan bandligi taʼminlangan.

Xonimjon erishgan yutuqlari  haqida “maqtanish boʻladi”, degan maʼnoda gapirishni istamaydi. Lekin uning shaxsiy hujjatlari toʻplamida oʻz faoliyat yoʻnalishi boʻyicha soha vazirliklari, tuman hokimligi tomonidan taqdim etilgan tashakkurnomalar, Faxriy yorliqlar, qimmatbaho sovgʻalar bir talay.

Xonimjonning xalqqa  yetkazayotgan manfaatidan eli, mahalladoshlari rozi. Bir ayol uchun bundan ulugʻroq baxt boʻlmasa kerak. Xonimjon ana shunday baxt sohibasi.

Robiya YOʻLDOShEVA.