AMUGA EL BOʻLGAN QALBI JOʻShQIN Nigina

Koʻpincha oilada qiz farzand tugʻilsa: “Holva”, deyishadi va bu bilan oilaga yangi kelgan chaqaloq ham ota-onasi, ham oilasi uchun shirin hayot, shirin turmush ramzi sifatida qabul qilinadi.

Asli Oʻzbekistonning jannatmakon goʻshasi – Fargʻona viloyatining Rishton tumanidan boʻlgan Niginaxon tugʻilganida fargʻonalik momo-buvalari uning tashrifini qanday taʼriflab, qanday qarshi olishganlarini bilmadim-u, lekin u ulgʻayib, Amudaryo tumaniga kelin boʻlib tushganida nafaqat Nigina kelin boʻlgan xonadon ahli, qarindoshlar va boshqa yaqinlari suyunishgani rost. Boisi, tili ham, oʻzi ham, muomala-yu odobi-ikromi ham shirin boʻlgan Niginaxon yillar oʻtib, kasb-kori bilan ham shu elning aziz farzandiga aylandi.

Bolaligidan  tarjimon boʻlishni orzu qilgan Niginaxon Saidova Rishton tumanidagi umumtaʼlim maktabini 2003-yilda faqat “aʼlo” baholarga tugatdi. Shu yili u Oʻzbekiston Davlat jahon tillari universitetining ingliz tili fakultetiga tarjimonlik yoʻnalishi boʻyicha oʻqishga kirdi.

Tabiatan intiluvchan Niginaxon universitet tahsili jarayonida izlanuvchan, tashabbuskor va zukko talaba sifatida tanildi, oʻz mutaxassislik yoʻnalishi boʻyicha ingliz tilini mukammal oʻrgandi. U 2007-yilda Universitetni muvaffaqiyatli tugatdi.

Amudaryolik uzoq qarindoshlari, el-yurt  hurmatidagi inson – Bahrom Jumaniyozovlar xonadoniga kelin boʻlgan Niginaxon ilk mehnat faoliyatini 2008-yilning mart oyidan Amudaryo qishloq xoʻjalik kasb-hunar kollejida ingliz tili oʻqituvchisi sifatida boshladi. U 11-yil davomida mazkur oʻquv dargohida oʻquvchi-yoshlarga ingliz tili fanidan dars berdi.

2019-yilning sentyabr oyidan 56-sonli umumtaʼlim maktabida ingliz tili fani oʻqituvchisi sifatida oʻz mehnat faoliyatini davom ettirayotgan Niginaxonning shogirdlari safi yanada oshdi. Darslarini variativ oʻquv-rejasi asosida qiziqarli va koʻrgazmali vositalar yordamida tashkil etib, oʻquvchilarining diqqat-eʼtiborini xorijiy tillarni puxta oʻrganishga qarata olgan Nigina mana salkam toʻrt yilki, Amudaryo tuman XTBga qarashli umumtaʼlim maktablari oʻqituvchilari orasida doimo peshqadam.

U taʼlim berayotgan oʻquvchilari orasida S1 darajasidagi sertifikat egalarining ham borligi quvonarli. Joriy 2022-2023 oʻquv yilida maktab oʻquvchilari orasida oʻtkazilgan fanlar olimpiadasining tuman bosqichi gʻolibi boʻlgan 11-sinf oʻquvchilari Farhod Nurboyev va 2-oʻrin sohibi Nodirbek Boyjonovlar  S1 sertifikati, Muxlisa Oʻrinboyeva V2 sertifikati sohibi boʻldilar. Nigina Saidova esa “Eng yaxshi chet tili fani oʻqituvchisi” koʻrik-tanlovida faxrli 2-oʻrinni egalladi va koʻrik-tanlov tashkilotchilari tomonidan Faxriy yorliq hamda esdalik sovgʻalari bilan taqdirlandi.

Oʻzbekiston Respublikasi Prezidenti sovrini uchun “Xorijiy tillarni oʻqitish boʻyicha eng yaxshi maktab tanlovida esa u mehnat qilayotgan 56-sonli umumtaʼlim maktabi faxrli 2-oʻringa munosib koʻrildi va maktabga 75 mln. soʻmlik Prezident sovgʻasi topshirildi.

Yaqinda iqtidorli va tashabbuskor oʻqituvchi Niginaxonni hamkasb doʻstlari va shogirdlari yana bir quvonchli xabar bilan tabriklashdi. Xalq taʼlimi Vazirligi jamgʻarmasi hisobidan har oylik ustama olish uchun oʻtkazilgan ikki bosqichli tanlovda muvaffaqiyatli ishtirok etgan Niginaxon Saidova joriy yilning aprel-dekabr oylari oraligʻida har oyda 5 mln. soʻm ustama olish huquqini qoʻlga kiritdi.

– Oʻqituvchilarga koʻrsatilayotgan eʼtibor va gʻamxoʻrlikdan juda xursandman, – deydi Nigina. – Avval yaxshi ishlagan ham, ishlamagan ham bir xil miqdordagi maosh olishardi. Shunday paytda fidoyilik bilan ishlayotgan oʻqituvchilar uchun bu adolatsizlik boʻlib tuyulardi. Endi yaxshi natijalarga erishgan oʻqituvchining mehnati eʼtiborda. Bu juda katta ragʻbat boʻldi.

– Niginaxon, qancha maosh olasiz, – qiziqdik.

– 8 mln. soʻm, endi aprel oyidan boshlab, har oyda 13 mln. soʻmdan maosh oladigan boʻldim!

Baʼzan qiziqarli dars-mashgʻulotlarga berilib ketgan paytlarida Niginaxon kun boʻyi  maktabda, oʻquvchilari davrasida qolib ketadi. Oʻzining kelin, ona, rafiqa, beka ekanligi esiga tushganida alohida mehr bilan oilasi bagʻriga oshiqadi. Oʻzaro mehr-oqibat, yuksak insoniylik fazilatlari hokim boʻlgan oilada u oʻzining mehr-muhabbati bilan umr yoʻldoshi Davronbekning, xush xulqi, samimiyati bilan qaynotasi, el-yurt ardogʻidagi nuroniy Bahrom ota Jumaniyozovning hurmat-eʼtibori, gʻamxoʻrligidan bahra oladi. Biri-biridan shirin ikki oʻgʻil, ikki qizining ahil va inoq oila saltanatida voyaga yetayotganidan koʻngli togʻday yuksaladi. Qadrdon ota makoni – goʻzal Fargʻonaga boʻlgan sogʻinch tafti bosilganday boʻladi goʻyo va yana tonglarni shodon, ezgu orzular bilan qarshilagan Niginaxon jonajon maktabiga, oʻquvchilari davrasiga oshiqadi.

Tugʻilgan yurt, Vatan – insonning yuragida boʻladi, deyishadi. Yuragida ona yurt mehr-muhabbati balqib turgan insonlarning tabiati joʻshqin, qalblari esa hamisha qaynoq boʻlganidan el-yurt manfaati, kelajagi yoʻlida oʻzini safarbar qilib yashayveradilar. Niginaxon ana shunday joʻshqin tabiatli, qaynoq qalbli Amu elining ardoqli farzandlaridan biri.

 Robiya YOʻLDOShEVA.